Dute 33 - Ndebele Bible (iBhayibhili Elingcwele) 1978

UMose ubusisa izizwe zakoIsrayeli

1Nansi isibusiso uMose umuntu kaNkulunkulu abusisa ngaso abantu bakoIsrayeli engakafi.

2Wathi:

INkosi yavela eSinayi,

yaphumela kubo ivela eSeyiri,

yakhanya entabeni yaseParani,

yavela kubo abangcwele abayizigidi,

kwakuvutha umlilo ngakwesokunene sayo.

3Yebo, yabathanda abantu bayo.

Bonke abangcwele bayo babesesandleni sayo;

bahlala ngasenyaweni zayo,

bamukele imilayezo yayo.

4UMose wasinika umlayo,

waba yilifa lebandla likaJakobe.

5INkosi yaba yinkosi eJeshuruni,

lapho izinhloko zabantu zibuthene,

zonke izizwe zakoIsrayeli.

6Mayelana loRubeni wathi:

URubeni kaphile, angafi,

lamadoda akhe angaphunguki.

7Mayelana loJuda wathi:

Zwana, Nkosi, ilizwi likaJuda,

umlethe kubantu bakhe.

Ngezandla zakho umlwele,

umsize ukumelana lezitha zakhe.

8Mayelana loLevi wathi:

Mnike uLevi inkatho amaThumimi

longcwele wakho inkatho amaUrimi,

owamlinga eMasa,

waphikisana laye ngasemanzini aseMeriba;

9lowo owathi ngoyise lonina: Kangibananzanga;

wabandlulula abafowabo, wafulathela abantwana bakhe.

Balalela ilizwi lakho, bagcina isivumelwano sakho.

10Bazamfundisa uJakobe izimiso zakho,

loIsrayeli umlayo wakho;

bazabeka impepha phambi kwakho,

lomnikelo wonke wokutshiswa ealtareni lakho.

11Nkosi, busisa amandla akhe,

wamukele umsebenzi wezandla zakhe;

choboza izinqe zezitha zakhe,

lezabamzondayo, ukuba bangasukumi futhi.

12Mayelana loBenjamini wathi:

Othandwayo weNkosi uyahlala kuhle ngakiyo;

iyamlondoloza usuku lonke,

iyahlala phakathi kwamaqaqa akhe.

13Mayelana loJosefa wathi:

Ilizwe lakhe kalibusiswe yiNkosi,

azuze iziphiwo ezinhle zasezulwini,

lezenziki engaphansi,

14azuze lezithelo ezinhle ezikhuliswa lilanga,

lezithelo ezinhle ezithelwayo izinyanga ngezinyanga,

15lezithelo ezinhle ezivele entabeni ezindala,

lenala yasemaqaqeni angapheliyo,

16lezithelo ezinhle zomhlaba lokugcwala kwawo,

lomusa waLowo owahlala esihlahleni.

Izinto lezi kazehlele phezu kwekhanda likaJosefa,

ekhanda lalowo oyisikhulu phakathi kwabafowabo.

17Inkunzi elizibulo ilobukhosi,

impondo zayo yizimpondo zenyathi;

izahlaba ngazo zonke izizwe,

zize zifike emikhawulweni yomhlaba.

Impondo zayo ziyizigidi zakoEfrayimi.

lezigidi zakoManase.

18Thokoza, Zebuluni, ekuhambeni kwakho olwandle,

lawe Isakari, emathenteni akho.

19Bazamemela abantu entabeni yabo,

banikele khona iminikelo yokulunga.

Ngoba bakhupha inala yezinlwandle,

lenotho efihliweyo etshebetshebeni.

20Mayelana loGadi wathi:

Kabusiswe uNkulunkulu owandisa uGadi.

UGadi uchathama njengesilwane,

uklebhula ingalo lenkanda.

21Wazikhethela isabelo esihle kakhulu,

ngoba khona kwalondolozwa isabelo sombusi;

weza ezinduneni zabantu,

wenza loIsrayeli intando yeNkosi lezahlulelo zayo.

22Mayelana loDani wathi:

UDani uyisilwane

eseqa sivela eBashani.

23Mayelana loNafitali wathi:

Wena, Nafitali, owaneliswe ngomusa,

ogcwele isibusiso seNkosi,

thumba ulwandle lelizwe eliseningizimu.

24Mayelana loAsheri wathi:

UAsheri kabusiswe phezu kwamadodana,

abe ngothandekayo kakhulu phakathi kwabafowabo,

acwilise inyawo zakhe emafutheni.

25Imigoqo yemizi yakho izakuba ngeyensimbi leyethusi;

amandla akho azakuba njengensuku zakho.

26Kakho onjengoNkulunkulu, wena Jeshuruni,

ogade amazulu ukuyakusiza,

lomkhathi ngobukhosi bakhe.

27UNkulunkulu wanininini uyisiphephelo sakho,

langaphansi zikhona ingalo ezingelakuphela.

Waxotsha izitha phambi kwakho,

wathi: Bhubhisa.

28Ngalokho uIsrayeli wahlala elondolozekile;

inzalo kaJakobe ihlezi ngokuthula

elizweni elilamabele lewayini;

yebo, amazulu akhe ayehlisa amazolo.

29Uthabile, wena Israyeli!

Ngubani onjengawe, isizwe esikhululwe yiNkosi,

eyisihlangu sokusizwa kwakho

lomkhonto wokunqoba kwakho?

Izitha zakho zizakuzithobela wena,

uzinyathele phansi.