Roma 7 - Ndebele Bible (iBhayibhili Elingcwele) 1978

Ukukhululeka emlayweni

1Kalazi yini, bazalwane — ngoba ngikhuluma lalabo abawaziyo umlayo — ukuthi umlayo ubusa umuntu esasila kuphela na?

2Ngakho umfazi ubotshelwe ngomlayo endodeni isekhona; kodwa uba indoda isifile, ukhululiwe emlayweni omayelana lendoda.

3Ngakhoke, lapho indoda isekhona, uzakuthiwa yisifebe, uba esiba ngowenye indoda; kodwa uba indoda isifile, ukhululekile emlayweni, angebe yisifebe uba esendela kwenye indoda.

4Ngokunjaloke, bazalwane, selifile lani mayelana lomlayo ngomzimba kaKristu, ukuze libe ngabomunye, lowo owavuswa kwabafileyo ukuba sithelele uNkulunkulu izithelo.

5Kwathi sisaphila ngokwabantu, inkanuko zethu ezimbi ezavuswa ngomlayo zasebenza ezithweni zethu ukuthelela ukufa izithelo.

6Kodwa khathesi sesikhululiwe emlayweni, sifile mayelana lalokho esasibanjiwe yikho, ukuba sikhonze uNkulunkulu ekuphileni okutsha kukaMoya, singakhonzi ngokudala okulotshiweyo.

Umlayo lesono

7Phoke, sizakuthini na? Umlayo uyisono na? Phinde! Kodwa bengingayikusazi isono uba bekungekho umlayo. Bengingayikuwazi umhawu uba umlayo ubungatshongo ukuthi: Ungabi lamhawu.

12Ngakhoke umlayo ungcwele, lomthetho ungcwele, ulungile, muhle.

13Pho, okuhle kwaletha ukufa kimi na? Phinde! Kodwa isono, ukuba sibonakaliswe ukuthi siyisono, singibangele ukufa ngakho okuhle, ukuze isono ngawo umlayo sibe yisono esikhulu.

14Siyazi ukuthi umlayo ungowomoya; kanti mina ngingowenyama, ngithengisiwe njengesigqili esonweni.

15Ngitsho lezenzo zami kangiziqondi, ngoba lokho engikwenzayo, kakusikho lokho engikuthandayo; kodwa lokho engikuzondayo yikho engikwenzayo.Gal 5:17

16Uba ngikwenza lokho engingakuthandiyo, ngiyawuvumela umlayo ukuthi ulungile.

17Kodwa ngalokhu kakuseyimi engikwenzayo, kodwa yisono esihlala kimi.

18Ngoba ngiyazi ukuthi kimi, ngitsho enyameni yami, kakuhlali okuhle; ngoba kukhona kimi ukuthanda ukwenza okuhle, kodwa ukukwenza kakukho.

19Okuhle engikuthandayo kangikwenzi, kodwa okubi engingakuthandiyo yikho engikwenzayo.

20Uba ngikwenza lokho engingakuthandiyo kakuseyimi engikwenzayo, kodwa yisono esihlala kimi.

21Ngakhoke lokho engikufumanayo yilokhu kokuthi, lapho ngithanda ukwenza okuhle, okubi kuseduzane lami.

22Ngiyathokoza emlayweni kaNkulunkulu isibili sami,

23kodwa ngibona ezithweni zami omunye umlayo olwayo lomlayo wengqondo yami, ungithumbela emlayweni wesono osezithweni zami.

24Hawu, mina muntu ososizini! Ngubani ozakungikhulula kulumzimba wokufa na?

25NguNkulunkulu yedwa ngoJesu Kristu iNkosi yethu. Kabongwe uNkulunkulu. Ngalokhoke mina ngokwami ngikhonza umlayo kaNkulunkulu ngengqondo, kodwa ngikhonza umlayo wesono ngokwabantu.