uNahume 1 - Ndebele Bible (iBhayibhili Elingcwele) 1978

Ulaka oluvuthayo lweNkosi ngeNineve

1Leli yilizwi ngeNineve. Le yincwadi yombono kaNahume waseElikoshi.

2INkosi inguNkulunkulu olomona ophindiselayo;

iNkosi iyaphindisela, igcwele ulaka;

iNkosi iphindisela ezitheni zayo,

ihlala ithukuthelela izitha zayo.

3INkosi iyaphuza ukuthukuthela, kodwa ilamandla amakhulu,

kayiyikumyekela olecala;

indlela yayo isesivunguzaneni lesiphepheni,

amayezi aluthuli lwenyawo zayo.

4Ikhuza ulwandle lutshe,

yenze imifula yonke itshe;

iBashani leKarmeli kubone,

lempoko zeLebanoni zibune.

5Intaba ziyanyikinyeka phambi kwayo,

lamaqaqa ayancibilika;

ilizwe liyachitheka phambi kwayo,

umhlaba labo bonke abakhileyo kuwo.

6Ngubani ongema phambi kwentukuthelo yayo na?

Ngubani ongema ekuvutheni kolaka lwayo na?

Ulaka lwayo luthululeka njengomlilo,

lamadwala aqekezeke phambi kwayo.

7INkosi ilungile, iyinqaba osukwini lokuhlupheka;

iyabakhumbula abaphephela kuyo,

8lapho izikhukhula zibafikela;

kodwa labo abamelana layo izabachitha bathi nya,

ixotshele izitha zayo emnyameni.

9Lenza amacebo bani ngeNkosi na?

Izaqeda konke, kayiyikuphindisela kabili ezitheni zayo.

10Njengameva abambeneyo bayaqedwa bonke,

baphele njengamabibi omileyo.

11Kavelanga yini kuwe, Nineve, owenza amacebo amabi ngeNkosi,

wanika iseluleko esibi na?

12INkossi ithi:

Loba amaAsiriya elamandla, futhi emanengi, azaqedwa anyamalale.

Loba ngikuhluphile, Juda, kangisayikukuhlupha futhi.

13Sengizakwaphula ijogwe elikuwe,

ngiqamule izibopho zakho.

14INkosi ilayile ngawe, Nineve, yathi:

Kalisayikukhunjulwa ibizo lakho;

endlini yabonkulunkulu bakho ngizachitha izithombe ezibaziweyo lezibunjiweyo;

ngizakukumbela iliba, ngoba ungcolile.

Ukumenyezelwa kokuchithwa kweNineve

15Bonani ezintabeni inyawo zakhe oletha indaba ezinhle,

omemezela ukuthula.

Gcina imikhosi yakho, Juda, ugcwalise izifungo zakho,

ngoba omubi kasayikumelana lawe futhi,

uchithiwe waphela nya.