Hubo 94 - Ndebele Bible (iBhayibhili Elingcwele) 1978

UNkulunkulu wempindiselo

1Nkosi, wena Nkulukulu wempindiselo,

wena Nkulunkulu wempindiselo,

ziveze!

2Phakama, Mahluleli womhlaba,

uphindisele kwabazigqajayo.

3Nkosi, koze kube nini ababi,

koze kube nini ababi bethokoza na?

4Bonke ababi bayaphophotha bekhuluma amazwi okuzigqaja,

bezikhukhumeza.

5Bayabaphohloza abantu bakho, Nkosi,

behlupha isizwe sakho.

6Bayabulala abafelwakazi lezihambi,

babulale lezintandane;

7bathi: INkosi kayiboni,

uNkulunkulu kaJakobe kananzi.

8Qedisisani, lina zithutha phakathi kwabantu;

ziphukuphuku, lizakuhlakanipha nini na?

9Yena owenza indlebe kalakuzwa na?

lowenza ilihlo kalakubona na?

10Yena olaya izizwe kabalayi na?

Yena ofundisa abantu kalakwazi na?

11INkosi iyayazi imicabango yabantu

ukuthi ingumoya nje.

12Nkosi, ubusisiwe lowomuntu omlayayo,

omfundisayo ngomlayo wakho,

13ukuze umphumuze ensukwini zokuhlupheka,

ukuze bambelwe umgodi ababi.

14Ngoba iNkosi kayiyikubatshiya abantu bayo,

kayiyikusilahla isizwe sayo;

15ngoba ukulunga kuzakubuya kwabalungileyo,

labo bonke abaqotho enhliziyweni bazakukulandela.

16Ngubani ozakungimela kubo ababi na?

Ngubani ozakungelekelela kubo abangalunganga na?

17Uba iNkosi ibingesilo usizo lwami,

umphefumulo wami ubuzakuphangisa ukuya elizweni labafileyo.

18Lapho ngisathi unyawo lwami luyatshelela,

uthando lwakho olungapheliyo luyangisekela, Nkosi.

19Phakathi kobunengi bemicabango engikhathazayo

ukududuza kwakho kuthokozisa umphefumulo wami.

20Kambe abahluleli ababi abamisa ububi ngomthetho,

bangaphathisana kanye lawe na?

21Bayahlangana ukuvukela ukuphila kolungileyo,

bamqumele ukufa ongelacala.

22Kodwa iNkosi iyinqaba yami,

loNkulunkulu wami ulidwala lokuphephela kwami.

23Izakuphindisela kubo ububi babo,

ibaqede ngenxa yokungalungi kwabo;

iNkosi uNkulunkulu wethu izakubaqeda.