1 Sam 1 - Ndebele Bible (iBhayibhili Elingcwele) 1978

Ukuzalwa kukaSamuweli

1Kwakukhona indoda ethile yaseRamathayimi, umuntu waseZufi kwelasezintabeni zakoEfrayimi; ibizo layo lalinguElkana indodana kaJerohamu, kaElihu, kaTohu, kaZufi wakoEfrayimi.

2Yayilabafazi ababili; ibizo lomunye linguHana, lelomunye linguPenina. UPenina wayelabantwana, kodwa uHana wayengelabo.

3Leyondoda yayejwayele ukusuka emzini wayo iminyaka yonke ukuyakhonza lokuhlabela iNkosi yamabandla umhlatshelo eShilo, lapho amadodana amabili kaEli, uHofini loFiniyasi, ayengabapristi beNkosi khona.

4Kwakusithi mhla uElkana ehlabela iNkosi, anike uPenina umkakhe lawo wonke amadodana lamadodakazi akhe izabelo zenyama;

5lanxa uHana wayemthanda, wamnika isabelo saba sinye kuphela, ngoba iNkosi yayisivalile isizalo sakhe.

6UPenina umbangisi wakhe wayejwayele ukumconula kakhulu ukuze amthukuthelise, ngoba iNkosi yayisivalile isizalo sakhe.

7Kwaqhubeka ngokunjalo iminyaka ngeminyaka; ngezikhathi zonke lapho esiya endlini yeNkosi umbangisi wakhe wayemconula. Ngakhoke uHana wakhala, wala ukudla.

8UElkana umkakhe wasesithi kuye: Hana, ukhalelani na? Kawudli ngani na? Inhliziyo yakho idaneleni na? Mina kangedluli amadodana alitshumi kuwe na?

9Kwathi sebedlile banatha eShilo, uHana wasukuma. UEli umpristi wayehlezi esihlalweni sakhe phansi kwensika yomnyango wethempeli leNkosi.

10UHana wayedabukile kakhulu, wasekhuleka eNkosini ekhala kakhulu.

11Wasesenza isithembiso esithi: Nkosi yamabandla, uba ungabona ukuhlupheka kwencekukazi yakho, ungikhumbule, ungangikhohlwa mina incekukazi yakho, unginike indodana, minake ngizayinika iNkosi insuku zonke zokuphila kwayo, kayiyikuliphuca lekhanda layo.Nani 6:5

12Kwathi esaqhubeka ukukhuleka phambi kweNkosi, uEli waqaphelisa umlomo wakhe.

13UHana wayekhulumela ngaphakathi, kuthinteka indebe zakhe kuphela, ilizwi lakhe lalingezwakali; ngakho uEli wacabanga ukuthi udakiwe.

14UEli wasesithi kuye: Uzadakwa kuze kube nini na? Suka lapha lize liphele kuwe iwayini.

15UHana wamphendula wathi: Atshi, nkosi yami, ngingowesifazana ohluphekayo; kanginathanga wayini loba utshwala obudakayo, kodwa bengiseneka umphefumulo wami eNkosini.

16Ungayikhangeli incekukazi yakho njengowesifazana omubi, ngoba bengikade ngikhulunyiswa yibukhulu benhlupheko zami losizi lwami.

17UEli wasemphendula esithi: Hamba kuhle; uNkulunkulu wakoIsrayeli akunike lokho okucelileyo kuye.

18Wasesithi: Incekukazi yakho kayifumane umusa kuwe. Owesifazana wasehamba; kwaphela ukudana kwakhe.

19Bavuka ekuseni; bakhuleka eNkosini, basebebuyela emzini wabo eRama. UElkana wangena loHana umkakhe engutsheni, leNkosi yamkhumbula.

20Kwathi isikhathi sesiphelele uHana wakhulelwa, wabeletha indodana, wayitha ibizo wathi nguSamuweli; ngoba wathi: Ngimcelile eNkosini.

21UElkana wasuka kanye lendlu yakhe yonke ukuyanikela eNkosini umhlatshelo weminyaka yonke, lokugcwalisa isithembiso sakhe.

22Kodwa uHana kayanga, ngoba wathi kumkakhe: Kangiyikuhamba aze akhunyulwe ebeleni umntwana; ng’khonake ngizakumusa ukuba abonakale phambi kweNkosi, abesesala khona.

23UElkana umkakhe wathi kuye: Yenza lokho okubona kulungile kuwe; hlala uze umkhumule ebeleni; kungathi iNkosi ingaqinisa ilizwi lakho. UHana wasala, wayondla indodana yakhe waze wayikhumula ebeleni.

24Eseyikhumule ebeleni wasuka layo, wayisa endlini yeNkosi eShilo kanye lenkunzi eleminyaka emithathu, lehefa lempuphu, lembodlela yewayini; wamusa umntwana endlini yeNkosi eShilo esemncinyane.

25Bayihlaba inkunzi, bamusa umntwana kuEli.

26UHana wathi: E nkosi yami, mana njalo nkosi yami! Yimi owesifazana owayemi lapha phambi kwakho, ekhuleka eNkosini.

27Ngakhulekela lumntwana; iNkosi inginikile lokho engakucela kuyo.

28Ngakhoke lami ngimnikele eNkosini; zonke insuku zokuphila kwakhe uzakuba ngoweNkosi. Bakhonza iNkosi lapho.