Levi 4 - Ndebele Bible (iBhayibhili Elingcwele) 1978

Iminikelo yesono

1INkosi yathi kuMose:

2Tshono ebantwini bakoIsrayeli uthi: Uba umuntu esona, engoni ngabomu, esenza lokho iNkosi elaye ngakho ukuthi umuntu angakwenzi,

3uba kungumpristi ogcotshiweyo owona kanjalo, kuze kwehlele icala phezu kwabantu, kanikele eNkosini ngesono sakhe inkunzi engelasici ibe ngumnikelo wesono.

4Kayise inkunzi eNkosini ngasemnyango wethente lokuhlangana, abeke isandla sakhe enhlokweni yenkunzi, ayihlabe phambi kweNkosi.

5Umpristi ogcotshiweyo athathe igazi lenkunzi, alilethe ethenteni lokuhlangana,

6acwilise umunwe wakhe egazini, afafaze ngalo kasikhombisa phambi kweNkosi, ngaphambi kweveli lendlu engcwele.

7Umpristi aninde igazi empondweni zealtare lempepha elephunga elimnandi phambi kweNkosi, elisethenteni lokuhlangana, athululele lonke igazi eliseleyo phansi ngasealtareni lomnikelo wokutshiswa, elingasemnyango wethente lokuhlangana.

8Uzakuthatha wonke amahwahwa enkunzi yomnikelo wesono, idanga lemibilini, lawo wonke amahwahwa asemibilinini,

9lezinso zombili lamahwahwa azo angasezinkalweni, lamahwahwa angaphezu kwesibindi azakuwasusa lezinso —

10njengalokhu kususwa kiyo inkabi yomhlatshelo womnikelo wokuthula — umpristi akutshise ealtareni lomnikelo wokutshiswa.

11Kodwa isikhumba senkunzi, lenyama yayo yonke, kanye lenhloko yayo, lemilenze yayo, lemibilini yayo, lomswane wayo,

12yonke inkunzi uzakuyikhuphela ngaphandle kwezihonqo, endaweni ehlambulukileyo, lapho kulahlwa khona umlotha, ayitshise ngezinkuni.

13Uba lonke ibandla lakoIsrayeli lisona, lingoni ngabomu, lesono sifihlelwe abantu, benze lokho iNkosi elaye ngakho ukuthi bangakwenzi, babe lecala,

14lapho isono abasenzileyo sesisaziwa, ibandla lizanikela ngenkunzi ibe ngumnikelo wesono, liyilethe phambi kwethente lokuhlangana.

15Abalisa bebandla bazabeka izandla zabo enhlokweni yenkunzi phambi kweNkosi, inkunzi ihlatshwe phambi kwayo.

16Umpristi ogcotshiweyo alethe igazi lenkunzi ethenteni lokuhlangana,

17acwilise umunwe wakhe egazini, afafaze ngalo kasikhombisa phambi kweNkosi, ngaphambi kweveli,

18aninde igazi empondweni zealtare elisethenteni lokuhlangana, phambi kweNkosi, athululele lonke igazi eliseleyo phansi kwealtare lomnikelo wokutshiswa, elingasemnyango wethente lokuhlangana.

19Uzakuthatha kiyo wonke amahwahwa, awatshise ealtareni.

20Kenze njalo ngenkunzi le, njengalokhu enza ngenkunzi yomnikelo wesono. Umpristi abenzele indlela yokubuyisana ukuba bathethelelwe.

21Uzakuyikhuphela inkunzi ngaphandle kwezihonqo, ayitshise njengalokho wayitshisa inkunzi yokuqala; lokhu kungumnikelo wesono webandla.

22Nxa induna isona, ingoni ngabomu, isenza lokho iNkosi elaye ngakho ukuthi umuntu angakwenzi, loba kuyini, ibe lecala,

23uba yaziswa isono sayo esenzileyo, izakuletha imbuzi, impongo engelasici, ibe ngumnikelo wayo,

24ibeke isandla sayo enhlokweni yembuzi, iyihlabe endaweni lapho kuhlatshelwa khona umnikelo wokutshiswa phambi kweNkosi; kungumnikelo wesono.

25Umpristi athathe igazi lomnikelo wesono ngomunwe wakhe, alininde empondweni zealtare lomnikelo wokutshiswa, athululele lonke igazi lawo eliseleyo phansi kwealtare lomnikelo wokutshiswa.

26Wonke amahwahwa awo uzakuwatshisa ealtareni njengamahwahwa omhlatshelo weminikelo yokuthula. Ngalokho umpristi uzayenzela indlela yokubuyisana ngesono sayo, ithethelelwe.

27Uba umuntukazana esona, engoni ngabomu, esenza lokho iNkosi elaye ngakho ukuthi umuntu angakwenzi, abe lecala,Nani 15:27–28

28nxa esaziswa isono sakhe asenzileyo, uzaletha imbuzi, isibhuzikazi esingelasici, sibe ngumnikelo wakhe ngesono sakhe asenzileyo.

29Uzabeka isandla sakhe enhlokweni yomnikelo wesono, awuhlabe endaweni yomnikelo wokutshiswa.

30Umpristi athathe igazi lawo ngomunwe wakhe, alininde empondweni zealtare lomnikelo wokutshiswa, athululele lonke igazi lawo eliseleyo phansi kwealtare.

31Wonke amahwahwa awo uzakuwasusa, njengalokhu amahwahwa esuswa kuwo umhlatshelo weminikelo yokuthula, umpristi awatshise ealtareni abe liphunga elimnandi eNkosini. Ngalokho umpristi uzamenzela indlela yokubuyisana, athethelelwe.

32Uba eletha iwundlu libe ngumnikelo wakhe wesono, kalethe elisikazi elingelasici,

33abeke isandla sakhe enhlokweni yomnikelo wesono, awuhlabe ube ngumnikelo wesono endaweni lapho kuhlatshelwa khona umnikelo wokutshiswa.

34Umpristi kathathe igazi lomnikelo wesono ngomunwe wakhe, alininde empondweni zealtare lomnikelo wokutshiswa, athululele lonke igazi lawo eliseleyo phansi ngasealtareni.

35Wonke amahwahwa awo uzakuwasusa njengalokhu amahwahwa emvu esuswa kuwo umhlatshelo weminikelo yokuthula, umpristi awatshise ealtareni phezu kweminikelo eyenzelwe iNkosi ngomlilo. Ngalokho umpristi uzamenzela indlela yokubuyisana ngesono asenzileyo, athethelelwe.