Nani 5 - Ndebele Bible (iBhayibhili Elingcwele) 1978

Abangcolileyo bayakhutshwa ezihonqweni

1INkosi yathi kuMose:

2Laya abantu bakoIsrayeli ukuba bakhuphe ezihonqweni bonke abalobulephero, labo bonke okuphuma emizimbeni yabo okungcolileyo, labo bonke abangcoliswe yikuthinta isidumbu.

3Khuphelani ngaphandle kwezihonqo abesilisa labesifazana ukuba bangangcolisi izihonqo engihlala phakathi kwazo.

4Abantu bakoIsrayeli benza njalo, babakhuphela ngaphandle kwezihonqo, njengokutsho kweNkosi kuMose.

Umlayo omayelana lokuhlawula komuntu olecala

5INkosi yathi kuMose:Levi 6:1–7

6Tshono ebantwini bakoIsrayeli uthi: Uba owesilisa loba owesifazana esenza isono esenziwa ngabantu abangathembekanga eNkosini, lowomuntu ulecala,

7uzakuvuma isono sakhe asenzileyo, ahlawule icala lakhe ngokupheleleyo, abesesengezelela okwesihlanu, anike lowomuntu amenzele okubi.

8Kodwa uba lowo engelasihlobo okungahlawulwa kiso icala, ihlawulo elenzelwa iNkosi lizakuba ngelompristi, kanye lenqama yokubuyisana umpristi azamenzela indlela yokubuyisana ngayo.

9Yonke iminikelo, zonke izinto ezingcwele zabakoIsrayeli abaziletha kumpristi, zizakuba ngezakhe.

10Umpristi uzathatha zonke izinto ezingcwele ezinikwa ngumuntu; konke akunikwayo kuzakuba ngokwakhe.

Umlayo omayelana lobukhwele

11INkosi yathi kuMose:

12Tshono ebantwini bakoIsrayeli uthi: Uba umfazi womuntu eduha, kathembekanga kumkakhe,

13alale lenye indoda, indoda yakhe ingeze yakwazi lokhu, angabonwa muntu lanxa yena ezingcolisile, kungekho muntu ongafakaza ngaye ngoba engabanjwanga esoqotsheni lokufeba,

14futhi uba indoda yakhe ifikelwe ngumoya wobukhwele, ibe lobukhwele ngomkayo ozingcolisileyo, loba ifikelwe ngumoya wobukhwele, ibe lobukhwele ngomkayo lanxa yena engazingcolisanga,

15izakuletha umkayo kumpristi kanye lomnikelo oyingxenye yehefa lempuphu yebhali. Kayiyikuthela amafutha kuyo, ingabeki lanhlaka phezu kwayo, ngoba kungumnikelo owenziwe ngenxa yobukhwele, umnikelo wokukhumbuza ngobubi.

16Umpristi uzakumsondeza owesifazana, ammise phambi kweNkosi,

17athele amanzi angcwele embizeni yebumba, athathe umhlabathi ophansi eTabernakelini, awufake emanzini.

18Umpristi uzakumisa owesifazana phambi kweNkosi, athukulule inwele zekhanda lakhe, abeke ezandleni zakhe umnikelo wempuphu wokukhumbuza, ongumnikelo wempuphu owenziwe ngenxa yobukhwele. Ezandleni zakhe umpristi uzakuphatha amanzi aletha ubuhlungu lesiqalekiso.

19Umpristi uzakumfungisa, athi kuye: Uba ungalalanga landoda, ungaduhanga wazingcolisa, usathembekile endodeni yakho, kawungahlutshwa ngalamanzi aletha ubuhlungu lesiqalekiso.

20Kodwa uba uduhile lanxa usesendodeni yakho, futhi uba uzingcolisile, walala lenye indoda —

21umpristi amfungise owesifazana ngesifungo sesiqalekiso, athi kuye — iNkosi kayikwenze wena ube yisinengiso lesiqalekiso phakathi kwabakini, ikwenze ukuba uphumise isisu.

22Amanzi la aletha isiqalekiso kawangene kuwe, akwenze ukuba uphumise isisu. Owesifazana athi: Kakube njalo.

23Umpristi uzakugwala iziqalekiso lezi ogwalweni, azigezisele emanzini aletha isiqalekiso,

24anathise owesifazana amanzi la aletha ubuhlungu lesiqalekiso, amanzi angene kuye, aveze ubuhlungu.

25Umpristi uzakuthatha esandleni sowesifazana umnikelo wempuphu owenziwe ngenxa yobukhwele, awuzunguze phambi kweNkosi, awulethe ealtareni,

26acuphe impuphu encinyane ibe yisikhumbuzo, ayitshise ealtareni, andubana amnathise owesifazana amanzi.

27Esemnathisile amanzi, kuzakuthi uba ezingcolisile, engathembekanga endodeni yakhe, wafeba, amanzi aletha isiqalekiso esengenile kuye aveze ubuhlungu, amenze ukuba aphumise isisu, yena abe yisinengiso phakathi kwabakibo.

28Kodwake uba owesifazana engazigcolisanga, kodwa ehlambulukile, uzakukhululeka, abelethe abantwana.

29Lo ngumlayo omayelana lezindaba zobukhwele, lapho umfazi esesendodeni yakhe eduha, azingcolise,

30lalapho indoda ifikelwa ngumoya wobukhwele ngomkayo; izakummisa owesifazana phambi kweNkosi, ukuba umpristi enze kuye njengomlayo lo wonke.

31Indoda izakuba ngongelacala, kodwa owesifazana uzakuba lecala.