Jer 3 - Ndebele Bible (iBhayibhili Elingcwele) 1978

1INkosi ithi: Uba indoda isahlukana lomkayo,

abesesiba ngowenye indoda,

isazakumbuyisa na?

Lelolizwe belingayikungcoliswa kakhulu na?

Kanti wena usufebile lezithandwa ezinengi,

usabuya kimi na? kutsho iNkosi.

2Phakamisela amehlo akho emadundulwini angelalutho, ubone.

Kungaphi lapho ungalalelwanga khona na?

Ngasezindleleni wahlalela izithandwa njengomArabiya enkangala.

Ulingcolisile ilizwe ngobufebe bakho obubi.

3Ngenxa yalokho izihlambo zinqandiwe,

lezulu lentwasa kalinanga.

Kanti ulesibindi sesifebe, kawulanhloni.

4Kawusand’ ukumemeza kimi yini ukuthi:

Baba, wena ungumngane wobutsha bami?

5Uzahlala uthukuthele njalonjalo,

elolaka kuze kube sekucineni na?

Utsho njalo wena, kodwa uphikilele ukwenza konke okubi.

UIsrayeli loJuda bacelwa ukuphenduka

6INkosi yathi kimi ensukwini zenkosi uJosiya: Ubonile okwenziwe nguIsrayeli ongathembekanga na? Ukhwelile kuzo zonke intaba, langaphansi kwezihlahla zonke eziluhlaza uphingile khona.2 Kho 22:1—23:30; 2 Lan 34:1—35:27

7Ngathi uzabuya kimi esekwenzile konke lokhu; kodwa kabuyanga, lodadewabo ongathembekanga uJuda wakubona lokho.

8Wabona ukuthi ngenxa yobufebe bonke bukaIsrayeli ongathembekanga, ngamxotsha ngamnika lencwadi yesahlukaniso; kodwa udadewabo ongathembekanga uJuda kesabanga, laye wasuka wafeba.

9Ngoba ubufebe babuyinto elula kuye wangcolisa ilizwe ngokufeba kwakhe langokukhonza amatshe lezihlahla.

10Kodwa kukho konke lokho udadewabo ongathembekanga uJuda kabuyanga kimi ngenhliziyo yonke, kuphela ngokuzenzisa nje, kutsho iNkosi.

11INkosi yathi kimi: UIsrayeli ongathembekanga ungcono kuloJuda okhohlisayo.

12Hamba uyememezela lamazwi ngasenyakatho uthi:

Buya wena Israyeli ongathembekanga, kutsho iNkosi.

Kangiyikukuthukuthelela, ngoba ngilesihawu, itsho iNkosi.

Kangiyikuthukuthela kokuphela.

13Vuma kuphela icala lakho ukuthi uyihlamukele iNkosi uNkulunkulu wakho,

wakhonza onkulunkulu bezizweni ngaphansi kwazo zonke izihlahla eziluhlaza,

lokuthi kawulalelanga ilizwi lami, kutsho iNkosi.

14Buyani, bantwana abangathembekanga, kutsho iNkosi; ngoba ngiyinkosi yenu. Ngizalithatha, abe munye emzini, babe babili kulo usendo, ngililethe eZiyone.

15Ngizalinika abelusi abathandekayo kimi, abazalalusa ngokwazi langokuhlakanipha.

16Kuzakuthi lapho selandile laba banengi elizweni, ngalezonsuku kabasayikukhuluma ngomtshokotsho wesivumelwano seNkosi, kutsho iNkosi. Kakusayikucatshangwa ngawo, kawusayikukhunjulwa, kawusayikukhalelwa, kakusayikwenziwa omunye.

17Ngalesosikhathi iJerusalema lizakuthiwa yisihlalo sobukhosi seNkosi; zonke izizwe zizabuthana khona, phambi kweNkosi eJerusalema; kazisayikulandela inhliziyo zazo ezilenkani.

18Ngalezonsuku indlu yakoJuda izahlangana lendlu yakoIsrayeli, ziphume kanyekanye elizweni lasenyakatho, zize elizweni engalinika okhokho benu ukuba libe ngelabo.

19Mina bengisithi ngizakukubeka njani phakathi kwabantwana bami,

ngikunike ilizwe elihle,

ilizwe elihle kakhulu phakathi kwazo zonke izizwe.

Ngathi uzakungibiza ngokuthi Baba,

ungadeli ukungilandela.

20Impela, njengomfazi ongathembekanga etshiya umkakhe,

lawe ungikhohlisile, wena ndlu kaIsrayeli, itsho iNkosi.

21Ilizwi liyezwakala emadundulwini angelalutho,

elokukhala lokukhuleka kwabantwana bakoIsrayeli,

ngoba beyonile indlela yabo,

bayikhohlwa iNkosi uNkulunkulu wabo.

22Buyani, lina bantwana abangathembekanga.

Ngizakwelapha ukungathembeki kwenu.

Lithi: Siyeza kuwe, ngoba wena uyiNkosi uNkulunkulu wethu.

23Impela ukukhonza phezu kwezintaba kakusizi lutho kanye lomsindo wakhona.

Impela ukukhululwa kukaIsrayeli kuseNkosini uNkulunkulu wethu.

24 UBali, into elehlazo iqedile wonke umsebenzi wabokhokho kusukela ebutsheni bethu, izimvu zabo lenkomo zabo, amadodana abo lamadodakazi abo.

25Asilale phansi silenhloni, sibanjwe zinhloni zethu; ngoba sonile eNkosini uNkulunkulu wethu, thina labokhokho, kusukela ebutsheni bethu kuze kube lamuhla; kasilalelanga ilizwi leNkosi uNkulunkulu wethu.