1Ngolunye usuku uJonathani indodana kaSawuli wathi emfaneni ophatha izikhali zakhe: Woza siwelele ebuthweni lamaFilistiya elingaphetsheya. Kodwa kamtshelanga uyise.
2USawuli wayehlala emaphethelweni aseGibeya ngaphansi kwesihlahla sepomegranati esiseMigironi; abantu ababelaye babe ngamakhulu ayisithupha.
3UAhija indodana kaAhitubi, umfowabo kaIkabodi indodana kaFiniyasi indodana kaEli, umpristi weNkosi eShilo, wayembethe ingubo yamahlombe. Abantu babengazi ukuba uJonathani uhambile.
4Intuba uJonathani ayezama ukuwela ngayo ukuya ebuthweni lamaFilistiya yayiphahlwe ngamawa amabili alamadwala; elinye lalithiwa yiBozezi, elinye lithiwa yiSene.
5Elinye iliwa lalimi ngasenyakatho ngaphambi kweMikimashi, elinye limi ngaseningizimu ngaphambi kweGeba.
6UJonathani wathi emfaneni ophatha izikhali zakhe: Woza siwelele ebuthweni lalaba abangasokanga; engxenye iNkosi uNkulunkulu ingasisebenzela, ngoba kakukho okungayinqabela ukuba ikhulule ngabanengi loba ngabalutshwana.
7Umphathi wezikhali zakhe wathi kuye: Yenza lokho okubonayo, mina ngilawe kukho konke okwenzayo.
8UJonathani wasesithi: Kulungile, sizawela siye kulabobantu ukuze basibone.
9Uba besithi kithi: Manini, size sifike kini; sizakumake endaweni yethu, singayi kibo.
10Kodwa uba besithi: Wozani lapha; sizakuya, ngoba iNkosi ibanikele ezandleni zethu. Lokhu kuzakuba yisibonakaliso kithi.
11Ngakho bobabili bazibonakalisa ebuthweni lamaFilistiya; amaFilistiya athi: Khangelani, amaHeberu asephuma emilindini abecatshe kiyo.
12AmaFilistiya asememeza oJonathani lomphathi wezikhali zakhe athi: Wozani lapha, kukhona esizalitshengisa khona. UJonathani wasesithi kophatha izikhali zakhe: Ngilandela, ngoba iNkosi iwanikele esandleni sikaIsrayeli.
13UJonathani wakhwela ngezandla lenyawo, lophethe izikhali zakhe wamlandela. Wawadilizela phansi amaFilistiya uJonathani, ophatha izikhali zakhe wamlandela ewabulala.
14Ekuhlaseleni lokho kokuqala okwenziwa nguJonathani lomphathi wezikhali zakhe babulala abantu abangamatshumi amabili, endaweni elingana lengxenye yendima.
15Kwaba khona ukuthuthumela ezihonqweni lasegangeni, lebantwini bonke; ibutho kanye labaphangi bathuthumela; umhlaba wanyikinyeka, kwaba lokuthuthumela okukhulu.
16Abalindi bakaSawuli eGibeya elakoBenjamini babona ixuku lamaFilistiya liphithizela.
17USawuli wasesithi ebantwini ababelaye: Balani abantu, libone ukuba ngubani ongekho. Kwathi sebebabalile kwafumaniseka ukuba uJonathani lomphathi wezikhali zakhe kabakho.
18USawuli wasesithi kuAhija: Letha lapha ingubo yamahlombe. Ngoba ngalesosikhathi kwakunguAhija olengubo yamahlombe phambi kukaIsrayeli.
19Kwathi uSawuli esakhuluma lompristi, umsindo owawusezihonqweni zamaFilistiya wakhula njalonjalo. USawuli wasesithi kumpristi: Yekela!
20USawuli labo bonke abantu ababelaye babuthana baya ekulweni, lapho bafumana khona izitha zabo zibulalana, kukhona isiyaluyalu esikhulu.
21Kwathi amaHeberu ayekade elamaFilistiya kuqala, ayehlala lawo ezihonqweni, abuyela kwabakoIsrayeli ababeloSawuli loJonathani.
22Njalo labantu bonke abakoIsrayeli ababecatshe ezintabeni zakoEfrayimi sebezwile ukuthi amaFilistiya ayabaleka, labo baxotshana lawo.
23INkosi uNkulunkulu yamkhulula uIsrayeli mhlalokho; ukulwa kwadlulela ngaphambi kweBeti‐Aveni.
24Abantu bakoIsrayeli bahlupheka ngalolosuku, ngoba uSawuli wafungisa abantu wathi: Kaqalekiswe umuntu odla ukudla kungakahlwi, ngingakaphindiseli ezitheni zami. Ngakho kakho umuntu owadlayo.
25Bonke abantu bafika ehlathini lapho kwakuloluju phansi.
26Lapho abantu bengena ehlathini babona uluju luthonta; kodwa kakho loyedwa owake waludla, ngoba babesesaba isifungo.
27Kodwa uJonathani wayengamzwanga uyise efungisa abantu; ngakho welula isihloko somqwayi owayewuphethe, wahlaba uhlanga lwenyosi, wafaka emlonyeni wakhe, amehlo akhe aqaqabuka.
28Omunye wabantu wasesithi: Uyihlo ubafungisile impela abantu wathi: Uqalekisiwe umuntu odla ukudla lamuhla. Abantu basebephele amandla.
29UJonathani wasesithi: Ubaba wehlisele inhlupheko enkulu elizweni; ake libone ukuthi amehlo ami aseqaqabukile kanjani, ngoba ngizwe ingcosana yoluju.
30Bekuzakuba ngcono kangakanani aluba abantu bebedlile lamuhla impango yezitha zabo abayifumanayo; bebezakuwabulala kakhulu amaFilistiya.
31Bawabulala amaFilistiya ngalolosuku kusukela eMikimashi kwaze kwafika eAjaloni. Abantu basebelambe baze baphela amandla kakhulu.
32Batheleka empangweni; bazithathela izimvu, lezinkabi, lamathole, bakubulala, bakudla kanye legazi.
33Basebemtshela uSawuli besithi: Khangela, abantu bayona eNkosini uNkulunkulu ngokudla okulegazi. USawuli wasememeza esithi: Lenze okubi; giqelani lapha kimi ilitshe elikhulu.Gen 9:4; Levi 7:26, 27; 17:10–14; 19:26; Dute 12:16, 23; 15:23
34Wasesithi: Hlakazekani phakathi kwabantu lithi kibo: Wonke umuntu kalethe inkabi yakhe lemvu yakhe lizihlabele lapha, lidle; lingoni eNkosini ngokudla okulegazi. Ngakho bonke baletha kwaba yilowo lalowo inkabi yakhe ngalobobusuku, bazihlaba khona.
35USawuli wayakhela iNkosi ialtare; kwakulialtare lokuqala alakhela iNkosi.
36USawuli wasesithi: Asihambeni silandele amaFilistiya ebusuku, siwahlasele kuze kuse, singatshiyi loyedwa kiwo. Bathi: Yenza lokho okubona kulungile. Kodwa umpristi wathi: Asisondeleni kuNkulunkulu khona lapha.
37USawuli wabuza kuNkulunkulu wathi: Ngixotshane lawo amaFilistiya na? Uzawanikela ezandleni zikaIsrayeli na? Kodwa kamphendulanga ngalolosuku.
38USawuli wasesithi: Sondelani lonke lina bakhokheli babantu, ukuze sibone ukuba lesisono sivele kanjani lamuhla.
39Ngoba ngifunga iNkosi ekhulula uIsrayeli, loba kunguJonathani indodana yami, uzakufa impela. Kodwa kakho loyedwa owamphendulayo.
40Wasesithi kuye wonke uIsrayeli: Buyelani nganxanye lina, mina loJonathani indodana yami sizabuyela nganxanye. Abantu bathi kuSawuli: Yenza lokho okubona kulungile.
41Ngakho uSawuli wathi: Nkosi, Nkulunkulu kaIsrayeli, kungani ungayiphendulanga inceku yakho lamuhla? Uba isono sikimi kumbe kuJonathani indodana yami, Nkosi, Nkulunkulu kaIsrayeli, inkatho kayibe yiUrimi; kodwa uba isono sisebantwini bakoIsrayeli, inkatho kayibe yiThumimi. UJonathani loSawuli badliwa, kodwa abantu baphunyuka.Nani 27:21; 1 Sam 28:6
42USawuli wasesithi: Yenzani inkatho phakathi kwami lendodana yami uJonathani. UJonathani wadliwa.
43USawuli wasesithi kuJonathani: Ngitshele okwenzileyo. UJonathani wasemtshela wathi: Nginambithe inyosi ngesihloko somqwayi ebengiwuphethe; kulungile ngingafa.
44USawuli wathi: UNkulunkulu angihlanekele impela ngokwengezelelweyo; uzakufa impela, Jonathani.
45Kodwa abantu basebesithi kuSawuli: Uzakufa yini uJonathani yena elethele uIsrayeli ukunqoba okungaka na? Atshi bo! Sifunga iNkosi, kakuyikuwela phansi lolulodwa unwele lwekhanda lakhe, ngoba usebenze loNkulunkulu lamuhla. Ngakho abantu bamhlenga ekufeni uJonathani.
46USawuli wayekela ukuxotshana lamaFilistiya; amaFilistiya abuyela endaweni yawo.
47Lapho uSawuli esebusa koIsraeli, walwa lezitha zakhe zonke inxa zonke, walwa lamaMowabi, lamaAmoni, lamaEdoma, lamakhosi aseZoba, lamaFilistiya; loba kungaphi lapho aphendukela khona wanqoba.
48Wenza ubuqhawe ngokunqoba amaAmaleki, wakhulula uIsrayeli ezandleni zabaphangi.
49Amadodana kaSawuli ayengoJonathani loIshivi, loMalikishuwa; amabizo amadodakazi akhe amabili yila, ibizo lenkulu lalinguMerabi, ibizo lencinyane linguMikhali.
50Ibizo lomkaSawuli lalinguAhinowama indodakazi kaAhimazi. Ibizo lenduna yempi yakhe lalinguAbineri indodana kaNeri, uyise omncinyane kaSawuli.
51UKishi uyise kaSawuli, loNeri uyise kaAbineri, babengamadodana kaAbiyeli.
52Kwakukhona ukulwa okunzima lamaFilistiya zonke insuku zikaSawuli; kwakuthi uSawuli ebona indoda elamandla loba eliqhawe, ayifake ebuthweni lakhe.
Who We AreWhat We EelieveWhat We Do
2025 by iamachristian.org,Inc All rights reserved.
