Hlu 21 - Ndebele Bible (iBhayibhili Elingcwele) 1978

AbakoBenjamini bazithathela abafazi

1AbakoIsrayeli babefungile eMizipa bathi: Kakukho lamunye wethu ozakwendisela indodakazi yakhe koBenjamini.

2Abantu beza eBetheli, bahlala phambi kweNkosi kwaze kwahlwa, baphakamisa amazwi abo bakhala kakhulu.

3Bathi: Nkosi, Nkulunkulu kaIsrayeli, kubangelwe yini lokhu koIsrayeli ukuba kuphele esinye isizwe koIsrayeli na?

4Kusasa abantu bavuka ekuseni, bakha ialtare lapho, banikela iminikelo yokutshiswa leminikelo yokuthula.

5AbakoIsrayeli bathi: Yisiphi phakathi kwazo zonke izizwe zakoIsrayeli esingezanga emhlanganweni eNkosini na? Ngoba babefungile ngesifungo esikhulu ngalowo ongayikuza eNkosini eMizipa bathi: Uzakubulawa.

6AbakoIsrayeli baba lesihawu ngabakoBenjamini abafowabo bathi: Esinye isizwe siphelile koIsrayeli lamuhla.

7Sizakwenza njani ukuba labo abaseleyo babe labafazi, lokhu sifungile ngeNkosi ukuthi kasiyikubendisela amadodakazi ethu na?

8Bathi: Yisiphi kuzo zonke izizwe zakoIsrayeli esingezanga eNkosini eMizipa na? Kwakungezanga loyedwa kwabaseJabeshi‐Gileyadi emhlanganweni.

9Ngoba kwathi lapho abantu behlanganiswa, kwakungekho muntu waseJabeshi‐Gileyadi lapho.

10Ngakho ibandla laselithumela khona abantu abangamaqhawe abazinkulungwane ezilitshumi lambili, babalaya bathi: Hambani liyebulala abaseJabeshi‐Gileyadi kanye labesifazana labantwana.

11Lizakwenza lokhu; bonke abesilisa labo bonke abesifazana asebake balala lendoda lizababulala, kodwa liyekele izintombi. Benza njalo.

12Bafumanisa kwabaseJabeshi‐Gileyadi izintombi ezingamakhulu amane ezingazanga zilale lendoda, baziletha ezihonqweni eShilo elizweni laseKanani.

13Lonke ibandla lathumela ilizwi kwabakoBenjamini ababesedwaleni laseRimoni, bamemezela ukuthula kibo.

14AbakoBenjamini babuya ngalesosikhathi, babanika abesifazana ababebathethe kwabaseJabeshi‐Gileyadi, kodwa kababanelanga.

15Abantu bamhawukela uBenjamini ngoba iNkosi yayenzile ukwehlukana ezizweni zakoIsrayeli.

16Abadala bebandla basebesithi: Sizakwenza njani ukuba abaseleyo babe labafazi, lokhu abesifazana babulewe koBenjamini na?

17Bathi: Kufanele ukuba kube khona indlalifa kwabaseleyo koBenjamini, ukuba isizwe singapheli koIsrayeli.

18Kanti kasilakwendisela amadodakazi ethu abe ngomkabo, ngoba abakoIsrayeli babefungile bathi: Kaqalekiswe lowo owendisela uBenjamini umfazi.

19Basebesithi: Khangelani, kukhona umkhosi weNkosi weminyaka yonke eShilo elingasenyakatho kweBetheli, ngasempumalanga kwendlela esuka eBetheli isiya eShekema, ngaseningizimu kweLebona.

20Basebesithi kwabakoBenjamini: Hambani liyecathama ezivinini liqaphele;

21lapho amadodakazi eShilo esephuma ukuzagida, liphume ezivinini lonke lizibambele abafazi, beselibaleka lisiya ekhaya elizweni lakoBenjamini.

22Kuzakuthi nxa oyise loba abanewabo befika besola kini, lina lithi kibo: Ake lisivumele siwathathe, ngoba kasibathumbelanga bonke abantu abafazi ekulweni; lani kalisinikanga bona, ngakho kalilacala.

23AbakoBenjamini benza njalo, bazibambela abafazi abalingana lobunengi babo phakathi kwabagidayo, bahamba labo, babuyela elizweni lakibo, bayivusa imizi, bahlala kiyo.

24AbakoIsrayeli basuka lapho ngalesosikhathi, bonke babuyela ezizweni zabo lezindlini zabo lezindaweni zabo.

25Ngalezonsuku kwakungelankosi koIsrayeli. Bonke abantu babezenzela abakuthandayo.