Hubo 91 - Ndebele Bible (iBhayibhili Elingcwele) 1978

UNkulunkulu ungumvikeli wethu

1Yena owakhileyo ekusithekeni koPhezukonke,

ohlala emthunzini kaSomandla,

2uzakuthi eNkosini: Uyisiphephelo sami lenqaba yami,

uNkulunkulu wami engithemba kuye.

3Ngoba yena uzakukukhulula emjibileni womthiyi,

lakuwo umkhuhlane obhubhisayo.

4Uzakukusibekela ngensiba zakhe,

uphephele ngaphansi kwamaphiko akhe;

ubuqotho bakhe buyisihlangu lehawu.

5Kawuyikwesaba ukwesabeka kwebusuku,

lomtshoko ophaphayo emini,

6lomkhuhlane ohambayo emnyameni,

lokufa okubhubhisayo emini enkulu.

7Bazakuwa abayinkulungwane ngaseceleni kwakho,

labayizinkulungwane ezilitshumi ngakwesokunene sakho;

kodwa wena kawuyikulimala.

8Uzakukhangela nje ngamehlo

ubone ukuphindiselwa kwababi.

9Ngoba uyenzile iNkosi yaba yisiphephelo sakho,

oPhezukonke waba yinqaba yakho,

10kawuyikwehlelwa ngokubi,

lesifo kasiyikusondela emzini wakho.

11Ngoba uzakulaya izithunywa zakhe ngawe,

ukuba zikulondoloze endleleni zakho zonke.

12Zizakukuthwala ngezandla zazo,

ukuze ungakhubeki elitsheni ngonyawo lwakho.

13Uzakunyathela isilwane lebululu,

izilwane lenyoka uzakuzinyathela phansi.

14Ngenxa yokuba ungithanda, ngizakumkhulula;

ngizakumvikela, ngoba uyalazi ibizo lami.

15Lapho ekhuleka kimi, ngizakumphendula;

ngizakuba laye ekuhluphekeni,

ngimkhulule, ngimnike udumo.

16Ngizakumnika insuku ezinengi

ngimtshengise ukukhulula kwami.