1Lapho liphuma impi ukuyahlasela izitha zenu, beselibona amabhiza lezinqola, labantu abanengi kulani, lingabesabi; ngoba iNkosi uNkulunkulu wenu eyalikhupha eGibithe ilani.
2Nxa selizakuhlasela, umpristi keze akhulume labantu, athi kubo:
3Zwana, Israyeli! Selisondela empini lamhla ukuhlasela izitha zenu; inhliziyo yenu kayingapheli amandla; lingesabi, lingathuthumeli, lingatshaywa luvalo ngabo;
4ngoba iNkosi uNkulunkulu wenu ihamba lani ukuba ililwele ezitheni zenu, ilikhulule.
5Izinduna zizakhuluma labantu zithi: Ngubani owakhe indlu entsha ongazanga ayibuyise na? Kabuyele endlini yakhe, funa afele empini, omunye umuntu ayibusise.
6Ngubani ohlanyele isivini, ongazanga adle izithelo zaso na? Kabuyele endlini yakhe, funa afele empini, omunye umuntu adle izithelo zaso.
7Ngubani olobole umfazi, kaze amthatha na? Kabuyele endlini yakhe, funa afele empini, omunye umuntu amthathe.
8Izinduna zizakhuluma futhi labantu, zithi: Ngubani owesabayo ophelelwe ngamandla na? Kabuyele endlini yakhe, funa inhliziyo zabangane bakhe ziphelelwe ngamandla njengenhliziyo yakhe.
9Kuzakuthi lapho izinduna seziqedile ukukhuluma labantu, kukhethwe izinduna zempi ezizakubahola abantu.
10Ekusondeleni kwenu emzini ukuwuhlasela, khulumani amazwi okuthula kuwo.
11Uba uliphendula ngamazwi okuthula, ulivulela amasongo awo, bonke abantu abafunyanwa kuwo bazakuba yizibhalwa, balisebenzele.
12Kodwa uba usala ukuzwa amazwi enu okuthula, ulihlasela, lizawuvimbezela.
13Nxa iNkosi uNkulunkulu wenu iwunikela ezandleni zenu, lizabulala bonke abesilisa bakhona ngomkhonto;
14kodwa abesifazana labantwana, izinkomo, lezinto zonke ezisemzini, lizakukuthatha kube yimpango yenu; lizithokozise ngempango yezitha zenu iNkosi uNkulunkulu wenu elinike yona.
15Lizakwenza njalo kuyo yonke imizi ekhatshana kakhulu lani, engesiyo imizi yezizwe eziseduze.
16Kodwa emizini yalababantu iNkosi uNkulunkulu wenu elinika yona ukuba ngeyenu, kaliyikutshiya lutho oluphilayo;
17kodwa lizaqeda du amaHethi lamaAmori lamaKanani lamaPerizi lamaHivi lamaJebusi, njengokulilaya kwayo iNkosi,
18ukuba bangalifundisi ukwenza imikhuba yabo enengekayo, abayenza ekukhonzeni kwabo onkulunkulu babo, lone eNkosini uNkulunkulu wenu.
19Lapho livimbezela umuzi isikhathi eside, lisilwa lawo ukuba liwunqobe, lingagamuli izihlahla zawo ngehloka; lingadla okwazo, kodwa lingazigamuli. Izihlahla ezisegangeni zingabantu yini ukuba lizivimbezele na?
20Izihlahla elizaziyo ukuthi kazidliwa, yilezo kuphela elingazigamula ukuba lakhe ngazo inqaba zokuvimbezela umuzi olwa lani, uze uwe.
Who We AreWhat We EelieveWhat We Do
2025 by iamachristian.org,Inc All rights reserved.
