Efe 5 - Ndebele Bible (iBhayibhili Elingcwele) 1978

Ukuxwayisa ngemisebenzi yomnyama; ukuhamba ekukhanyeni

1Ngakhoke mlingiseni uNkulunkulu njengabantwana abathandekayo,

2lihambe ngothando, njengalokhu uKristu wasithanda, wazinikela ngenxa yethu, abe ngumnikelo lomhlatshelo olephunga elimnandi kuNkulunkulu.Eks 29:18; Hubo 40:6

3Kodwa ubufebe, lakho konke ukungcola, lomhawu, kakungaphathwa lakanye phakathi kwenu, njengokuba kufanele abangcwele.

4Kakungabi khona amanyala, lokukhuluma okuyize, lokulawula okungcolileyo, okuyizinto ezingafanelanga; kodwa kakube khona ukubonga.

5Yazini lokhu, likuqedisise ukuthi oyisifebe, longcolileyo lolomhawu, okutsho lowo okhonza izithombe, kalalifa embusweni kaKristu lokaNkulunkulu.

6Lingakhohliswa muntu ngamazwi ayize, ngoba ngenxa yalezizinto ulaka lukaNkulunkulu luyehlela phezu kwabantu abangalaleliyo.

7Ngakhoke lingahlangani labo.

8Ngoba lalingumnyama, kodwa khathesi liyikukhanya eNkosini. Hambani njengabantwana bokukhanya,

9ngoba izithelo zokukhanya zikukho konke okulungileyo lokuhle lokuliqiniso.

10Qedisisani okuthandekayo eNkosini.

11Lingahlanganyeli lemisebenzi yomnyama engelazithelo, kodwa ivezeni obala.

12Ngoba kuthelela inhloni ukukhuluma ngezinto ezenziwa yibo ekusithekeni.

13Kodwa konke okuvezwa yikukhanya kuyabonakala; konke okubonakaliswayo kuyikukhanya.

14Ngakhoke kuthiwa:

Phaphama wena oleleyo, uvuke kwabafileyo,

uKristu uzakukukhanyisela.

15Ngakhoke qaphelisisani ukuthi lihamba kanjani, kungabi njengezithutha kodwa njengabahlakaniphileyo,

16lisebenzise wonke amathuba, ngoba insuku zimbi.Kol 4:5

17Ngakhoke lingabi yizithutha, kodwa qedisisani okuyintando yeNkosi.

18Lingadakwa liwayini, ngoba kuvela kukho umsindo lenkanuko ezimbi; kodwa ligcwaliswe nguMoya.

19Khulumisanani ngamahubo langezihlabelo langezingoma, lihlabelele ngokuhlabela okumnandi eNkosini ngenhliziyo zenu zonke,Kol 3:16, 17

20limbonge njalo uNkulunkulu ngakho konke ebizweni leNkosi yethu uJesu Kristu.

21Zehliseleni ngaphansi omunye komunye ngenxa yokuhlonipha uKristu.

Ukuphathana kwabathetheneyo(Kol 3:18—4:1)

22Bafazi, zehliseleni ngaphansi kwamadoda enu, njengokungathi kukuyo iNkosi;Kol 3:18; 1 Pet 3:1

23ngoba indoda iyinhloko yomfazi, njengokuba uKristu eyinhloko yebandla elingumzimba wakhe; yena onguMsilisi wawo.

24Njengokuba ibandla lizehlisele ngaphansi kukaKristu, ngokunjalo labafazi kabazehlisele ngaphansi kwamadoda abo ezintweni zonke.

25Madoda, thandani omkenu, njengoKristu walithanda ibandla, wazinikela ngenxa yalo,Kol 3:19; 1 Pet 3:7

26ukuze azahlukanisele lona, eselihlambulule ngokuligezisa ngamanzi langelizwi,

27ukuze alimise ibandla phambi kwakhe lilenkazimulo, lingelacwatshana, lomxhele loba okunye nje, kodwa libe libandla elingcwele elingelacala.

28Ngokunjalo amadoda afanele ukuthanda omkawo njengemizimba yawo. Othanda umkakhe uyazithanda yena.

29Ngoba kakho owake wazonda umzimba wakhe; kodwa uyawondla, awuphathe kuhle, njengalokhu uKristu esenza kulo ibandla;

30ngoba siyizitho zomzimba wakhe.

31Ngenxa yalokhu indoda izakutshiya uyise lonina, inamathele kumkayo; labo ababili bazakuba nyamanye.Gen 2:24

32Yimfihlakalo enkulu le, kodwa ngikhuluma ngoKristu lebandla.

33Lanike, ilowo lalowo kathande umkakhe njengokuba ezithanda yena, lomfazi kahloniphe indoda yakhe.