Zaga 18 - Ndebele Bible (iBhayibhili Elingcwele) 1978

1Ozihlalela yedwa ufuna eyakhe intando;

uthukutheliswa yizeluleko zonke.

2Isithutha kasithandi ukuqedisisa,

kodwa sithanda kuphela ukuveza ukuthi sibukhali.

3Lapho kukhona ububi, kukhona lokudelela;

lapho kufika indumazo, kufika lehlazo.

4Amazwi omuntu anjengamanzi azikileyo,

lomfula ogobhozayo, lomthombo wokuhlakanipha.

5Kakulunganga ukuba lesihawu komubi,

ukuze avalele olungileyo okufaneleyo.

6Nxa isithutha sikhuluma, sibanga inkani,

ngamazwi aso sibiza ukutshaywa.

7Umlomo wesithutha uyasibhubhisa,

amazwi aso angumjibila kuso.

8Amazwi omuntu onyeyayo anjengezibondlo,

ayaginywa, angene phakathi komuntu.

9Olivila emsebenzini wakhe ungumfowabo womchithi.

10Ibizo leNkosi liyinqaba eqinileyo;

olungileyo ubalekela kuyo alondolozeke.

11Inotho yesinothi ingumuzi waso oqinileyo,

injengomthangala ophakemeyo ekuboneni kwaso.

12Ukuzikhukhumeza kwandulela ukubhujiswa,

kodwa ukuthobeka kwandulela udumo.

13Uba umuntu ephendula engakezwa,

uyisithutha, futhi uyazigcona.

14Umoya womuntu ungamqinisa ekuguleni,

kodwa uba umoya wakhe wephukile, angathwala lokhu kanjani?

15Olengqondo ehlakaniphileyo uzuza ukwazi,

lendlebe yohlakaniphileyo ilalela ukuzuza ukwazi.

16Umuntu onika isipho uzuza amathuba okubonana labakhulu.

17Ekuthetheni icala okhuluma kuqala ubonakala angathi ulungile,

kuze kufike omunye ukumbuzisisa.

18Inkatho ingaqeda ukuxabana,

iqume phakathi kwabalwayo.

19Umzalwane olukhuni unjengomuzi oqinileyo,

lokuxabana kulukhuni njengemigoqo yenqaba.

20Umuntu angasuthiswa yikukhuluma kwakhe,

layizithelo zomlomo wakhe.

21Ulimi lulamandla phezu kokufa lokuphila;

abaluthandayo bazakudla izithelo zalo.

22Othatha umfazi uthola okuhle,

azuze umusa eNkosini.

23Umyanga uyancenga ekukhulumeni kwakhe,

kodwa isinothi siphendula kalukhuni.

24Abanye abangane bangabokubulalana,

kodwa abanye bathembekile kulezelamani.