uMika 1 - Ndebele Bible (iBhayibhili Elingcwele) 1978

Isililo ngeSamariya leJerusalema

1Ilizwi leNkosi lafika kuMika waseMoreshethi ensukwini zikaJothamu loAhazi loHezekiya, amakhosi akoJuda aliboniswa ngeSamariya langeJerusalema.2 Kho 15:32—16:20; 18:1–20, 21; 2 Lan 27:1–7; 28:1—32:33

2Wathi:

Zwanini, bantu lonke, ulalele lawe mhlaba lakho konke okukuwo;

iNkosi uNkulunkulu kayibe ngufakazi ngani,

iNkosi isethempelini layo elingcwele.

3Ngoba iNkosi iyasuka endaweni yayo,

izakwehla inyathele endaweni eziphakemeyo zomhlaba.

4Intaba zizancibilika ngaphansi kwayo lezihotsha ziqekezeke,

zincibilike njengengcino phambi komlilo,

zibe njengamanzi ageleza emaweni.

5Konke lokhu kungenxa yezono zikaJakobe,

langenxa yezono zikaIsrayeli.

Siyini isono sikaJakobe na?

Kasisilo iSamariya na?

Siyini isono sikaJuda na?

Kasisilo iJerusalema na?

6Ngakho ngizadiliza iSamariya ngilenze libe yindawo yezivini,

ngiphosele amatshe alo esihotsheni,

ngiphande izisekelo zalo.

7Zonke izithombe zalo zizakuphahlazwa,

lawo wonke amahlawulo alo okuwula azatshiswa ngomlilo,

lezithombe zonke zalo zibulawe;

ngoba lizizuze ngamahlawulo amawule,

zizabuyiselwa emahlawulweni okuwula.

8Ngenxa yalokhu ngizalila ngikhale,

ngihlubule ngihambeze,

ngikhale njengamakhanka, ngilile njengezintshe.

9Ngoba amanxeba alo kawapholi,

lokhu sekufikile lakoJuda;

kufinyelele esangweni labantu bami eJerusalema.

10Lingakuxoxi eGathi, lingakhali;

lizibhuqe othulini eBeti‐Leyafra.

11Dlulani, lina baseShafiri, lihambeze lilenhloni;

abakhe eZanani kabaphumanga emzini wabo;

abaseBeti‐Ezeli bayakhala, kabalamandla okulisiza.

12Ngoba abakhe eMarothi balindele okuhle belovalo,

ngoba okubi kwehlile kuvela eNkosini, kwafika esangweni leJerusalema.

13Bophelani enqoleni amabhiza alejubane, lina baseLakishi;

laliyikuqala kwezono zeZiyone,

ngoba iziphambeko zakoIsrayeli zafunyaniswa kini.

14Ngakhoke lizanika uMoreshethiGathi isipho sokuvalelisana;

iBeti‐Akizibi lizakuba yinkohliso emakhosini akoIsrayeli.

15Ngizakulilethela umnqobi, lina baseMaresha;

udumo lukaIsrayeli luzakuyacatsha obhalwini lwaseAdulamu.

16Phucani inwele zenu ukuba likhalele abantwana elibathandayo;

phucani libe njengokhozi, ngoba bazathunjwa kini.