Mat 6 - Ndebele Bible (iBhayibhili Elingcwele) 1978

Intshumayelo yasentabeni isaqhubeka. Ukwenza ukulunga lokukhuleka lokuzila ukudla

1Qaphelani ukuba lingazikhukhumezi phambi kwabantu ngezenzo zenu ezilungileyo lisenzela ukubonwa yibo, funa lingabi lamvuzo kuYihlo osezulwini.Mat 23:5

2Ngakho nxa unika isiphiwo, ungakhalisi uphondo phambi kwakho, njengokwenziwa ngabazenzisi emasinagogeni lasezindleleni ukuba badunyiswe ngabantu. Ngiqinisile ngithi kini: Sebewamukele umvuzo wabo.

3Kodwa wena, nxa unika isiphiwo, isandla sakho sekhohlo kasingakwazi esikwenzayo esokunene sakho

4ukuze isiphiwo sakho sibe sekusithekeni, loYihlo obona ekusithekeni uzakukuvuza.

5Lalapho likhuleka, lingabi njengabazenzisi, ngoba bona bathanda ukukhuleka bemi emasinagogeni lasekuhlanganeni kwendlela ukuze babonwe ngabantu. Ngiqinisile ngithi kini: Sebewamukele umvuzo wabo.Luka 18:10–14

6Kodwa wena, nxa ukhuleka, ngena endlini yakho, uvale umnyango wakho, ukhuleke kuYihlo osensitha; loYihlo obonayo ensitha uzakukuvuza.

7Ekukhulekeni kwenu lingatemelezi njengabezizwe, ngoba bathi bazakuzwiwa ngokukhuluma kwabo okunengi.

8Ngakhoke lingafanani labo; ngoba uYihlo uyakwazi elikuswelayo lingakaceli kuye.

UJesu ufundisa ngokukhuleka(Luka 11:1–4)

9Ngakhoke kalibokhuleka ngokunje lithi:

Baba wethu osezulwini,

kalidunyiswe ibizo lakho,

10umbuso wakho kawuze,

intando yakho kayenziwe,

emhlabeni njengasezulwini.

11Siphe lamhla ukudla kwethu kwensuku ngensuku.

12Usithethelele izono zethu,

njengalokhu lathi sibathethelela abasonayo.

13Ungasingenisi ekulingweni,

kodwa usikhulule ebubini.

[Ngoba umbuso ungowakho,

lamandla, lobukhosi, kuze kube nini lanini. Ameni.]

14Ngoba uba lithethelela abantu izono zabo, loYihlo osezulwini uzakulithethelela lani.Mark 11:25, 26

15Kodwa uba lingathetheleli abantu izono zabo, loYihlo kayikulithethelela izono zenu.

Ukuzila ukudla

16Futhi nxa lizila ukudla linganyukumali njengabazenzisi; ngoba bona bacomba ubuso babo ukuba babonakale ebantwini ukuthi bazilile. Ngiqinisile ngithi kini: Sebewamukele umvuzo wabo.

17Kodwa wena, nxa uzila ukudla, gcoba ikhanda lakho, ugeze ubuso bakho,

18ukuze ungabonakali ebantwini ukuthi uzilile kodwa kuYihlo osekusithekeni; loYihlo obona ekusithekeni uzakukuvuza.

Inotho eqotho lokukhanya okuqotho(Luka 12:33, 34; 11:34–36)

19Lingazibekeli inotho emhlabeni lapho kona khona inondo lokuthomba, lalapho amasela efohlela khona ebe.Jak 5:2–3

20Kodwa zibekeleni inotho ezulwini lapho kungoni inondo lokuthomba khona, lalapho amasela angafohleli khona ebe.

21Ngoba lapho kukhona inotho yakho, lenhliziyo yakho izakuba khona lapho.

22Ilihlo liyisibane somzimba. Uba ilihlo lakho liphilile, umzimba wakho wonke uzakuba lokukhanya.

23Kodwa uba ilihlo lakho lilibi, umzimba wakho wonke uzakuba lomnyama. Ngakho uba ukukhanya okuphakathi kwakho kungumnyama, umnyama mkhulu kangakanani.

24Kakho ongakhonza amakhosi amabili. Ngoba uzakuzonda enye athande enye, ingabe uzakubambelela kwenye adelele enye. Lingekhonze uNkulunkulu lenotho.

Ukukhathazeka, lokuthemba kuNkulunkulu(Luka 16:13; 12:22–31)

25Ngakhoke ngithi kini: Lingaphisekeli ukusila kwenu ukuba lizakudlani lokuba lizakunathani, lomzimba wenu ukuba lizakwambathani. Ukusila kakudluli yini ukudla, lomzimba kawudluli izambatho na?

26Khangelani inyoni zaphezulu ukuba kazihlanyeli, kazivuni, kazibutheli eziphaleni; kanti uYihlo osezulwini uyazondla. Lina kalizidluli kakhulu na?

27Nguwuphi kini ongathi ngokuphisekela engezelele ingalo ibenye ebudeni bakhe na?

28Langezambatho liphisekelani na? Qaphelisani imiduze yeganga ukuthi ikhula kanjani; kayiphothi kayaluki;

29kodwa ngithi kini: LoSolomoni ebucwazicwazini bakhe bonke wayengambathiswanga njengomunye wayo.1 Kho 10:4–7; 2 Lan 9:3–6

30Uba uNkulunkulu esambathisa ngokunjalo utshani beganga, obukhona lamuhla, kusasa buphoswa eziko, kayikulambathisa kakhulu yini lina elilokukholwa okuncinyane na?

31Ngakhoke lingaphisekeli lutho lisithi: Sizakudlani? ingabe: Sizakunathani? loba: Sizakwambathani na?

32Ngoba konke lokhu abezizwe bayakufuna; kodwa uYihlo osezulwini uyazi ukuthi liyakuswela konke lokhu.

33Kodwa funani kuqala umbuso wakhe lokulunga kwakhe; ng’khona lezizinto zonke zizakwengezelelwa kini.

34Ngakho lingaphisekeli ikusasa, ngoba ikusasa izakuziphisekela yona. Inkathazo yosuku yanele lona.