2 Kho 22 - Ndebele Bible (iBhayibhili Elingcwele) 1978

UJosiya lencwadi yomlayo

1UJosiya wayeleminyaka eficaminwembili lapho eqalisa ukubusa; wabusa iminyaka engamatshumi amathathu lanye eJerusalema. Ibizo likanina lalinguJedida indodakazi kaAdaya waseBozikathi.Jer 3:6

2Wenza okulungileyo phambi kweNkosi, walandela zonke indlela zikaDavida ukhokho wakhe, kaze aphambukela ngakwesokunene langakwesokhohlo.

3Ngomnyaka wetshumi lesificaminwembili wokubusa kwakhe uJosiya inkosi wathuma uShafani indodana kaAzaliya kaMeshulamu, umabhalane, ukuba aye ethempelini, wathi kuye:2 Lan 34:8–28

4Hamba uye kuHilikiya umpristi omkhulu ukuba abale imali esilethiwe ethempelini, eyaqoqwa ebantwini ngabalindi beminyango,

5ayinike abaphathi bezisebenzi abagcina ithempeli ukuba bahlawule izisebenzi ezilungisa indlu,

6ababazi, labakhi, labakha ngamatshe, lokuba bathenge ngayo amapulanka lamatshe abaziweyo ukuyilungisa indlu;

7kodwa angabaceli ukubika ngokusetshenziswa kwemali abayinikiweyo ngoba bathembekile.

8UHilikiya umpristi omkhulu wathi kuShafani umabhalane: Sengifumene incwadi yomlayo ethempelini. UHilikiya wasemnika incwadi, yena wayibala.

9UShafani umabhalane waya enkosini, wayibikela wathi: Inceku zakho seziyikhuphile imali eyayisethempelini, zayinikela kubaphathi bezisebenzi abagcina indlu.

10UShafani umabhalane wasebika enkosini esithi: UHilikiya umpristi unginike incwadi. Waseyibala phambi kwenkosi.

11Kwathi inkosi isizwile amazwi encwadi yomlayo, yadabula izigqoko zayo.

12Yasilaya uHilikiya umpristi loAhikamu indodana kaShafani loAkibori indodana kaMikaya loShafani umabhalane, loAsaya inceku yenkosi, yathi:

13Hambani liyesibuzela eNkosini uNkulunkulu mina labantu laye wonke uJuda mayelana lamazwi alincwadi efunyenweyo; ngoba iNkosi isithukuthelele kakhulu ngenxa yabokhokho bethu abangawalalelanga amazwi alincwadi, ukuba benze konke okulotshiweyo kiyo.

14Ngakho uHilikiya umpristi loAhikamu loAkibori loShafani loAsaya baya kuHulida umprofethikazi umkaShaluma indodana kaTikiva kaHarihasi, umgcini wezigqoko. UHulida wayehlala eJerusalema esigabeni sesibili. Bakhuluma laye.

15Yena wathi kibo: INkosi, uNkulunkulu kaIsrayeli, ithi ngilitshele ukuba litshele lowomuntu olithumele kimi,

16ukuthi iNkosi ithi: Ngizakwehlisela okubi kulindawo lakubo bonke abakhileyo kiyo, konke okutshiwo ngamazwi encwadi inkosi yakoJuda eyibalileyo.

17Ngoba bangidelile, batshisela abanye onkulunkulu impepha, ukuba bangithukuthelise ngazo zonke izithombe zabo. Ngakho intukuthelo yami izakuvutha ngalindawo, ingadedi.

18Kodwa mayelana lenkosi yakoJuda elithumileyo ukubuza eNkosini lizakuthi kuyo: INkosi, uNkulunkulu kaIsrayeli. ithi:

19Njengoba uzwile amazwi ami, lenhliziyo yakho idabukile, wazithoba phambi kwami nxa usizwa engikutshoyo ngalindawo langabakhileyo kiyo ukuba bazakuchitheka babe yisiqalekiso, wadabula izigqoko zakho, wakhala phambi kwami, ngakho lami ngikuzwile, kutsho iNkosi;

20ngalokhoke uzambelwa kubokhokho bakho, ungcwatshwe elibeni lakho ngokuthula, kawuyikububona bonke ububi engizabehlisela phezu kwalindawo. Bayibikela inkosi.