Nani 9 - Ndebele Bible (iBhayibhili Elingcwele) 1978

Ukugcina iPhasika

1INkosi yakhuluma loMose enkangala yaseSinayi, ngenyanga yokuqala yomnyaka wesibili emva kokuphuma kwabo eGibithe,Eks 12:1–13

2yathi: Abantu bakoIsrayeli kabagcine iPhasika ngesikhathi salo esimisiweyo.

3Ngosuku lwetshumi lane lwenyanga le, kusihlwa, lizakuligcina, ngoba kuyisikhathi salo esimisiweyo; uligcine ngokwezimiso zalo langokwemithetho yalo.

4Ngakhoke uMose watshela abantu bakoIsrayeli ukuthi kumele ukuba bagcine iPhasika.

5Bagcina iPhasika enkangala yaseSinayi, ngenyanga yokuqala, ngosuku lwetshumi lane lwenyanga, kusihlwa.

6Kwakukhona amadoda athile ayengahlambulukanga ngoba ayethinte isidumbu, ayengelakugcina iPhasika ngalolosuku. Eza phambi kukaMose loAroni ngalolosuku,

7athi kubo: Thina kasihlambulukanga ngoba sithinte isidumbu; sivinjelelwani ukunikela umnikelo weNkosi ngesikhathi sawo esimisiweyo phakathi kwabakoIsrayeli na?

8UMose wathi kuwo: Manini, ukuze ngizwe ukuthi iNkosi izakuthini ngani.

9INkosi yathi kuMose:

10Tshono ebantwini bakoIsrayeli uthi: Uba kukhona phakathi kwenu umuntu loba owenzalo yenu ongcoliswe yikuthinta isidumbu, loba osekuhambeni, kumele ukuba agcine iPhasika leNkosi.

11Abanjalo bazakuligcina ngenyanga yesibili, ngosuku lwetshumi lane, kusihlwa; bazakulidla lesinkwa esingelamvubelo lemibhida ebabayo.

12Kabayikutshiya lutho kuze kube sekuseni, bangephuli thambo lalo; bazakuligcina ngokwezimiso zonke zePhasika.Eks 12:46; Joha 19:36

13Kodwa lowo ohlambulukileyo, ongekho ekuhambeni owala ukugcina iPhasika, uzakukhutshwa ebantwini bakibo, ngoba kanikelanga umnikelo weNkosi ngesikhathi sawo esimisiweyo; lowo uzakuthwala isono sakhe.

14Uba kuhlala phakathi kwenu owemzini othanda ukugcina iPhasika leNkosi ngokwesimiso sePhasika langokomthetho walo, kenze njalo. Lizakuba lesimiso sibe sinye kowemzini lakowokuzalwa elizweni.

Iyezi elaliphezu kweTabernakeli

15Ngosuku iTabernakeli elamiswa ngalo, iyezi lasibekela iTabernakeli, ithente lobufakazi; kusukela kusihlwa kwaze kwaba sekuseni laliphezu kweTabernakeli likhanya njengomlilo.

16Ngakho iyezi lalisibekela ithente sonke isikhathi, libonakale linjengomlilo ebusuku.

17Kwakuthi lapho iyezi lisuka phezu kwethente labantu bakoIsrayeli basuke; lasendaweni lapho iyezi lima khona, labo bamise khona.

18Abantu bakoIsrayeli bahamba, njalo bamisa, njengokulaya kweNkosi. Bahlala ezihonqweni ngesikhathi sonke iyezi elalihlala ngaso phezu kweTabernakeli.

19Lalapho iyezi lihlala phezu kweTabernakeli insuku ezinengi, abakoIsrayeli bayilalela iNkosi, kabahambanga.

20Kwakunjalo lalapho iyezi laliphezu kweTabernakeli insuku ezilutshwana nje; njengokulaya kweNkosi bahlala ezihonqweni; futhi bahamba njengokulaya kwayo.

21Ngesinye isikhathi iyezi lahlala kusukela kusihlwa kwaze kwaba sekuseni kuphela; lapho iyezi lisuka ekuseni, babehamba. Futhi uba iyezi lalihlala emini lebusuku, ekusukeni kwalo babehamba.

22Uba iyezi lalihlala phezu kweTabernakeli insuku ezimbili, loba inyanga, loba umnyaka, abakoIsrayeli bahlala ezihonqweni, kabahambanga. Kodwa lapho lisuka, babehamba.

23Ngokulaya kweNkosi bamisa, langokulaya kwayo bahamba; balalela ilizwi leNkosi eyabalaya lona ngoMose.