Isa 52 - Ndebele Bible (iBhayibhili Elingcwele) 1978

UNkulunkulu uzakhulula iZiyone

1Vuka, vuka, uhlome amandla akho, wena Ziyone!

wambathe ingubo zakho ezinhle,

wena Jerusalema, umuzi ongcwele!

Ngoba kakusayikungena kuwe ongasokanga longcolileyo.

2Sukuma, uzithintithe uthuli,

wena Jerusalema elithunjiweyo!

khumula izibopho ezisentanyeni yakho,

wena Ziyone elithunjiweyo!

3Ngoba iNkosi ithi ebantwini bayo; Kalithengiswanga ngalutho; ngakho lizakhululwa ngaphandle kwemali.

4INkosi uNkulunkulu ithi: Kuqala abantu bami baya eGibithe ukuhlala khona, ekucineni abaseAsiriya babacindezela ngaphandle kwesizatho.

5Phoke, ngisasalelwe yini lapha eBabiloni, lokhu abantu bami bathunjiwe ngeze na? Ababusi babo bayaklolodelwa, lebizo lami lihlanjazwa usuku lonke.

8Zwanake, abalindi bakho baphakamisa amazwi abo,

behlabela kakhulu ngokuthokoza kanyekanye,

lapho bebonana leNkosi ubuso ngobuso ekufikeni kwayo eZiyone.

9Hlokomani lonke ngokuhlabela,

lina zindawo zeJerusalema esezingamanxiwa,

ngoba iNkosi iyabaduduza abantu bayo,

ilihlengile iJerusalema.

10INkosi iwavezile amandla ayo angcwele

phambi kwazo zonke izizwe,

umhlaba wonke uzakubona ukukhulula kukaNkulunkulu wethu.

11Phumani, phumani kulo iBabiloni,

lingathinti okungcolileyo;

phumani phakathi kwalo, lizigcine lihlambulukile,

lina eliphatha izitsha zeNkosi.

12Kaliyikuphuma ngokuphangisa,

kaliyikuphuma libaleka,

ngoba iNkosi izakulihola,

loNkulunkulu kaIsrayeli alivikele ngasemuva.

Ukuhlupheka kwenceku yeNkosi

13INkosi ithi: Khangela, inceku yami izakuphumelela,

izakuba nkulu ibe lodumo kakhulu.

14Abanengi batshaqeka lapho beyibona;

yayilimele kakhulu ubuso bungasakhangeleki njengobomuntu, lesimo singasabukeki njengesabantu.

15Ngokunjaloke izizwe ezinengi zizamangala,

lamakhosi athithibale ngenxa yayo;

ngoba lokho abangakubikelwanga bazakukubona,

lalokho abangakuzwanga bazakukuqedisisa.