Hubo 79 - Ndebele Bible (iBhayibhili Elingcwele) 1978

Ukucela kuNkulunkulu ukuba asize abantu bakhe

1Nkulunkulu, abezizwe sebengenile elizweni lakho;

balingcolisile ithempeli lakho elingcwele,

balidilizile iJerusalema.

2Banikile izidumbu zenceku zakho

zaba yikudla kwenyoni zaphezulu,

lenyama yabangcwele bakho kuzo izilo zomhlaba.

3Balichithile igazi labantu bakho njengamanzi ezindaweni zonke zaseJerusalema;

kakubanga khona obangcwabayo.

4Sesiphenduke inhlamba kwabakhelene lathi,

siyahlekwa, siklolodelwe yilabo abasiphahlileyo.

5Koze kube nini, Nkosi, uthukuthela,

lolaka lwakho luvutha njengomlilo na?

6Yehlisela ulaka lwakho phezu kwabezizwe abangakwaziyo,

laphezu kwemibuso engakhuleki ebizweni lakho.

7Ngoba bamchithile uJakobe,

bawubhidlizile umuzi wakhe.

8Ungasibaleli izono zabokhokho bethu;

isihawu sakho kasize kithi masinyane,

ngoba sehliselwe phansi kakhulu.

9Sisize, Nkulunkulu wokusizwa kwethu,

ngenxa yodumo lwebizo lakho;

usikhulule, usithethelele izono zethu

ngenxa yebizo lakho.

10Bangakutsho ngani abezizwe ukuthi: Ungaphi uNkulunkulu wabo na?

Ukuphindiselwa kwegazi elichithekileyo lenceku zakho

kakwaziwe phakathi kwezizwe phambi kwethu.

11Ukukhala kwezibotshwa kakufinyelele kuwe;

ngamandla akho amakhulu ubalondoloze labo abamiselwe ukufa.

12Ubaphindisele kasikhombisa abakhelene lathi

ukuthuka abakuthuka ngakho, Nkosi.

13Ng’khonake thina abantu bakho, umhlambi wedlelo lakho,

sizakukubonga kuze kube nininini,

sitshumayele udumo lwakho ezizukulwaneni ngezizukulwana.