1UAbija waya kwabaphansi, bamngcwabela emzini kaDavida. UAsa indodana yakhe waba yinkosi esikhundleni sakhe. Ensukwini zakhe ilizwe laba lokuthula iminyaka elitshumi.
2UAsa wenza okuhle lokulungileyo phambi kweNkosi uNkulunkulu wakhe.
3Wasusa wonke ama‐altare ezizwe, wavala lendawo eziphakemeyo zokukhonzela, wadiliza insika zakhona, wagamula insika ezimiselwe unkulunkulukazi uAshera,
4walaya abakoJuda ukuba bayidinge iNkosi, uNkulunkulu wabokhokho babo, bagcine umthetho lomlayo.
5Waqeda kuyo yonke imizi yakoJuda indawo eziphakemeyo zokukhonzela, lamaaltare empepha. Umbuso waba lokuthula ekubuseni kwakhe.
6Wakha imizi ebiyelweyo koJuda, ngoba ilizwe lalilokuthula. Wayengalwi izimpi ngaleyominyaka, ngoba iNkosi yamnika ukuthula.
7Wathi kwabakoJuda: Asiyakheni limizi, siyizingelezele ngemiduli langemiphotshongo, siyifake amasango lemigoqo; ilizwe lisengelethu, ngoba siyidingile iNkosi uNkulunkulu wethu, yasinika ukuthula inxa zonke. Basebesakha, baphumelela.
8UAsa wayelempi yabantu abazinkulungwane ezingamakhulu amathathu abavela koJuda, behlome amahawu lemikhonto, labazinkulungwane ezingamakhulu amabili lamatshumi aficaminwembili abavela koBenjamini ababehloma izihlangu betshoka imitshoko; bonke babengamaqhawe.
9UZera waseEtiyopiya waphuma ukuzakulwa labo elempi yamadoda ayisigidi lezinqola zokulwa ezingamakhulu amathathu, wahamba waze wafika eMaresha.
10UAsa waphuma ukumhlangabeza, bahlangana ukulwa esihotsheni saseZefatha eMaresha.
11UAsa wakhuleka eNkosini uNkulunkulu wakhe wathi: Nkosi, kakho onjengawe ukuvikela ababuthakathaka kwabalamandla; akusisize, Nkosi Nkulunkulu wethu, ngoba thina sithembele kuwe; ngebizo lakho siphumile ukulwa lalimpi engaka; Nkosi, wena unguNkulunkulu wethu; umuntu angephikisane lawe.
12Ngakho iNkosi yawachitha amaEtiyopiya phambi kukaAsa laphambi kwabakoJuda, abaleka.
13UAsa labantu ababelaye baxotshana lawo baze bafika eGerari, amaEtiyopiya afa, kakwaze kwasala loyedwa, achitheka phambi kweNkosi uNkulunkulu lempi yayo. AbakoJuda bathatha impango enengi kakhulu.
14Bayihlasela yonke imizi yangaseGerari, ngoba iNkosi yabehlisela abantu ukwesaba. AbakoJuda bayiphanga yonke imizi ngoba impango yayinengi kiyo.
15Bahlasela lezibaya zezifuyo, bathumba izimvu ezinengi lamakamela. Basebebuyela eJerusalema.
Who We AreWhat We EelieveWhat We Do
2025 by iamachristian.org,Inc All rights reserved.
