1 Sam 15 - Ndebele Bible (iBhayibhili Elingcwele) 1978

Ukungalaleli kukaSawuli, lokulahlwa kwakhe

1USamuweli wathi kuSawuli: INkosi yangithuma ukuba ngikugcobe ube yinkosi yabantu bayo uIsrayeli; ngakhoke ake ulalele amazwi eNkosi.1 Sam 10:1

2INkosi yamabandla ithi: Ngizatshaya amaAmaleki ngalokho akwenza kuIsrayeli, ukulwa laye endleleni ekuphumeni kwakhe eGibithe.Eks 17:8–14; Dute 25:17–19

3Hambake uyehlasela amaAmaleki, uqede konke alakho; ungabi lasihawu, kodwa ubulale abesilisa labesifazana, izingane lensane ezimunyayo, inkomo lezimvu, amakamela labobabhemi.

4Ngakho uSawuli wasebiza abantu, wababala eTelayimi, baba yizinkulungwane ezingamakhulu amabili abahamba ngenyawo, lezinkulungwane ezilitshumi zabantu bakoJuda.

5USawuli wafika emzini wamaAmaleki, wacathama esigodini.

6Wathi kumaKeni: Sukani, liphume phakathi kwamaAmaleki, funa ngilibhubhise kanye lawo; ngoba laba lomusa kubo bonke abantu bakoIsrayeli ekuphumeni kwabo eGibithe. Ngakho amaKeni aphuma phakathi kwamaAmaleki.

7USawuli wawahlula amaAmaleki, kusukela eHavila kwaze kwafika eShuri elingasempumalanga kweGibithe.

8Wamthumba uAgagi inkosi yamaAmaleki; bonke abantu wababulala ngomkhonto.

9Kodwa uSawuli lempi yakhe kabambulalanga uAgagi, lezimvu lenkomo ezinhle lezinonisiweyo, lamawundlu, lakho konke okuhle; kabathandanga ukukuqeda lokho, kodwa konke okwakudeleleka kungelamsebenzi bakuqeda nya.

10Ilizwi leNkosi lafika kuSamuweli,

11lathi: Sengizisola ngokuthi ngambeka uSawuli waba yinkosi; ngoba udelile ukungilandela, kayenzanga imilayo yami. USamuweli wathukuthela, ubusuku bonke wakhala eNkosini.

12Kusisa uSamuweli wavuka ekuseni ukuhlangabeza uSawuli; kodwa watshelwa ukuthi uSawuli usehambile waya eKarmeli; kwathiwa uthe esezimisele khona insika, wasedlulela eGiligali.

13USamuweli wamfumana uSawuli, uSawuli wathi kuye: INkosi ikubusise; sengilenzile ilizwi layo.

14USamuweli wasesithi: Kutshoni pho lokhu ukukhala kwezimvu endlebeni zami, lalokhu ukukhala kwenkomo engikuzwayo na?

15USawuli wathi: Abantu babuye lazo kuwo amaAmaleki; ngoba kabazibulalanga izimvu lenkomo ezinhle ukuze bahlabele iNkosi uNkulunkulu wakho; ezinye siziqedile nya.

16USamuweli wasesithi kuSawuli: Kahle, ngikutshele ukuthi iNkosi itheni kimi kulobubusuku. Yena wathi: Khuluma.

17USamuweli wasesithi: Lanxa wawuzibona umncinyane, khathesi usuyinhloko yezizwe zakoIsrayeli, leNkosi yakugcoba waba yinkosi yakoIsrayeli.

18INkosi ikuthumile emsebenzini wayo yathi: Hamba uyeqeda nya izoni, amaAmaleki, ulwe lawo aze aphele.

19Phoke, kungani ungalilalelanga ilizwi leNkosi na? Kungani uzithathela impango, wenza okubi emehlweni eNkosi na?

20USawuli wathi kuSamuweli: Impela ngililalele ilizwi leNkosi, ngiyile emsebenzini iNkosi ebingithume wona, ngibuyile loAgagi inkosi yamaAmaleki, ngiwaqedile nya amaAmaleki.

21Kodwa abantu bathathe kuyo impango izimvu lenkomo, okuhle kokuqalekisiweyo, ukuba bahlabele iNkosi uNkulunkulu wakho eGiligali.

22USamuweli wasesithi:

Kambe iNkosi iyayithokozela yini iminikelo yokutshiswa lemihlatshelo,

njengalokhu ithokozela ukulalelwa kwelizwi layo na?

Khangela, ukulalela kuhle kulemihlatshelo,

lokuqaphelisa kuhle kulamahwahwa ezinqama.

23Ngoba ukuhlamuka kufana lesono sokuvumisa,

lenkani ifana lobubi lokukhonza izithombe.

Ngoba ulilahlile ilizwi leNkosi,

layo ikulahlile wena ukuba ungabe usaba yinkosi.

24USawuli wasesithi kuSamuweli: Ngonile; ngoba ngeqile umlayo weNkosi lamazwi akho; ngoba ngesaba abantu, ngakho ngalalela ilizwi labo.

25Ngakhoke ngiyakuncenga ake uthethelele izono zami, ubuye lami ukuze ngikhonze iNkosi.

26Kodwa uSamuweli wathi kuSawuli: Kangiyikubuya lawe ngoba ulilahlile ilizwi leNkosi, layo iNkosi ikulahlile ukuba ungabe usaba yinkosi koIsrayeli.

27Kuthe uSamuweli ephenduka esehamba, uSawuli wamdumela ngomphetho wengubo yakhe, yasidabuka.

28USamuweli wasesithi kuye: INkosi iwudabule kuwe lamuhla umbuso wakoIsrayeli, yawunika umakhelwana wakho ongumuntu ongcono kulawe.

29Futhi uNkulunkulu oyiBukhosi kaIsrayeli kayikuqamba amanga, azisole, ngoba kayisuye umuntu ukuba azisole.

30Wasesithi uSawuli: Ngonile, kodwa ake unginike isithunzi phambi kwabadala babantu laphambi kukaIsrayeli, ubuye lami, ukuba ngikhonze iNkosi uNkulunkulu wakho.

31Ngakho uSamuweli wasebuya loSawuli; uSawuli wayikhonza iNkosi.

32USamuweli wasesithi: Mletheni kimi uAgagi inkosi yamaAmaleki. UAgagi weza ethuthumela esithi: Impela ubuhlungu bokufa sebudlulile.

33USamuweli wathi: Njengoba umhedla wakho ubaphucile abesifazana abantwana babo, ngokunjaloke lonyoko laye uzaphucwa abantwana bakhe. USamuweli wasemhlahlela uAgagi phambi kweNkosi eGiligali.

34USamuweli wasesiya eRama, loSawuli waya emzini wakhe eGibeya.

35USamuweli kaphindanga wambona uSawuli waze wafa, kodwa uSamuweli wamlilela uSawuli. INkosi yazisola ngokuthi ibimbekile uSawuli abe yinkosi yakoIsrayeli.