Isa 24 - Ndebele Bible (iBhayibhili Elingcwele) 1978

Ukwahlulelwa komhlaba

1Khangela, iNkosi izachitha umhlaba,

iwenze ube yinkangala,

iwugenqule, ihlakaze labahlala kiwo.

2Okuzakwenziwa ebantwini kuzakwenziwa lakumpristi;

okuzakwenziwa esigqilini kwenziwe lasenkosini yaso;

okuzakwenziwa encekukazini kwenziwe enkosikazini yayo;

okuzakwenziwa kumthengi kwenziwe kumthengisi;

okuzakwenziwa kumbolekisi kwenziwe kobolekayo;

okuzakwenziwa kumniki wesikwelede kwenziwe kokweledayo.

3Umhlaba uzachitheka impela, kuqedwe konke;

ngoba iNkosi ilikhulumile lelilizwi.

4Umhlaba uyoma, ubune,

ilizwe lonke liphele amandla, libune;

amazulu aphela amandla kanye lomhlaba.

5Umhlaba wonakalisiwe ngabahlala kiwo;

ngoba abantu beqile imilayo, bephula izimiso,

bephula isivumelwano esingapheliyo.

6Ngakhoke isiqalekiso siwehlele umhlaba,

labahlala kiwo bayahlupheka ngenxa yesono sabo;

ngakhoke abahlala emhlabeni bayancipha,

sebeyingcosana nje abaseleyo.

7Iwayini liyaphela, lamavini ayabuna,

bonke ababethokoza bayabubula.

8Ukukhala kwezigubhu kuphelile,

lomsindo wabajabulayo kawusekho,

lokukhala kwechacho kuthule.

9Kabasahlabeli lapho benatha iwayini,

lotshwala sebubaba kulabo ababunathayo.

10Umuzi wokuchitheka usubhidlikile,

zonke izindlu sezivaliwe ukuba kungangeni muntu.

11Kukhalelwa iwayini ezindleleni;

yonke intokozo inyamalele,

lenjebulo emhlabeni iphelile.

12Umuzi ugcwele ukuchitheka impela,

lamasango abhidliziwe, achithwa.

13Ngoba kuzakuba njalo emhlabeni wonke, phakathi kwezizwe zonke,

kube njengokuwohlozwa kwesihlahla seoliva,

lanjengokudojwa kwezithelo emva kokuvuna.

14Abantu bayaphakamisa amazwi abo, behlabela ngokuthokoza,

bememeza ngobukhosi beNkosi ngasentshonalanga.

15Ngakhoke dumisani iNkosi ngasempumalanga,

langasemazweni angasolwandle dumisani ibizo leNkosi uNkulunkulu kaIsrayeli.

16Siyezwa amahubo avela emikhawulweni yomhlaba,

adumisa isizwe esilungileyo.

Kodwa mina ngithi: Ngidanile, ngidanile! Maye babo!

Ngoba abakhohlisi bakhohlisile,

yebo bakhohlisile kakhulu.

17Ukwesaba lomgodi lomjibila kulilindele, lina abahlala emhlabeni.

18Kuzakuthi obalekela umsindo wokwesaba awele emgodini;

ophuma emgodini abanjwe ngumjibila.

Ngoba iminyango yasezulwini ivulekile,

lezisekelo zomhlaba ziyaqhaqhazela.

19Umhlaba utshabalele,

umhlaba udabukile phakathi,

umhlaba uyanyikinyeka kakhulu.

20Umhlaba uyadayizela njengesidakwa,

uzunguzeke njengendlu ngesikhathi sesiphepha;

usindwa yizono zabantu,

uzakuwa, ungabe usavuka futhi.

21Kuzakuthi ngalolosuku iNkosi itshaye ibandla laphezulu ezulwini,

lamakhosi omhlaba emhlabeni.

22Kuzabuthelwa ndawonye njengezibotshwa emgodini,

kuvalelwe entolongweni,

kutshaywe ngemva kwezinsuku ezinengi.

23Laphoke inyanga izathuba, lelanga lifiphale,

ngoba iNkosi yamabandla izabusa entabeni yaseZiyone laseJerusalema,

ibonakalise inkazimulo yayo phambi kwezikhulu zayo.