Ingoma Yezingoma 8 - Ndebele Bible (iBhayibhili Elingcwele) 1978

1Kungathi ngabe ungumfowethu

owamunya amabele kamama.

Uba bengihlangana lawe phandle, bengizakukwanga,

kungabi lamuntu ongidelelayo.

2Bengizakukuhola ngikungenise endlini kamama,

ukuba ungifundise;

ngizakukunathisa iwayini elixutshanisiweyo,

kanye lomhluzi wamapomegranati ami.

3Ingalo yakhe yasekhohlo ingaphansi kwekhanda lami,

lengalo yakhe yokunene inyangigona.

Umyeni:

4Ngiyalifungisa, lina madodakazi aseJerusalema,

ukuba lingasiphazamisi lisivuse singakazivukeli isithandwa sami.

Abakhaphi:

5Ngubani loyana ovela enkangala ebambelele phezu kothandekayo wakhe na?

Umyeni:

Ngakuvusa ngaphansi kwesihlahla somqokolo

lapho owazalelwa khona,

lapho unyoko akuzalela khona.

6Ngigqiza ngibe luphawu esifubeni sakho

lophawu engalweni yakho;

ngoba uthando lulamandla njengokufa,

lomhawu ulesihluku njengeliba;

uthando luyavutha njengomlilo, lutshise njengelangabi.

7Amanzi amanengi kawalakulucima uthando,

lezimpophoma kazilakulukhukhula.

Uba umuntu ebezakunika impahla yonke yendlu yakhe eyenana ngothando,

ibizakwaliwa.

Abakhaphi:

8Silodadewethu omncinyane, kalawo amabele.

Sizakwenza njani ngodadewethu lapho esecelwa na?

9Uba engumduli, sizakwakha phezu kwakhe umphotshongo wesiliva;

kodwa uba engumnyango, sizakumvalela ngamapulanka omkusu.

Umlobokazi:

10Ngingumduli, lamabele ami ayimiphotshongo;

isithandwa sami sizakwazi ukuba ngivikelekile.

Umyeni:

11USolomoni wayelesivini eBali‐Hamoni,

wasesinikela isivini kubalindi,

bonke babezakuhlawulela izithelo zaso inhlamvu zesiliva eziyinkulungwane.

12Kodwa isivini sami singesami;

inhlamvu eziyinkulungwane zingezakho, Solomoni,

abalindi bezithelo bazakuzuza amakhulu amabili.

13Wena ohlala emasimini ami,

abanakwethu balindele ilizwi lakho;

ake ungizwise lona.

Umlobokazi:

14Phangisa, wena sithandwa sami,

ube njengempala lanjengegogo phezu kwezintaba ezithela amakha.