Zaga 15 - Ndebele Bible (iBhayibhili Elingcwele) 1978

1Impendulo ethobileyo idedisa ulaka,

kodwa ilizwi elilukhuni livusa intukuthelo.

2Umlomo wohlakaniphileyo ukhuluma ukwazi,

kodwa umlomo wesithutha ukhuluma ubuthutha.

3INkosi iyakhangela zonke indawo,

iqaphelisa ababi labalungileyo.

4Amazwi athulisayo anjengesihlahla esiletha ukuphila,

kodwa amazwi athukuthelisayo abulala umoya womuntu.

5Isithutha sidelela ukulaya kukayise,

onanza ukukhuzwa uhlakaniphile.

6Endlini yolungileyo kukhona inotho enengi,

kodwa inzuzo yomubi imehlisela inhlupheko.

7Ukwazi kwandiswa ngomlomo wohlakaniphileyo,

kakwandiswa ngengqondo zezithutha.

8Umhlatshelo wababi uyisinengiso eNkosini,

kodwa umkhuleko wabaqotho uyayithokozisa.

9INkosi izonda indlela yababi,

kodwa ithanda umuntu owenza okulungileyo.

10Otshiya indlela elungileyo uzajeziswa kakhulu,

ozonda ukukhuzwa uzakufa.

11Indawo yabafileyo ikhamisile phambi kweNkosi,

kungathini pho inhliziyo zabantu!

12Isideleli kasithandi kukhuzwa,

kasidingi iseluleko kwabahlakaniphileyo.

13Umuntu othokozayo uyahleka,

kodwa olosizi umoya wakhe udabukile.

14Ingqondo eqedisisayo ifuna ukwazi,

kodwa oyisithutha waneliswa yibuthutha.

15Zonke insuku zomuntu ohluphekayo zimbi,

kodwa othokozayo unjengosedilini kokuphela.

16Kungcono ukuba lokuncinyane uyesaba iNkosi

kulokuba lenotho enengi uhlupheka.

17Ukudla imibhida nje phakathi kwabathandanayo

kungcono kulokudla inkabi enonileyo phakathi kwabazondanayo.

18Umuntu ololaka oluvuthayo ubanga ukuxabana,

kodwa ophuza ukuthukuthela uyalamula.

19Indlela yevila igcwele ameva,

kodwa indlela yokhutheleyo ilungile.

20Indodana ehlakaniphileyo iyintokozo kuyise,

kodwa indodana eyisithutha idelela unina.

21Ongelangqondo uthokoziswa yibuthutha,

kodwa olokuqedisisa uyaqonda ekuhambeni kwakhe.

22Amaqhinga enziwe ngaphandle kwezeluleko ayachitheka,

kodwa uba esenziwa ngabeluleki abanengi ayaphumelela.

23Nxa umuntu ephendula kuhle, kuyamthokozisa,

nxa ekhuluma ilizwi elifaneleyo, kuhle kakhulu.

24Indlela yohlakaniphileyo iya ekuphileni,

kayitshoni endaweni yabafileyo.

25INkosi idiliza indlu yozigqajayo,

kodwa ilondoloze indawo yomfelwakazi.

26INkosi izonda imicabango yababi,

kodwa amazwi abahle iyawathanda.

27Ozuza inzuzo embi wehlisela inkathazo phezu komuzi wakhe,

ozonda umvuzo wokuthengwa uzakuphila.

28Abalungileyo banakana ngokuthi bazaphendula njani,

kodwa imilomo yababi ikhuluma amazwi amabi kokuphela.

29INkosi ima khatshana lababi,

kodwa iyawuzwa umkhuleko wabalungileyo.

30Ubuso obubobothekayo buthokozisa inhliziyo,

lendaba ezinhle ziyavuselela.

31Olalela ukukhuzwa okusizayo uzahlala phakathi kwabahlakaniphileyo.

32Owala ukulaywa uyazidelela,

kodwa olalela ukukhuzwa uzuza ukuqedisisa.

33Ukuyesaba iNkosi kuyikufundiswa ngokuhlakanipha,

ukuthobeka kuyandulela udumo.