Levi 11 - Ndebele Bible (iBhayibhili Elingcwele) 1978

Inyamazana ezihlambulukileyo lezingcolileyo

1INkosi yathi kuMose loAroni:Dute 14:3–21

2Tshonini ebantwini bakoIsrayeli lithi: Nanzi izinto eziphilayo elingazidla kuzo zonke inyamazana zasemhlabeni.

3Zonke inyamazana esilamangqina ehlukeneyo lezetshisayo lingazidla.

4Kodwa kuzo ezetshisayo lezilamangqina ehlukeneyo lingadli ikamela, ngoba liyetshisa, kodwa kalilamangqina ehlukeneyo; lingcolile kini.

5Lingadli lembila, ngoba iyetshisa, kodwa kayilamangqina ehlukeneyo; ingcolile kini.

6Lingadli lomvundla, ngoba uyetshisa, kodwa kawulamangqina ehlukeneyo; ungcolile kini.

7Lingadli lengulube, ngoba ilamangqina ehlukeneyo, kodwa kayetshisi; ingcolile kini.

8Lingabokudla inyama yazo, lingathinti izidumbu zazo; zingcolile kini.

9Kuzo zonke ezihamba emanzini lingadla zonke ezilamaphiko lamaxolo, ezisolwandle lezisemifuleni.

10Kodwa zonke ezisolwandle lezisemifuleni ezingelamaphiko lamaxolo, phakathi kwazo ezihamba ngamaxuku emanzini laphakathi kwezinye eziphilayo, zingcolile kini.

11Zizakuhlala zingcolile kini; lingadli inyama yazo; izidumbu zazo zizakunengeka kini.

12Zonke ezihamba emanzini ezingelamaphiko lamaxolo ziyisinengiso kini.

13Nanzi inyoni ezizakunengeka kini; kaziyikudliwa ngoba ziyisinengiso; ukhozi lelinqe lengqungqulu,

14lomzwazwa, lezinhlobo zonke zabomahelwane,

15zonke inhlobo zamawabayi,

16intshe, lomandukulu, lenkanku, lezinhlobo zonke zenkozi,

17isikhova, lenyonga,

18isikhova esibamba inhlanzi, levuba, lelinqe elikhulu,

19lengabuzane, lenhlobo zonke zamahemu, lemvenduna, lolulwane.

20Zonke izibungu ezilamaphiko ezihamba ngezinyawo zazo ziyisinengiso kini.

21Kodwa kuzo izibungu ezilamaphiko ezihamba ngenyawo zazo lingadla lezo ezilemilenze ezeqa ngayo emhlabathini;

22kuzo lingadla isikhongwane ngenhlobo zaso, lonyelele ngenhlobo zakhe, lamadiye ngenhlobo zawo, lezintethe ngenhlobo zazo.

23Kodwa zonke ezinye izibungu ezilamaphiko lenyawo ezine ziyisinengiso kini.

24Lingangcoliswa yizo; bonke abathinta izidumbu zazo bazahlala bengcolile kuze kuhlwe.

25Ophatha ulutho lwezidumbu zazo uzakugezisa ingubo zakhe, abe ngongcolileyo kuze kuhlwe.

26Zonke inyamazana ezilamangqina ehlukeneyo, kodwa zingetshisi, zingcolile kini; bonke abazithintayo bazakungcola.

27Zonke inyamazana ezihamba ngenyawo zazo zozine zingelamangqina zingcolile kini; bonke abathinta izidumbu zazo bazakuhlala bengcolile kuze kuhlwe.

28Othwala izidumbu zazo uzagezisa ingubo zakhe, abe ngongcolileyo kuze kuhlwe; zingcolile kini.

29Futhi lezi ezinanakazana ezihamba emhlabathini zingcolile kini; ubuchakide, legundwane, legwababa ngenhlobo zalo,

30lontulo, lembulu, lombankwa, lesiqhuza, lonwabu.

31Yizo ezingcolile kini phakathi kwazo ezincinyane; bonke abazithintayo sezifile bazakuhlala bengcolile kuze kuhlwe.

32Konke esiwela phezu kwakho esinye sazo sesifile kuzakuba ngokungcolileyo, loba kuyinto eyenziwe ngesihlahla, loba kuyisambatho, loba kuyisikhumba, loba kulisaka, ingabe isitsha esisetshenziswayo; kakufakwe emanzini, kuhlale kungcolile kuze kuhlwe; emva kwalokho kuzakuhlambuluka.

33Uba esinye sazo siwela embizeni yebumba, konke okukiyo kuzakuba ngokungcolileyo, liyibulale.

34Ukudla okudliwayo okukiyo okuthelwe ngamanzi kuzakuba ngokuncolileyo; lalokho okunathwayo okusembizeni ezinje kuzakuba ngokungcolileyo.

35Konke eziwela kukho izidumbu zazo kuzakuba ngokungcolileyo; loba kuliziko, loba yisitofu, kakuphohlozwe, ngoba kungcolile, futhi kuzahlala kungcolile kini.

36Kodwa umthombo loba umgodi olamanzi amahle uzabe uhlambulukile; kodwa lokho okuthinta izidumbu zazo kuzakuba ngokungcolileyo.

37Uba izidumbu zazo ziwela phezu kwenhlanyelo ezakuhlanyelwa, ihlambulukile;

38kodwa uba amanzi athelwa enhlanyelweni, lezidumbu zazo ziwela phezu kwayo, ingcolile kini.

39Uba kusifa inyamazana edliwayo, othinta isidumbu sayo uzakuhlala engcolile kuze kuhlwe.

40Odla isidumbu sayo kagezise ingubo zakhe, ahlale engcolile kuze kuhlwe; lothwala isidumbu sayo kagezise ingubo zakhe, ahlale engcolile kuze kuhlwe.

41Zonke izidalwa ezinanakazana ezinanabayo emhlabathini ziyisinengiso; kazingadliwa.

42Zonke ezihamba ngesisu, lezihamba ngenyawo zozine, lezilenyawo ezinengi, zonke lezi ezihamba emhlabathini lingazidli, ngoba ziyisinengiso.

43Lingazenzi linengeke ngazo ezinje, lingazingcolisi ngazo ukuba lingangcoli.

44Ngoba ngiyiNkosi uNkulunkulu wenu. Ngakhoke zihlambululeni lina, libe ngcwele, ngoba mina ngingcwele. Lingazingcolisi ngezinto ezihamba emhlabathini.Levi 19:2; 1 Pet 1:16

45Ngoba ngiyiNkosi eyalikhupha elizweni laseGibithe ukuba ngibe nguNkulunkulu wenu. Ngakho wobani ngcwele, ngoba mina ngingcwele.

46Lowo ngumlayo omayelana lezinyamazana, lezinyoni, lezidalwa zonke eziphilayo ezihamba emanzini lezihamba emhlabathini,

47ukuba kwehlukaniswe okungcolileyo lokuhlambulukileyo, lezidalwa eziphilayo ezidliwayo lezidalwa eziphilayo ezingadliwayo.