Hubo 77 - Ndebele Bible (iBhayibhili Elingcwele) 1978

Ukukhumbula izenzo zikaNkulunkulu kuyathokozisa

1Ngiyamemeza kuNkulunkulu,

ngimemeza kuNkulunkulu ongizwayo.

2Osukwini lokuhlupheka kwami ngiyayidinga iNkosi;

ebusuku ngiyelula isandla sami ngikhuleka,

umphefumulo wami uyala ukududuzwa.

3Ngiyamkhumbula uNkulunkulu, ngibubule;

ngiyacabanga, lomoya wami uphele amandla.

4Ungenzile ukuba ngingalali;

ngikhathazekile, kangisakwazi ukukhuluma.

5Ngiyazikhumbula insuku zasendulo leminyaka yasendulo.

6Ngiyakhumbula enhliziyweni yami ebusuku,

ngiyacabanga, ngizibuze ngithi:

7INkosi izakungilahla kokuphela,

ingabe izaphinda ibe lomusa na?

8Uthando lwayo olungapheliyo seluphelile kokuphela na?

Lezithembiso zayo seziphelile kokuphela na?

9UNkulunkulu usekhohliwe ukuba lomusa na?

Usevalele isihawu sakhe ngolaka na?

10Ngasengisithi: Kuyikuhlupheka kwami

ukuthi isandla sokunene soPhezukonke siphendukile.

11Ngizakhumbula izenzo zakho, Nkosi.

Yebo, ngizakhumbula izimangaliso zakho ezindala.

12Ngizacabanga ngawo wonke umsebenzi wakho,

nginakane ngezenzo zakho.

13Indlela yakho, Nkulunkulu, ingcwele.

Ngubani unkulunkulu omkhulu njengoNkulunkulu wethu na?

14Wena unguNkulunkulu owenza izimangaliso,

owabonakalisa amandla akho phakathi kwezizwe.

15Ngamandla akho wabakhulula abantu bakho,

amadodana kaJakobe loJosefa.

16Lapho amanzi ekubona, Nkulunkulu,

lapho amanzi ekubona ethuka;

yebo, lamanzi atshonayo athuthumela.

17Amayezi athulula amanzi, lezulu laduma;

imitshoko yakho yaphazima inxa zonke.

18Ilizwi lokuduma kwakho lalisesivunguvungwini;

imibane yakho yakhanyisa umhlaba,

lomhlaba wagedezela wazamazama.

19Indlela yakho yadabula olwandle,

lomkhondo wakho wadabula amanzi amanengi,

kanti izinyathelo zakho zazingabonakali.

20Wabahola abantu bakho njengezimvu

ngezandla zikaMose loAroni.