Eks 3 - Ndebele Bible (iBhayibhili Elingcwele) 1978

Ukubizwa kukaMose

1UMose wayesalusa izimvu zikaJetro uyisezala, umpristi waseMidiyani; waziqhuba izimvu, wadabula inkangala waze wafika entabeni kaNkulunkulu yaseHorebe.

2Isithunywa seNkosi sabonakala kuye elangabini lomlilo liphuma esihlahleni; wakhangela, wabona isihlahla sivutha umlilo, kodwa isihlahla sasingatshi.Seb 7:30–34

3UMose wathi: Ngizaphambuka ukuba ngibone lokhu okumangalisayo ukuthi isihlahla kasitshi ngani.

4INkosi isibonile ukuthi uphambukile ukuyabona, uNkulunkulu wambiza ephakathi kwesihlahla, wathi: Mose, Mose! Yena wathi: Ngilapha.

5Wathi: Ungasondeli lapha; khupha amanyathelo akho enyaweni zakho, ngoba indawo omi kuyo ingumhlabathi ongcwele.

6Wathi futhi: NginguNkulunkulu kayihlo, uNkulunkulu kaAbrahama, uNkulunkulu kaIsaka, uNkulunkulu kaJakobe. UMose wafihla ubuso bakhe, ngoba wayesesaba ukumkhangela uNkulunkulu.

7INkosi yasisithi: Impela ngibonile ukuhlupheka kwabantu bami abaseGibithe, ngizwile ukukhala kwabo ngenxa yabacindezeli babo; ngiyalwazi usizi lwabo;

8ngehlile ukuba ngibakhulule ezandleni zamaGibithe, ngibakhuphe kulelolizwe, ngibase elizweni elihle elibanzi, ilizwe eligcwele uchago lenyosi, indawo yamaKanani lamaHethi lamaAmori lamaPerizi lamaHivi lamaJebusi.

9Ukukhala kwabakoIsrayeli sekufinyelele kimi; njalo ngibonile ukucindezelwa kwabo ngamaGibithe.

10Woza, ngikuthume kuFaro ukuba ubakhuphe eGibithe abantu bami abakoIsrayeli.

11Kodwa uMose wathi kuNkulunkulu: Ngingubani mina ukuba ngiye kuFaro, ngikhuphe abantu bakoIsrayeli eGibithe na?

12Wathi: Impela ngizakuba lawe; lokhu kuzakuba yisibonakaliso kuwe sokuba ngikuthumile; lapho usubakhuphile abantu eGibithe, lizamkhonza uNkulunkulu kulintaba.

13UMose wathi kuNkulunkulu: Nxa ngifika kubo abakoIsrayeli ngithi: UNkulunkulu wabokhokho benu ungithumile kini; bona bazakuthi kimi: Ngubani ibizo lakhe? ngizakuthini kubo na?Eks 6:2, 3

14UNkulunkulu wathi kuMose: NGINGUYE ENGINGUYE. Wathi futhi: Uzakutsho kwabakoIsrayeli ukuthi: UNGINGUYE ungithumile kini.Isam 1:4, 8

15UNkulunkulu wathi njalo kuMose: Uzakutsho kwabakoIsrayeli ukuthi: INkosi uNkulunkulu wabokhokho benu, uNkulunkulu kaAbrahama, uNkulunkulu kaIsaka, uNkulunkulu kaJakobe ungithumile kini; yilo leli ibizo lami kuze kube nininini, yiso lesi isikhumbuzo sami kuzo zonke izizukulwana.

16Hamba, ubuthanise abalisa bakoIsrayeli, uthi kubo: INkosi uNkulunkulu wabokhokho benu, uNkulunkulu kaAbrahama, uNkulunkulu kaIsaka, uNkulunkulu kaJakobe ubonakele kimi, wathi: Impela ngilikhumbule, ngabona lokho elehlelwa yikho eGibithe;

17ngithi ngizalikhupha ekuhluphekeni kwenu eGibithe, ngilise elizweni lamaKanani lamaHethi lamaAmori lamaPerizi lamaHivi lamaJebusi, ilizwe eligcwele uchago lenyosi.

18Bazalalela ilizwi lakho. Futhi uzakuya enkosini yaseGibithe, wena kanye labalisa bakoIsrayeli, lithi kuyo: INkosi uNkulunkulu wamaHeberu ihlangene lathi; ake usivumele sihambe khathesi ummango wezinsuku ezintathu siye enkangala ukuze sinikele iminikelo eNkosini uNkulunkulu wethu.

19Ngiyazi ukuthi inkosi yaseGibithe kayiyikulivumela lihambe ngaphandle kokuthi ibanjwa ngamandla.

20Ngakhoke ngizakwelula isandla sami ngilitshaye iGibithe ngezimangaliso zami zonke engizakuzenza phakathi kwalo; emva kwalokho izakulivumela lihambe.

21Ngizakunika lababantu umusa emehlweni amaGibithe. Kuzakuthi mhla lisukayo, lingahambi lingaphethe lutho,Eks 12:35, 36

22kodwa ilowo lalowowesifazana uzakucela kumakhelwana wakhe, lakuye ohlala endlini yakhe, izinto eziligugu zesiliva, lezinto eziligugu zegolide, lemvunulo; lizakuzinika amadodana enu lamadodakazi enu; lizakuwaphanga amaGibithe.