Isa 23 - Ndebele Bible (iBhayibhili Elingcwele) 1978

Ilizwi ngeTire

1Leli yilizwi ngeTire.

Khalani, lina mikolo yaseTarshishi,

ngoba iTire eliyindawo yakini lidilikile,

lezindlu zalo letheku lalo kuchithekile.

Lezwa lokhu endleleni livela elizweni laseKuprosi.

2Khalani, lina abahlala ngasolwandle,

lina bathengisi baseSidoni.

Izinceku zenu zadabula ulwandle,

3zahamba enlwandle ezinkulu.

Inzuzo yenu kwakungamabele aseShihori, isivuno saseNile;

lalingabathengi ezizweni.

4Woba lenhloni, wena Sidoni, ngoba ulwandle selukhulumile lwathi:

Kangizanga ngihelelwe, kangizanga ngibelethe,

kangikhulisanga amadodana lamadodakazi.

5Lapho umbiko ufika eGibithe,

bazathuthumela ngokuzwa ngokuchitheka kweTire.

6Balekelani eTarshishi,

likhale, lina abahlala ngasolwandle.

7Yiwo lo umuzi wenu ojabulayo yini,

obudala bawo busukela ensukwini zasendulo,

owathumela abantu bawo ukuhlala endaweni ezikhatshana na?

8Ngubani omise lokhu ngeTire elingumuzi wamakhosi na?

Abathengisi balo babeyizikhulu,

labathengiselani balo babelodumo emhlabeni.

9YiNkosi yamakhosi ekumisileyo,

ukuba yonakalise ukuziphakamisa lobuhle balo,

lokuba yenze bonke abadumileyo bomhlaba badeleleke.

10Limani umhlabathi, lina bantu baseTarshishi,

ngoba itheku kalisekho.

11INkosi iselulele phezu kolwandle isandla sayo,

inyikinyile imibuso;

iNkosi ilayezile ngeKanani ukuba kuchithwe indawo zalo zokuthengisela.

12Yathi: Kawusayikujabula, wena muzi waseSidoni ocindezelweyo;

suka, ubalekele eKuprosi,

kanti lakhona lapho kawuyikuphumula.

13KwakungamaKaladiya kungesiwo amaSiriya

alinikela iTire ezilweni zasenkangala;

bamisa khona izindawo zabo zokuvimbezela,

bachitha inqaba zawo, bawutshiya ulunxiwa.

14Khalani, lina mikolo yaseTarshishi,

ngoba inqaba yenu idilikile.

15Kuzakuthi ngalolosuku iTire likhohlakale okweminyaka engamatshumi ayisikhombisa, elingana lezinsuku zokubusa kwenkosi ibenye. Ekupheleni kweminyaka engamatshumi ayisikhombisa kuzakuba khona eTire okutshiwo yingoma yewule ukuthi:

16Thatha ichacho, uhambahambe phakathi komuzi,

wena wule elikhohlakeleyo,

utshaye kamnandi, uhlabele ingoma ezinengi,

ukuze izithandwa zakho zikukhumbule.

17Kuzakuthi ekupheleni kweminyaka engamatshumi ayisikhombisa iNkosi ilikhumbule iTire; lizabuyela ekuwuleni kwalo; lizakuwula layo yonke imibuso yomhlaba.

18Intengo yalo lenzuzo yalo kuzakwahlukaniselwa iNkosi; kakuyikubuthelelwa kulondolozwe, kodwa kuzakuba ngokwabadumisa iNkosi, ukuba badle basuthe, bagqoke okuhle.