Josh 14 - Ndebele Bible (iBhayibhili Elingcwele) 1978

Ilizwe laseKanani labiwa ngenkatho

1La ngamazwe abawaphiwayo abakoIsrayeli elizweni laseKanani; uEleyazare umpristi loJoshuwa indodana kaNuni lezinhloko zezindlu zezizwe zabakoIsrayeli babanika wona.

2Amazwe abo bawanikwa ngenkatho njengokulaywa kukaMose yiNkosi ngezizwe ezificamunwemunye lengxenye.Nani 26:52–56; 34:13

3Ngoba uMose wayesezinikile izizwe ezimbili lengxenye ngaphetsheya kweJordani; kodwa abakoLevi kabanikanga ilizwe phakathi kwazo.Nani 32:33; 34:14–15; Dute 3:12–17

4AbakoJosefa babeyizizwe ezimbili, abakoManase labakoEfrayimi. AbakoLevi kabanikwanga sabelo elizweni, kodwa banikwa imizi ukuhlala kiyo, lamadlelo ezinkomo zabo lezifuyo zabo.

5AbakoIsrayeli benza njengokulaywa kukaMose yiNkosi, balaba ilizwe.

UKalebi unikwa iHebroni

6AbakoJuda basebesiza kuJoshuwa eGiligali; uKalebi indodana kaJefune umKenizi wathi kuye: Uyakwazi iNkosi eyakutshoyo kuMose umuntu kaNkulunkulu eKadeshi‐Barneya mayelana lawe lami.Nani 14:30

7Ngangileminyaka engamatshumi amane lapho uMose inceku yeNkosi ingithuma eKadeshi‐Barneya ukuhlola ilizwe; ngaletha kuye umbiko weqiniso.Nani 13:1–30

8Kodwa abazalwane bami ababehambe lami bazithelela ubuthakathaka inhliziyo zabantu; kodwa mina ngayilandela ngokupheleleyo iNkosi uNkulunkulu wami.

9UMose wafunga mhlalokho wathi: Impela umhlaba onyathele kuwo uzakuba ngowakho labantwana bakho kokuphela, ngoba uyilandele ngokupheleleyo iNkosi uNkulunkulu wami.Nani 14:24

10Khangelake, iNkosi ingilondolozile njengokutsho kwayo okweminyaka engamatshumi amane lanhlanu kusukela esikhathini iNkosi eyakhuluma ngaso lelilizwi kuMose, uIsrayeli esahamba enkangala; khathesike sengileminyaka engamatshumi aficaminwembili lanhlanu lamhlanje.

11Lokhu ngisaqinile lalamhla njengasosukwini uMose angithuma ngalo, lamandla ami awokulwa lawokuhamba asenjengalokhu ayenjalo,

12ngakhoke akunginike lelilizwe lezintaba iNkosi eyakhuluma ngalo ngalolosuku, ngoba wezwa mhlalokho ukuba amaAnaki ayehlala lapho ayelemizi emikhulu ebiyelweyo. Uba iNkosi ilami, ngizawaxotsha njengokutsho kwayo.

13UJoshuwa wasembusisa uKalebi indodana kaJefune, wamnika iHebroni laba ngelakhe.

14Ngalokhoke iHebroni laba yilifa likaKalebi indodana kaJefune umKenizi kuze kube lamhla, ngoba wayilandela ngokupheleleyo iNkosi, uNkulunkulu kaIsrayeli.

15Ibizo leHebroni kuqala laliliKiriyathi‐Arba; uArba wayengumuntu omkhulu phakathi kwamaAnaki.

Ilizwe laba lokuphumula ekulweni.