Hos 4 - Ndebele Bible (iBhayibhili Elingcwele) 1978

1Zwanini ilizwi leNkosi, lina bakoIsrayeli,

ngoba iNkosi imangalela abakhileyo elizweni.

Kakukho ukuthembeka lomusa lokumazi uNkulunkulu elizweni.

2Kukhona ukwaphulwa kwezifungo, lokuqamba amanga,

lokubulala, lokweba, lokufeba;

baqhubeka ngokwenza okubi, lamacala egazi ayalandelana.

3Ngakhoke ilizwe liyalila,

labo bonke abahlala kilo baphela amandla,

kanye lenyamazana zeganga lenyoni zaphezulu,

lenhlanzi zolwandle ziyaphela.

4INkosi ithi: Kakungabi khona umuntu owethwesa omunye icala,

lomangelela omunye,

ngoba mina ngizakukwethwesa icala, wena mpristi.

5Uzakhubeka emini lebusuku,

umprofethi uzakhubeka kanye lawe;

uyasibulala isizwe sakini.

6Abantu bami bayabhubha ngokuswela ukwazi;

ngoba ukwalile ukwazi,

lami ngizakukwala, ungabi ngumpristi wami.

Lokhu usuwukhohliwe umlayo kaNkulunkulu wakho,

lami ngizakhohlwa abantwana bakho.

7Ngokwanda kwabapristi kuyanda lokona kwabo kimi.

Udumo lwabo ngizaluphendula lube lihlazo.

8Badla izono zabantu bami, bayizihwaba zobubi babo.

9Abapristi labantu bazaphathwa ngokufananayo,

ngizakubatshaya ngenxa yendlela zabo,

ngibaphindisele ngenxa yezenzo zabo.

10Bazakudla, kodwa bangasuthi;

bazawula, kodwa bangandi;

ngoba bawulile ngokudela iNkosi.

11Iwayini elidala lelitsha liyaqeda ukuqedisisa kwabantu bami;

12bayacela izeluleko esigodweni,

lentonga yabo iyabeluleka.

Ngoba umoya wokuwula ubaduhisile,

bawulile ngokutshiya uNkulunkulu wabo.

13Benza imihlatshelo engqongeni zentaba,

banikela iminikelo phezu kwamaqaqa,

ngaphansi kwezihlahla ezinkulu,

langaphansi kwemikhaya emhlophe.

Langaphansi kwezihlahla ezinkulu lezilamahlamvu

ngoba zilemithunzi emihle.

Ngakhoke amadodakazi enu ayawula,

labalobokazi benu bayafeba.

14Kangiyikuwatshaya amadodakazi enu nxa ewula,

labalobokazi benu nxa befeba;

ngoba lamadoda lawo ahamba lamawule,

enze imihlatshelo yawo kanye lezifebe zasethempelini;

abantu abangelakuqedisisa bazabhubha.

15Loba wena Israyeli uwula,

uJuda kangabi lacala.

Lingangeni eGiligali, lingayi eBeti‐Aveni,

lingafungi lithi: Sifunga iNkosi.

16UIsrayeli ulenkani njengethokazi elihlanyayo;

iNkosi izakubelusela edlelweni elibanzi njengamawundlu na?

17UEfrayimi uzihlanganisile lezithombe

18lexuku lezidakwa, bazinikela ekuwuleni,

bethanda ihlazo ukwedlula udumo lwabo.

19Umoya uzabakhukhula, ubagoqele ngempiko zawo,

ama‐altare abo azabalethela ihlazo kuphela.