1UAbimeleki indodana kaJerubali waya eShekema ezihlotsheni zikanina, wathi kulo lonke usendo lwendlu kanina:
2Ake litsho kubo bonke abaseShekema lithi: Yikuphi okungcono kini ukuba wonke amadodana kaJerubali angamatshumi ayisikhombisa alibuse, kumbe libuswe ngoyedwa na? Khumbulani futhi ukuba mina ngingowegazi lenu.
3Izihlobo zikanina zamkhulumela wonke lamazwi kubo bonke abantu baseShekema; bathanda ukumlandela uAbimeleki ngoba bathi: Ungowakithi.
4Bamnika inhlamvu zesiliva ezingamatshumi ayisikhombisa abazithatha endlini kaBali‐Berithi; uAbimeleki wafumbathisa ngazo abantu abakhohlakeleyo labayizigebengu ukuba bamlandele.
5Wasesiya endlini kayise eOfira, wabulalela abafowabo amadodana kaJerubali angamatshumi ayisikhombisa phezu kwedwala linye; kodwa uJothamu indodana encinyane kaJerubali wasala ngoba wacatsha.
6Abantu bonke baseShekema labo bonke baseBeti‐Milo babuthana, basuka bayabeka uAbimeleki abe yinkosi ngasesihlahleni esikhulu eShekema.
7Lapho ekuzwa uJothamu, wasuka wayakuma phezu kwentaba yaseGerizimi, wamemeza wathi: Ngilalelani lina baseShekema ukuze uNkulunkulu alilalele.
8Kwathi ngesinye isikhathi izihlahla zabuthana ukuzibekela inkosi; zathi esihlahleni seoliva: Sibuse.
9Kodwa isihlahla seoliva sathi kuzo: Ngizatshiya amafutha ami aletha udumo kubonkulunkulu lebantwini, ngiyezunguzeka phezu kwezihlahla na?
10Izihlahla zasezisithi esihlahleni somkhiwa: Woza wena usibuse.
11Kodwa isihlahla somkhiwa sathi kuzo: Ngizatshiya ubumnandi bami lezithelo zami ezinhle, ngiyebusa izihlahla na?
12Izihlahla zasezisithi esihlahleni sevini: Woza wena usibuse.
13Kodwa isihlahla sevini sathi kuzo: Ngizatshiya iwayini lami elithokozisa onkulunkulu labantu, ngiyebusa izihlahla na?
14Izihlahla zonke zasezisithi embabazaneni: Woza wena usibuse.
15Imbabazane yathi ezihlahleni: Uba lingibeka ngoqotho ukuba ngibe yinkosi yenu, wozani licatshe ngaphansi komthunzi wami; uba kungenjalo, umlilo uzaphuma embabazaneni utshise izihlahla zomkusu zaseLebanoni.
16UJothamu wasesithi: Lenzile ngoqotho langeqiniso yini ekubekeni uAbimeleki abe yinkosi na? Lenzile okuhle ngoJerubali lendlu yakhe na? Limnikile ubaba okumfaneleyo
17yena owalilwelayo, wadela ukuphila kwakhe, walophula ezandleni zamaMidiyani na?
18Lamhla seliyivukele indlu yakhe, labulalela amadodana akhe angamatshumi ayisikhombisa phezu kwedwala linye, labeka uAbimeleki indodana yencekukazi yakhe ukuba abe yinkosi yabaseShekema ngoba eyisihlobo senu.
19Uba lenzile okuliqiniso lokuqotho ngoJerubali langendlu yakhe lamhla, thokozani ngoAbimeleki, laye athokoze ngani;
20kodwa uba kungenjalo, kakuphume umlilo kuAbimeleki utshise abaseShekema labaseBeti‐Milo, kuphume umlilo kwabaseShekema labaseBeti‐Milo utshise uAbimeleki.
21UJothamu wasesuka ebaleka, waya eBeri, wahlala khona, ngenxa yokwesaba uAbimeleki umfowabo.
22UAbimeleki wabusa uIsrayeli iminyaka emithathu.
23UNkulunkulu wathumela umoya omubi phakathi kukaAbimeleki labantu baseShekema, bamvukela uAbimeleki,
24ukuze ububi obenziwa kumadodana kaJerubali angamatshumi ayisikhombisa bubuyele kuye umfowabo owawabulalayo lasebantwini baseShekema abamkhuthaza ukubulala abafowabo.
25Abantu baseShekema babeka abantu ukuba bamchathamele ezingqongeni zentaba, baphanga bonke abedlula kibo ngaleyondlela; loAbimeleki wakubikelwa lokho.
26Kwasuka uGali indodana kaEbedi kanye lezihlobo zakhe, waya eShekema; abaseShekema bamthemba.
27Basuka baya emasimini, bakha izithelo zamavini ezivinini zabo, benza iwayini ngazo, benza idili, bangena endlini kankulunkulu wabo, badla banatha, bamthuka uAbimeleki.
28UGali indodana kaEbedi wathi: Ungubani uAbimeleki, singobani thina abaseShekema ukuba asibuse na? Indodana kaJerubali loZebuli induna yayo babengabuswa ngabantu bakaHamori uyise kaShekema na? Pho, thina uzasibusa njani na?
29Uba lababantu bebephethwe yimi, bengizamkhupha uAbimeleki. Bengizakuthi kuye: Butha impi yakho, uphume ulwe.
30Kwathi uZebuli umbusi womuzi esizwa amazwi kaGali indodana kaEbedi, wathukuthela.
31Wathuma izithunywa kuAbimeleki eAruma, wathi: UGali indodana kaEbedi lezihlobo zakhe bafikile eShekema, sebekuvusela umuzi ukulwa lawe.
32Ngakhoke phuma ebusuku wena labantu abakuwe, liyecathama egangeni.
33Kuzakuthi ekuseni ilanga seliphumile, livuke liwuhlasele umuzi, kuthi lapho yena labantu alabo bephuma ukulwa lani lenze njengokubona kwenu.
34UAbimeleki labo bonke abantu ababelaye bavuka ebusuku, balichathamela iShekema ngezigaba ezine.
35UGali indodana kaEbedi waphuma wema ngasesangweni lomuzi. UAbimeleki labantu ababelaye bavuka ekuchathameni kwabo.
36Kwathi uGali ebabona, wathi kuZebuli: Khangela, nampaya abantu besehla entabeni. Kodwa uZebuli wathi kuye: Ubona amathunzi ezintaba kungathi ngabantu.
37UGali wathi futhi: Khangela, nampaya abantu besiza okhalweni lwamaqaqa, elinye ixuku livelela ngasesihlahleni sabavumisayo.
38UZebuli wasesithi: Kungaphi ukukloloda kwakho wena owathi ungubani uAbimeleki ukuba asibuse na? Laba kayisibo obadeleleyo na? Phuma uyekulwa labo.
39UGali wasephuma ekhokhele abantu baseShekema, walwa loAbimeleki.
40UAbimeleki wamxotsha, wabaleka; bafa abanengi kwaze kwafika esangweni.
41UAbimeleki wabuyela eAruma. UZebuli wamxotsha uGali lezihlobo zakhe, ukuba bangahlali eShekema.
42Ngosuku olulandelayo abantu baya egangeni, loAbimeleki wakubikelwa.
43Wathatha abantu bakhe, wabahlukanisa baba ngamaxuku amathathu, wacathama egangeni. Wabona abantu bephuma emzini, wabasukela wababulala.
44UAbimeleki lexuku elalilaye baqhubeka bayakuma esangweni lomuzi, amaxuku amabili asukela bonke ababesegangeni, ababulala.
45UAbimeleki walwa lomuzi lonke lolosuku, wawuthumba, wabulala bonke ababekiwo, wawudilizela phansi, wawenza waba lugwadule.
46Lapho besizwa lokhu, bonke abantu ababesenqabeni yaseShekema bangena endlini eyinqaba yethempeli likaEli‐Berithi.
47UAbimeleki wabikelwa ukuthi bonke abantu ababesenqabeni yaseShekema babuthene lapho.
48Wakhwela entabeni yaseZalimoni labo bonke ababelaye; wathatha ihloka, wagamula amahlahla, wawetshata emahlombe akhe, wathi ebantwini ababelaye: Lokhu elibona ngikwenza, kwenzeni lani masinyane.
49Ngakho bonke abantu bagamula amahlahla, bamlandela uAbimeleki bawabeka endlini eyinqaba, bayithungela ngomlilo; kwathi bonke abantu ababesenqabeni yaseShekema bafa, ababephosa babeyinkulungwane abesilisa labesifazana.
50UAbimeleki wasesiya eThebezi, walihlasela walithumba.
51Kwakukhona inqaba phakathi komuzi, bonke abantu bomuzi abesilisa labesifazana babalekela kuyo, bazivalela phakathi; basebesiya ophahleni lwenqaba.
52UAbimeleki wafika enqabeni, wayihlasela, wasondela emnyango wenqaba ukuba ayitshise ngomlilo.
53Owesifazana othile wamwisela ngelitshe lokuchola ekhanda, wamdabula ukhakhayi.
54Yena wasebiza masinyane insizwa eyayiphatha izikhali zakhe, wathi kuyo: Hwatsha umhedla wakho ungibulale funa abantu bathi ngami: Wabulawa ngowesifazana. Leyonsizwa yasimgwaza, wahle wafa.
55Kwathi abakoIsrayeli sebebona ukuthi uAbimeleki usefile, basuka bonke baya emizini yabo.
56UNkulunkulu wamphindisela ngokunjalo uAbimeleki ububi abenza kuyise ngokubulala abafowabo abangamatshumi ayisikhombisa.
57Futhi uNkulunkulu wabuyisela bonke ububi babantu baseShekema phezu kwabo, behlelwa yisiqalekiso sikaJothamu indodana kaJerubali.
Who We AreWhat We EelieveWhat We Do
2025 by iamachristian.org,Inc All rights reserved.
