Jer 49 - Ndebele Bible (iBhayibhili Elingcwele) 1978

Ilizwi ngamaAmoni

1Mayelana lamaAmoni.

INkosi ithi: UIsrayeli kalamadodana na?

Kalayo indlalifa na?

Abakhonza uMilkomu bathathelani ilizwe lakoGadi,

bahlale emizini yalo na?

2Ngakhoke insuku ziyeza, kutsho iNkosi,

lapho ngizakwenza ukuba kuhlatshwe umkhosi wempi ngeRaba elamaAmoni.

Lizachitheka, lemizi yalo itshiswe ngomlilo;

loIsrayeli alithathe futhi ilizwi lakhe kulabo abamamukayo, kutsho iNkosi.

3Lila, Heshiboni, ngoba iAyi lichithekile.

Khalani, lina besifazana baseRaba.

Ligqoke izambatho zokulila, lilile,

lizisike ngezingqamu;

ngoba uMilkomu uzathunjwa kanye labapristi bakhe lezikhulu zakhe.

4Lizincomelani ngenotho yenu, lina elingathembekanga,

elilenotho ephelayo, elithemba amandla enu lisithi:

Ngubani ongasihlasela na?

5Khangelani, ngizakwehlisela ukwesaba okukhulu phezu kwenu, kutsho iNkosi, uNkulunkulu wamabandla,

kuvela kubo bonke abaseduze lani,

lizaxotshwa, kube yilowo lalowo ngendlela yakhe,

kungabi khona obutha abaphunyukileyo.

6Kodwa emva kwalokho ngizabuyisa abantu baseAmoni, kutsho iNkosi.

Ilizwi ngeEdoma

7Mayelana leEdoma.

INkosi yamabandla ithi: Kakusekho yini ukuhlakanipha eTemani?

Amacebo aphelile kwabaqondileyo na?

Ukuhlakanipha kwabo kuphelile na?

8Balekani, libuyele emuva,

licatshe endaweni eziminyeneyo, lina bahlala eDedani.

Ngoba ngizakwehlisela inhlupheko phezu kukaEsawu ngesikhathi sokumtshaya kwami.

9Uba abavuna amavini befika kuwe, kabayikutshiya ingcosana na?

Uba amasela efika ebusuku, kawayikuphanga aze azikholise na?

10Kodwa uEsawu ngimhlubule waze wasalaze,

ngizambule indawo zakhe zokucatsha, kaselakho ukucatsha.

Abantwana bakhe babulewe, labazalwane bakhe kanye labomakhelwana bakhe;

yena kasekho.

11Tshiya izintandane zakho, ngizazilondoloza,

abafelwakazi bakho kabathembe kimi.

12Ngoba iNkosi ithi: Uba labo ababengafanele ukuyinatha inkezo yokwahlulelwa bemele ukuyinatha, wena uzayekelwa ungatshaywa na? Kawuyikuyekelwa, kodwa lawe uzakuyinatha.

13Ngoba ngizifungile mina uqobo, kutsho iNkosi, ukuba iBozira lizakuba yinto eyesabekayo, into yokuhlekwa, lenkangala, lento yokuthukwa, lemizi yalo yonke izahlala iyinkangela kokuphela.

14Ngizwile imibiko evela eNkosini,

lesithunywa sithunyiwe phakathi kwezizwe,

ukuthi: Buthanani, lilihlasele, lisuke liyekulwa.

15Ngoba ngizakukwenza ube mncinyane phakathi kwezizwe,

udeleleke phakathi kwabantu.

16Ukwesabeka kwakho kukukhohlisile,

kanye lokuziqhenya kwenhliziyo yakho,

wena ohlala ezingoxweni zamawa, lobamba ingqonga yentaba.

Loba usakha isidleke sakho endaweni ephakemeyo njengokhozi,

ngizakukwehlisa khona, kutsho iNkosi.

17IEdoma lizakuba yinto eyesabekayo; wonke umuntu odlula kulo uzakwethuka, ancife ngenxa yakho konke ukuhlupheka kwalo.

18Njengasekuchithekeni kweSodoma leGomora, kanye lemizi yakhona, kutsho iNkosi, kakuyikwakha muntu khona, ahlale khona.

24IDamaseko selibuthakathaka, liphenduke ukuba libaleke,

lifikelwe yibugwala, ukudabuka losizi kulehlele njengowesifazana ohelelwayo.

25Yeka ukutshiywa komuzi olodumo, umuzi olokuthokoza!

26Ngakhoke insizwa zawo zizawela emagumeni awo,

lawo wonke amabutho awo azabhujiswa ngalolosuku, kutsho iNkosi yamabandla.

27Ngizaphemba umlilo emdulini waseDamaseko,

ozaqothula inqaba zikaBenihadadi.

Ilizwi ngeKedari leHazori

28Mayelana leKedari lemibuso yaseHazori owayinqobayo uNebukadineza inkosi yaseBabiloni.

INkosi ithi: Sukani, liqonde eKedari,

libachithe abantu basempumalanga.

29Thathani amathente abo lemihlambi yabo,

kanye lamaveli abo lempahla yabo yonke,

lisuse amakamela abo kibo;

abantu bazamemeza kibo bathi: Ukwesaba kunxa zonke.

30Balekani, lizulazule khatshana, lihlale endaweni eziminyeneyo,

lina bahlala eHazori, kutsho iNkosi.

Ngoba uNebukadineza inkosi yaseBabiloni wenze icebo ngani,

kukhona lokho athanda ukukwenza kini.

31Sukani, liqonde kuso isizwe esichelesileyo,

esihlala ngokuthula, kutsho iNkosi,

esingelamasango lemigoqo, esizihlalele sodwa.

32Amakamela aso azakuba yimpango,

lemihlambi yaso yenkomo izaphangwa.

Ngizabachithachitha bonke abagela inwele zabo emaceleni,

ngibehlisele inkathazo evela inxa zonke, kutsho iNkosi.

33IHazori lizakuba yindawo yamakhanka,

libe yinkangala kokuphela,

kakuyikwakha muntu khona, ahlale khona.

Ilizwi ngeElamu

34Ilizwi leNkosi elafika kuJeremiya umprofethi mayelana leElamu ekuqaleni kokubusa kukaZedekiya, inkosi yakoJuda, lathi:

35INkosi yamabandla ithi: Khangela, ngizakwaphula umtshoko weElamu, obanika amandla amakhulu;

36ngehlisele phezu kweElamu imimoya emine evela engonsini ezine zaphezulu, ngibahlakazele abaseElamu kuyo yonke leyomimoya; kakuyikuba khona isizwe lesisodwa abangeyikuxotshelwa kuso abaseElamu.

37Ngizakwenza abaseElamu besabe phambi kwezitha zabo laphambi kwalabo ababazingelayo; ngizabehlisela okubi, lolaka lwami oluvuthayo, kutsho iNkosi, ngibalandelisele ngomkhonto, ngize ngibaqede.

38Ngizamisa isihlalo sami sobukhosi eElamu, ngichithe inkosi yabo lezikhulu zabo, kutsho iNkosi.

39Kodwa kuzakuthi ensukwini ezizayo ngibabuyise abantu baseElamu, kutsho iNkosi.