2 Kho 14 - Ndebele Bible (iBhayibhili Elingcwele) 1978

Ukubusa kukaAmaziya

1Ngomnyaka wesibili wokubusa kukaJowashi indodana kaJehowazi, inkosi yakoIsrayeli, uAmaziya indodana kaJowashi inkosi yakoJuda waba yinkosi.2 Lan 25:1–28

2Wayeleminyaka engamatshumi amabili lanhlanu lapho eqalisa ukubusa; wabusa iminyaka engamatshumi amabili lesificamunwemunye eJerusalema. Ibizo likanina lalinguJehowadini waseJerusalema.

3Wenza okulungileyo phambi kweNkosi, kodwa engafanani loDavida ukhokho wakhe; wenza zonke izinto njengokwenza kukaJowashi uyise.

4Kodwa indawo eziphakemeyo zokukhonzela kazivalwanga; abantu babelokhu benikela iminikelo, betshisa impepha endaweni eziphakemeyo.

5Kwathi umbuso wakhe usuqinile, wabulala inceku zakhe ezazibulele inkosi uyise.

6Kodwa kababulalanga abantwana bababulali, njengokulotshiweyo ogwalweni lukaMose lapho iNkosi uNkulunkulu yalaya khona ukuthi: Oyise kabayikubulawa ngenxa yabantwana, labantwana kabayikubulawa ngenxa yaboyise, kodwa wonke umuntu uzafela izono zakhe.Dute 24:16

7Wabulala amaEdoma azinkulungwane ezilitshumi esihotsheni seTshwayi, wathumba iSela, walibiza ngokuthi yiJokitheli, elilibizo lalo kuze kube lamuhla.

8UAmaziya wasethuma izithunywa kuJowashi indodana kaJehowahazi kaJehu, inkosi yakoIsrayeli, wathi: Woza siqondane.

9UJowashi inkosi yakoIsrayeli, wathumela ilizwi kuAmaziya inkosi yakoJuda esithi: Uthathawe lwaseLebanoni lwathumela ilizwi emkuswini waseLebanoni lusithi: Yendisela indodana yami indodakazi yakho; kwasekusedlula isilo seLebanoni, salugxoba uthathawe.

10Ulehlule iEdoma sibili, usuzikhukhumeza, yaneliswa yibukhosi bakho, uzihlalele ekhaya; ngoba ufunelani ukuzivusela uhlupho ukuba uwe wena labakoJuda na?

11Kodwa uAmaziya kathandanga ukulalela. UJowashi inkosi yakoIsrayeli wasephumake, wahlangana loAmaziya inkosi yakoJuda eBeti‐Shemeshi koJuda.

12AbakoJuda bahlulwa ngabakoIsrayeli, babaleka bonke, baya emizini yabo.

13UJowashi inkosi yakoIsrayeli wambamba uAmaziya inkosi yakoJuda, indodana kaJowashi kaAhaziya, eBeti‐Shemeshi; wafika eJerusalema, wadilizela phansi umduli weJerusalema ibanga elilengalo ezingamakhulu amane, kusukela eSangweni lakoEfrayimi kusiya eSangweni leNgonsi.

14Wathumba lonke igolide lesiliva, lezitsha zonke ezazisethempelini lezazisezindlini zenotho yesigodlo senkosi, kanye labantu, wasebuyela eSamariya.

15Ezinye indaba zikaJowashi, lakho konke akwenzayo, lobuqhawe bakhe, lokulwa kwakhe loAmaziya inkosi yakoJuda, kulotshiwe ogwalweni lwezindaba zamakhosi akoIsrayeli.

16UJowashi waya kwabaphansi, wangcwatshelwa eSamariya emakhosini akoIsrayeli. UJerobowamu indodana yakhe waba yinkosi esikhundleni sakhe.

17UAmaziya indodana kaJowashi, inkosi yakoJuda, waphila iminyaka elitshumi lanhlanu ngemva kokufa kukaJowashi indodana kaJehowahazi inkosi yakoIsrayeli.

18Ezinye indaba zikaAmaziya zilotshiwe ogwalweni lwezindaba zamakhosi akoJuda.

19Bamenzela icebo eJerusalema, wasebalekela eLakishi; kodwa bathumela abantu, bambulalela khona.

20Bamthwala ngamabhiza, wangcwatshelwa eJerusalema kubokhokho bakhe emzini kaDavida.

21Bonke abantu bakoJuda bathatha uAzariya owayeleminyaka elitshumi lesithupha, bambeka waba yinkosi esikhundleni sikayise uAmaziya.

22Nguye owakha iElathi, walibuyisela koJuda ngemva kokufa kwenkosi.

Ukubusa kukaJerobowamu

23Ngomnyaka wetshumi lanhlanu wokubusa kukaAmaziya indodana kaJowashi inkosi yakoJuda uJerobowamu indodana kaJowashi inkosi yakoIsrayeli waba yinkosi yaseSamariya; wabusa iminyaka engamatshumi amane lanye.

24Wenza okubi phambi kweNkosi, kazitshiyanga izono zikaJerobowamu indodana kaNebati ezenza uIsrayeli one.

25Wabuyisela imingcele yakoIsrayeli kusukela ekungeneni kweHamathi kuze kufike oLwandle lwaseAraba, njengokutsho kwelizwi leNkosi, uNkulunkulu kaIsrayeli, eyalikhuluma ngenceku yayo uJona umprofethi indodana kaAmithayi, owaseGathi‐Heferi.Jona 1:1

26Ngoba iNkosi yabona ukuthi ukuhlupheka kukaIsrayeli kwakukukhulu, wayengekho loyedwa oseleyo oyisigqili lokhululekileyo, kungasekho ongasiza uIsrayeli.

27Kodwa iNkosi yayingatshongo ukuba izalisusa ibizo likaIsrayeli ngaphansi komthunzi welanga; yabakhulula ngesandla sikaJerobowamu indodana kaJowashi.

28Ezinye indaba zikaJerobowamu, lakho konke akwenzayo, lobuqhawe bakhe, lokulwa kwakhe, lokubuyisa kwakhe koIsrayeli iDamaseko leHamathi, kulotshiwe ogwalweni lwezindaba zamakhosi akoIsrayeli.

29UJerobowamu waya kwabaphansi, amakhosi akoIsrayeli. UZekariya indodana yakhe waba yinkosi esikhundleni sakhe.