Hubo 96 - Ndebele Bible (iBhayibhili Elingcwele) 1978

UNkulunkulu uyiNkosi

1Hlabelani eNkosini ihubo elitsha;

hlabelani eNkosini, lina mhlaba wonke.

2Hlabelani eNkosini, lidumise ibizo layo,

litshumayele ukukhulula kwayo insuku ngensuku.

3Landisani udumo lwayo phakathi kwezizwe,

lemisebenzi yayo emangalisayo phakathi kwabantu bonke.

4Ngoba yinkulu iNkosi, ifanele ukudunyiswa kakhulu,

iyesabeka ukwedlula onkulunkulu bonke.

5Ngoba bonke onkulunkulu bezizwe bayizithombe;

kodwa iNkosi yenza amazulu.

6Inkazimulo lobukhosi kuphambi kwayo,

amandla lobuhle kusendlini yayo engcwele.

7Inikeni iNkosi, lina zizukulwana zezizwe,

inikeni iNkosi udumo lamandla.

8Inikeni iNkosi udumo olufanele ibizo layo;

lethani umnikelo, lingene emagumeni ethempeli layo.

9Ikhonzeni iNkosi lambethe ezingcwele;

lithuthumele phambi kwayo, mhlaba wonke.

10Tshonini phakathi kwezizwe ukuthi: INkosi iyabusa.

Umhlaba umisiwe, kawuyikunyikinyeka;

izakubahlulela abantu ngokulunga.

11Kawathokoze amazulu, lomhlaba ujabule;

kaluhlokome ulwandle lakho konke okukulo;

12amaganga kawathabe lakho konke okukuwo.

Ng’khonake zizahlabela ngokuthokoza izihlahla zonke zamahlathi

13phambi kweNkosi, ngoba iyeza,

iyeza ukwahlulela umhlaba;

izakuwahlulela umhlaba ngokulunga,

labantu ngeqiniso layo.