1Abantu baseKiriyathi‐Jeyarimi beza, bawuthatha umtshokotsho weNkosi, bawusa endlini kaAbinadaba entabeni. Bagcoba uEleyazare indodana yakhe ukuba agcine umtshokotsho weNkosi.USamuweli wahlulela uIsrayeli
2Ngakho okwesikhathi eside umtshokotsho wesivumelwano wawuseKiriyathi‐Jeyarimi; kwathi ngemva kwesikhathi esingaba ngamatshumi amabili eminyaka, kwaba khona umoya kuye wonke uIsrayeli wokulandela iNkosi.
3USamuweli wakhuluma kuyo yonke indlu kaIsrayeli wathi: Uba ukubuyela kwenu eNkosini kungokwenhliziyo yenu yonke, khuphani onkulunkulu bezizweni lezithombe zikankulunkulukazi uAshitorethi phakathi kwenu, liqondise inhliziyo zenu eNkosini, likhonze yona yodwa, izakulophula kumaFilistiya.
4Ngakhoke abakoIsrayeli basebekhupha izithombe zikaBali lezikaAshitorethi, bakhonza iNkosi yodwa.
5USamuweli wasesithi: Buthanisani wonke uIsrayeli eMizipa; ngizalikhulekela eNkosini.
6Babuthana eMizipa, bakha amanzi, bawathela phambi kweNkosi, bazila ukudla mhlalokho, bathi: Sonile eNkosini. KuseMizipa lapho uSamuweli wayesahlulela uIsrayeli khona.
7Kwathi amaFilistiya esezwile ukuba abantu bakoIsrayeli babuthene eMizipa, izikhulu zamaFilistiya zaphuma ukulwa loIsrayeli. Abantu bakoIsrayeli sebekuzwile lokho bawesaba amaFilistiya.
8Abantu bakoIsrayeli bathi kuSamuweli: Ungayekeli ukusikhulekela eNkosini uNkulunkulu wethu ukuba asikhulule kumaFilistiya.
9Ngakhoke uSamuweli wathatha iwundlu elenyisayo, wanikela ngalo eNkosini laba ngumnikelo otshiswa wonke. USamuweli wamkhulekela uIsrayeli eNkosini, iNkosi yamphendula.
10USamuweli esanikela umnikelo wokutshiswa, amaFilistiya asondela ukulwa loIsrayeli; kodwa iNkosi yaduma ngelizwi elikhulu phezu kwamaFilistiya ngalolosuku, yawachithachitha, ahlulwa nguIsrayeli.
11Abantu bakoIsrayeli baphuma eMizipa baxotshana lamaFilistiya, bawabulala, baze bafika ngaphansi kwaseBetikari.
12USamuweli wasethatha ilitshe, walimisa phakathi kweMizipa leJeshana, walibiza ngokuthi yiEbenezeri, esithi: Kuze kube khathesi iNkosi isisizile.
13Ahlulwake amaFilistiya, kawabe esaphinda ukungena futhi elizweni lakoIsrayeli. Isandla seNkosi samelana lawo amaFilistiya zonke insuku zikaSamuweli.
14Imizi ayeyithumbile amaFilistiya yabuyiselwa kuIsrayeli kusukela eEkroni kuze kufike eGathi; uIsrayeli walithatha ilizwe lakhe kumaFilistiya. Njalo kwaba khona ukuthula phakathi kukaIsrayeli lamaAmori.
15USamuweli wahlulela uIsrayeli insuku zonke zokuphila kwakhe.
16Iminyaka ngeminyaka wayenquma ehambela iBetheli, leGiligali, leMizipa; wahlulela uIsrayeli kuzo zonke lezindawo.
17Wayebuyela eRama, ngoba umuzi wakhe wawulapho; wahlulela uIsrayeli khona, wayakhela lapho iNkosi ialtare.
Who We AreWhat We EelieveWhat We Do
2025 by iamachristian.org,Inc All rights reserved.
