Seb 27 - Ndebele Bible (iBhayibhili Elingcwele) 1978

UPawuli uya eRoma eyisibotshwa

1Kwathi sekuqunyiwe ukuba siye eItaliya ngomkolo, banikela uPawuli lezinye izibotshwa ezithile enduneni yekhulu eyesigaba sikaKesari ethiwa nguJuliyu.

2Sangena emkolweni waseAdramithiyu obusuzakuya endaweni zaseAsiya; uAristako umMakedoniya waseTesalonika wayelathi.

3Kusasa safika eSidoni; uJuliyu wamphatha kuhle uPawuli, wamvumela ukuba aye kubangane bakhe ukuze bamsize bona.

4Sasuka lapho, sagudla iKuprosi, ngoba umoya wawuphambene lathi.

5Sesidabule ulwandle olungaseKilikhiya lasePamfiliya safika eMira elaseLikhiya.

6Laphoke induna yekhulu yafumana umkolo waseAleksandriya oya eItaliya, yasikhwelisa kuwo.

7Sahamba kancinyane insuku ezinengi, safika kanzima ngaseKinidu; umoya ungasivumeli, sagudla iKrete maqondana leSalamone,

8saligudla ngokunzima, safika endaweni ethiwa yiMathekumahle; eduze layo kukhona umuzi waseLaseya.

9Kwathi sekudlule isikhathi eside, sekuyingozi ukuhamba ngomkolo, ngoba isikhathi seZilo sasesedlule, uPawuli wabeluleka,

10wathi: Madoda, ngiyabona ukuthi loluhambo luzakuba lengozi lomonakalo omkhulu, kungasiwo owempahla lomkolo kuphela kodwa lokusila kwabantu.

11Kodwa induna yekhulu yalalela induna yomkolo lomnikazi wawo kulalokho okutshiwo nguPawuli.

12Njengokuba itheku lalingalungelanga ukuhlala kulo ebusika, ubunengi babo baluleka ukuba kusukwe lapho, mhlawumbe kwenzeke ukuba bafinyelele eFenikisi, itheku laseKrete elikhangele intshonalanga yasenyakatho lentshonalanga yaseningizimu, bahlale khona ebusika.

13Kuthe umoya waseningizimu usuphephetha kuhle, banakana ukuthi sebekuzuzile lokho ababekuqondile, bawukhulula umkolo, sasuka sagudla eKrete.

14Kodwa ngemva kwesikhatshana kwavuka umoya othiwa iYurakilo oyisivunguzane, watshaya uvelela ngasemhlabeni;

15umkolo wabanjwa yiwo, wehluleka ukukhangelana lomoya, sasesiwuyekela undenda.

16Sathi sesigudla isihlengana esithiwa yiKlawuda, sawubamba umkodlwana womkolo kalukhuni;

17sebewuphanyekile, basebenzisa amagoda ukuwubopha umkolo ukuze uqine; besesaba ukuthi bazakutshayeka emhlabathini othiwa yiSirti, behlisa isayili, basebendenda nje.

18Kuthe ukuba siphoswe kakhulu yisiphepha, kusasa bachitha umthwalo;

19kwathi ngolwesithathu balahla impahla zomkolo ngezandla zabo.

20Kwathi ilanga lenkanyezi kungasabonakali insuku ezinengi, lesiphepha esikhulu siqinisa njalo, laseliphela ithemba lonke lokuba sizakusila.

21Sekuyisikhathi eside bengasadli, uPawuli wasukuma phakathi kwabo, wathi: Madoda, ngabe lalalela mina, kalaze lasuka eKrete, laphepha kulingozi lakulumonakalo.

22Khathesike sengileluleka ukuba lime isibindi, ngoba kakuyikufa muntu kini, kodwa umkolo wodwa.

23Ngoba ngalobubusuku bekumi kimi isithunywa sikaNkulunkulu engingowakhe lengimkhonzayo,

24sathi: Ungesabi, Pawuli; ngoba umele ukuma phambi kukaKesari. Khangela, uNkulunkulu ukuphile bonke labo abahamba lawe.

25Ngakhoke manini isibindi, madoda; ngoba ngiyakholwa kuNkulunkulu ukuthi kuzakuba njengalokho engikutsheliweyo.

26Kodwa sizakutshayeka esihlengeni esithile.

27Kwathi sekufike ubusuku betshumi lane, sisandenda olwandle lwaseAdriya, phakathi kobusuku abomkolo bakhumbula ukuthi sebesondela emhlabathini.

28Basebephosa intambo yokulinganisa, bafumana kuyizingalo ezingamatshumi amane ukutshona; sebeqhubekile kancinyane bayiphosa futhi, bafumana kuyizingalo ezingamatshumi amathathu ukutshona;

29sesaba ukuthi mhlawumbe singatshayeka emadwaleni, basebesehlisa ingwegwe ezinkulu ezine ngemuva, basebelindela ukusa.

30Abomkolo sebefuna ukubaleka emkolweni, behlisela olwandle umkodlwana ngokungathi behlisa ingwegwe ngaphambi komkolo,

31uPawuli wathi enduneni yekhulu lakwabebutho: Uba laba bengahlali emkolweni, lingesiliswe lina.

32Abebutho basebequma amagoda omkodlwana, bawuyekela wawa.

33Kwathi sekuzakusa, uPawuli wabancenga bonke ukuba badle esithi: Lamuhla kulusuku lwetshumi lane lilindile lihlezi lingadli.

34Ngakhoke ngiyalincenga ukuba lidle, ngoba kuzakulinika amandla lokhu; kakuyikonakala lolulodwa unwele komunye wenu.

35Esetshilo lokhu wathatha isinkwa, esebongile uNkulunkulu phambi kwabo bonke, wasihlephula, waqala ukudla.

36Basebesima isibindi bonke, badla labo.

37Thina sonke esasisemkolweni sasingabantu abangamakhulu amabili lamatshumi ayisikhombisa lesithupha.

38Sebedlile basutha baphungula umkolo ngokuphosela olwandle amabele.

39Sekusile, kabalazanga ilizwe, kodwa babona itheku elilesihlabathi, bamisa ukuba baqhubele umkolo kulo, uba kungenzeka.

40Basebequma ingwegwe, baziyekela olwandle, bathukulula lamagoda abophe amaphini okuqondisa umkolo, baphakamisela emoyeni amasayili angaphambili, baqonda okhunjini.

41Bafika endaweni lapho amanzi ahlangana khona, bawuqhubela umkolo esihlabathini, isihloko sawo sagxumekeka, sema singanyikinyeki, kodwa ingemva yomkolo yaphulwa ngamavinqo.

42Abebutho babeqonde ukubulala izibotshwa, funa ezinye zibaleke ngokuhlamba;

43kodwa induna yekhulu ifisa ukusilisa uPawuli yabavimbela ukwenza lokho ababekuqondile, yalaya ukuba labo abakwaziyo ukuhlamba baziphosele kuqala olwandle, baye emhlabathini,

44abaseleyo balandele, abanye ngengodo, labanye ngencezu zomkolo. Ngokunjaloke kwenzeka ukuba bonke bafinyelele emhlabathini besilile.