Jow 1 - Ndebele Bible (iBhayibhili Elingcwele) 1978

Ilizwe lichithwa zintethe

1Ilizwi leNkosi lafika kuJoweli, indodana kaPethuweli, lisithi:

2Zwanini lokhu, lina badala,

lilalele lonke abakhileyo elizweni.

Kwake kwenzeka okunje ensukwini zenu lasensukwini zabokhokho benu na?

3Kutsheleni abantwana benu,

labantwana benu bakutshele abantwana babo,

labantwana babo bakutshele esinye isizukulwana esibalandelayo.

4Okutshiywe yintothoviyane kwadliwa yisikhongwane;

okutshiywe yisikhongwane kwadliwa liqhwagi;

lokutshiywe liqhwagi kwadliwa yinswabanda.

5Phaphamani, lina zidakwa, likhale;

lilani lonke, lina banathi bewayini,

lililele iwayini elitsha,

ngoba liphelile kini.

6Ngoba isizwe sihlasele ilizwe lami,

silamandla, kasilakubalwa.

Amazinyo aso anjengawesilwane,

silamazinyo amakhulu njengesilwane esisikazi.

7Siqedile amavini ami,

sakhwixula izihlahla zami zemikhiwa,

sazebula amaxolo azo, sawaphosela phansi,

ingatsha zaso zaba mhlophe qhwa.

8Lilani njengentombi egqoke isambatho sokulila,

ililela umyeni wobutsha bayo.

9Umnikelo wempuphu lowokunathwa iphelile ethempelini.

Izikhonzi zeNkosi, abapristi, ziyakhala.

10Amasimu aphelile, umhlabathi uyakhala,

ngoba amabele aphelile, lewayini kalisekho,

lamafutha ayancipha.

11Danani, lina balimi bomhlabathi,

likhale, lina balimi bezivini,

ngenxa yamabele lebhali;

ngoba isivuno semasimini siphelile.

12Ivini liyabuna, lomkhiwa wome.

Ipomegranati, lelala, lomkhuna,

zonke izihlahla zeganga sezomile;

lokuthokoza kuphelile ebantwini.

13Gqokani izambatho zokulila, likhale, lina bapristi,

lilani, lina zikhonzi zasealtareni.

Ngenani, lilale lambethe izambatho zokulila bonke ubusuku,

lina zikhonzi zikaNkulunkulu wami.

Ngoba umnikelo wempuphu lomnikelo wokunathwayo

igodliwe ukunikelwa endlini kaNkulunkulu wenu.

14Zilani ukudla, lenze inkonzo enkulu

lina badala, buthanisani bonke abakhileyo elizweni,

endlini yeNkosi uNkulunkulu wenu, likhuleke kuyo.

15Maye ngalolosuku!

Ngoba usuku lweNkosi luseduze,

luzafika njengokuchitheka okulethwa nguSomandla.

16Kakuphelanga ukudla kwethu na?

Lokuthaba lokuthokoza kakuphelanga endlini kaNkulunkulu na?

17Inhlanyelo iyabola ngaphansi kwamagade;

izindlu zamabele kazilalutho, leziphala zidilikile,

ngoba amabele kawakho.

18Yeka ukukhala kwezifuyo!

Imihlambi yenkomo ididekile ngoba kayilalo idlelo;

lemihlambi yezimvu ihluphekile.

19Ngiyakhala kuwe, Nkosi,

ngoba umlilo utshisile amadlelo,

lamalangabi atshisa zonke izihlahla zeganga.

20Lenyamazana zeganga ziyakhala kuwe,

ngoba imifula yamanzi itshile,

lomlilo utshisile amadlelo eganga.