Ingoma Yezingoma 5 - Ndebele Bible (iBhayibhili Elingcwele) 1978

Umyeni:

1Sengingena esivandeni sami,

dadewethu lomlobokazi wami,

ngiyabutha imure yami lamakha ami,

ngidle inyosi zami loluju lwami,

nginathe iwayini lami lochago lwami.

Dlanini, bangane bami, linathe,

lize lidakwe luthando.

Umlobokazi:

2Ngiyalala, kodwa inhliziyo yami iphapheme.

Nanso isithandwa sami siqoqoda emnyango,

sisithi: Ngivulela, dadewethu lesithandwa sami,

juba lami, opheleleyo wami,

ngoba ikhanda lami limanzi ngamazolo,

lenwele zami ngamathonsi ebusuku.

3Ngasengikhuphile isigqoko sami,

ngangingasifaka kanjani futhi na?

Ngasengigezile inyawo zami,

ngangingazingcolisa kanjani na?

4Isithandwa sami sasesizama ukuvula,

inhliziyo yami yaqubuka phakathi kwami.

5Ngasukuma ukusivulela isithandwa sami,

izandla zami zivuza imure,

iminwe yami ithonta imure engamanzi

ezibambeni zesivalo.

6Ngasivulela isithandwa sami,

kodwa sasitshibilike sahamba.

Ngaphelelwa ngamandla ngokunyamalala kwaso.

Ngasidinga, kodwa kangisifumananga,

ngasibiza, kodwa kasingiphendulanga.

7Ngaficwa ngabalindi ekubhodeni kwabo umuzi,

bangitshaya bangilimaza, bangithathela ijazi lami

labobalindi bemiduli yomuzi.

8Ngiyalifungisa, lina madodakazi aseJerusalema,

uba lifumanisa othandekayo wami limtshele

ukuthi ngiyafa luthando.

Abakhaphi:

9Isithandwa sakho simedlula ngani omunye othandekayo,

wena omuhle phakathi kwabesifazana na?

Isithandwa sakho simedlula ngani omunye othandekayo

ukuba usifungise kanjalo thina na?

Umlobokazi:

10Isithandwa sami sihle siyabukeka,

siyakhanya phakathi kwenkulungwane ezinengi.

11Ikhanda laso linjengegolide elihle impela,

inwele zaso zinde ziyibulunga, zimnyama njengewabayi.

12Amehlo aso anjengamajuba angasemanzini,

kungathi ageziswe ngochago,

agxiliswe njengamatshe aligugu.

13Izihlathi zaso zinjengendima zamakha akhupha iphunga elihle.

Indebe zaso zinjengemiduze zithonta imure elimanzi.

14Izandla zaso ngezegolide zilamatshe amahle.

Isisu saso sinjengokwenziwe ngophondo lwendlovu,

kwafakwa amatshe amahle athiwa yisafire.

15Imilenze yaso izinsika zelitshe elilukhuni ezisezisekelweni zegolide elihle.

Ukubukeka kwaso kunjengeLebanoni, kuhle njengemikusu.

16Amazwi aso amnandi kakhulu,

siyathandeka kakhulu.

Sinjeke isithandwa sami,

linjeke ilikhwa lami,

lina madodakazi aseJerusalema.