2 Kho 17 - Ndebele Bible (iBhayibhili Elingcwele) 1978

Ukunqotshwa kweSamariya lokuchithwa kwelakoIsrayeli

1Ngomnyaka wetshumi lambili wokubusa kukaAhazi inkosi yakoJuda uHosheya indodana kaEla waba yinkosi yakoIsrayeli eSamariya; wabusa iminyaka eficamunwemunye.

2Wenza okubi phambi kweNkosi, kodwa kafanananga lamakhosi akoIsrayeli ayengaphambi kwakhe.

3Wahlaselwa nguShalimaneseri inkosi yaseAsiriya, uHosheya wathela kuye.

4Kodwa inkosi yaseAsiriya yafumanisa inkohliso kuHosheya, ngoba wayethumele izithunywa kuSo inkosi yaseGibithe, kazabe esathela enkosini yaseAsiriya njengokwenza kwakhe iminyaka ngeminyaka. Ngakho inkosi yaseAsiriya yambamba yamfaka entolongweni.

5Inkosi yaseAsiriya yasihlasela lonke ilizwe lakoIsrayeli yaze yafika eSamariya, yalivimbezela iminyaka emithathu.

6Yalithatha iSamariya ngomnyaka wesificamunwemunye wokubusa kukaHosheya, yabathumba abakoIsrayeli, yabesa eAsiriya, yababeka eHala laseHabori, umfula waseGozani, lasemizini yamaMede.

7Lokhu kwenzeka ngoba abantu bakoIsrayeli babonile eNkosini uNkulunkulu wabo eyayibakhuphe eGibithe esandleni sikaFaro inkosi yaseGibithe. Basebekhonza abanye onkulunkulu,

8benza imikhuba yezizwe iNkosi eyayizixotshe phambi kwabo, lemikhuba eyayimiswe ngamakhosi akoIsrayeli.

9Benza okubi eNkosini uNkulunkulu wabo. Bazakhela indawo eziphakemeyo zokukhonzela kuyo yonke imizi yabo, kusukela enqabeni yokulinda kuze kube semzini obiyelweyo;

10bazimisela insika zokukhonzela lensika zikankulunkulukazi uAshera phezu kwawo wonke amaqaqa langaphansi kwazo zonke izihlahla ezinkulu.

18Ngakho iNkosi yamthukuthelela kakhulu uIsrayeli, yabaxotsha; kakusalanga loyedwa ngaphandle kwesizwe sakoJuda kuphela.

19Laye uJuda kayigcinanga imilayo yeNkosi uNkulunkulu wakhe, kodwa walandela imikhuba eyamiswa nguIsrayeli.

20INkosi yakhalala yonke inzalo yakoIsrayeli, yayihlupha, yayinikela kubaphangi, yayisusa phambi kwayo.

21Kuthe isimkhuphile uIsrayeli endlini kaDavida, babeka uJerobowamu indodana kaNebati ukuba abe yinkosi. UJerobowamu wamphambula uIsrayeli ekulandeleni iNkosi, wamenza wona.

22Abantu bakoIsrayeli balandela zonke izono ezenziwa nguJerobowamu, kabaziyekelanga,

23iNkosi yaze yamsusa uIsrayeli phambi kwayo njengokutsho kwayo ngazo zonke inceku zayo abaprofethi. Ngakho uIsrayeli wathunjwa elizweni lakhe, wasiwa eAsiriya kuze kube lamhla.

Abantu bezizweni bahlaliswa eSamariya

24Inkosi yaseAsiriya yaletha abantu abavela eBabiloni laseKutha laseAva laseHamathi laseSefavayimi, yabafaka emizini yaseSamariya esikhundleni sabakoIsrayeli, balithatha iSamariya, bahlala emizini yalo.

25Ekuqaleni kokuhlala kwabo khona kabayikhonzanga iNkosi uNkulunkulu; ngakho yasithumela izilwane phakathi kwabo ezabulala abanye babo.

26Kwabikwa enkosini yaseAsiriya kwathiwa: Izizwe owazithatha wazibeka emizini yaseSamariya kaziwazi umthetho kankulunkulu walelolizwe; ngakho uthumele izilwane phakathi kwazo ezibabulalayo.

27Inkosi yaseAsiriya yasilaya isithi: Thumelani khona omunye wabapristi abathathwa lapho ukuba ahlale khona, abafundise imithetho kankulunkulu walelolizwe.

28Ngakho omunye wabapristi abathathwa eSamariya weza wahlala eBetheli, wabafundisa ukuyikhonza iNkosi uNkulunkulu.

29Izizwe zonke zazilokhu zizenzela abazo onkulunkulu, zabafaka emathempelini ezindawo eziphakemeyo zokukhonzela ezazakhiwe ngamaSamariya, yileso laleso isizwe endaweni yaso;

30abantu baseBabiloni benza uSukothi‐Benothi, abaseKuthi benza uNerigali, abaseHamathi benza uAshima,

31abaseAva benza uNibazi loTaritaki, abaseSefavayimi babetshisa abantwana babo ngomlilo besiba yiminikelo kuAdrameleki loAnameleki onkulunkulu baseSefavayimi.

32Babeyikhonza leNkosi uNkulunkulu, bakhetha phakathi kwabo inhlobo zonke zabantu ukuba babe ngabapristi bezindawo eziphakemeyo zokukhonzela, babanikelele imihlatshelo emathempelini ezindawo eziphakemeyo zokukhonzela.

33Babeyikhonza iNkosi, babuye bakhonze labonkulunkulu babo belandela lokho okwenziwa yizizwe abasuswa kizo.

34Basayenza imikhuba yabo emidala kuze kube lamuhla. Kabayikhonzi iNkosi uNkulunkulu, kabalandeli izimiso lemithetho lomlayo lezimemezelo iNkosi eyalaya ngakho abantwana bakaJakobe eyambiza ngokuthi nguIsrayeli.Gen 32:28; 35:10

35INkosi yenza isivumelwano labo, yabalaya yathi: Kaliyikukhonza abanye onkulunkulu, likhothamele kibo, libasebenzele, linikele iminikelo kibo,Eks 20:5; Dute 5:9

36kodwa lizakhonza iNkosi eyalikhupha eGibithe ngamandla amakhulu langengalo elamandla, likhothame kuyo, linikele iminikelo kiyo.Dute 6:13

37Izimiso lemithetho lomlayo lezimemezelo eyalilobela khona, lihlale liqaphelisile ukukwenza, lingakhonzi abanye onkulunkulu,

38lingakhohlwa isivumelwano eyasenza lani. Lingakhonzi abanye onkulunkulu,

39kodwa likhonze iNkosi uNkulunkulu wenu; izalikhulula ezandleni zezitha zenu.

40Kodwa kabalalelanga, benza njengemikhuba yabo emidala.

41Zakhonza iNkosi uNkulunkulu lezizizwe, zakhonza lezithombe zazo ezibaziweyo; abantwana bazo benza njalo labantwana babantwana babo benza njengokhokho babo kuze kube lamuhla.