2 KwabaseTesalonika 3 - Ndebele Bible (iBhayibhili Elingcwele) 1978

Izicelo lezifiso lezeluleko zikaPawuli

1Elokucinake, bazalwane, sikhulekeleni ukuba ilizwi leNkosi liqhubekele phambili ngamandla, lidunyiswe, njengalokhu kwaba njalo phakathi kwenu,

2lokuba sikhululwe ebantwini abaduhileyo lababi; ngoba kayisibo bonke abakholwayo.

3Kodwa iNkosi ithembekile, izakuliqinisa, ilivikele komubi.

4Silethemba eNkosini ngani ukuthi lokhu esililaya khona liyakwenza, njalo lizakukwenza.

5INkosi ayiqondise inhliziyo zenu othandweni lukaNkulunkulu lasekubekezeleni kukaKristu.

6Siyalilayake, bazalwane, ebizweni leNkosi yethu uJesu Kristu, ukuba lizahlukanise labazalwane bonke abavilaphayo, bengahambi ngomlayo elawamukela kithi.

7Lani liyazi ngokwenu ukuthi lifanele ukuba lisilingise kanjani, sasingavilaphi sikhona phakathi kwenu,

8kasidlanga nje kudla komuntu kodwa satshikatshikeka, sisebenza ubusuku lemini ukuba singabi ngumthwalo kini,

9kungesikho ukuba sasingelalo ilungelo, kodwa ukuze silinike isibonelo sokuba lisilingise.

10Ngoba lalapho sisekhona kini, salilaya ngalokhu ukuthi: Uba umuntu engathandi ukusebenza, kangadli.

11Sizwa kuthiwa abanye phakathi kwenu bayavilapha, kabasebenzi lutho, kodwa benza okungafanelanga;

12abanjaloke siyabalaya sibeluleka eNkosini uJesu Kristu ukuba basebenze ngokuthula, badle okwabo ukudla.

13Bazalwane, lingadinwa yikwenza okuhle.

14Uba ekhona ongalaleli ilizwi lethu kulincwadi, mqapheliseni lowomuntu, lingahlangani laye, ukuze abe lenhloni;

15kodwa lingamphathisi okwesitha, mlulekeni njengomzalwane.

16INkosi yokuthula uqobo kayilinike ukuthula ngezikhathi zonke langezindlela zonke. INkosi ibe lani lonke.

Isicino

17Mina Pawuli ngiyaloba lesisibingelelo ngesandla sami; lokhu kuluphawu lwazo zonke incwadi zami; ngiloba ngokunjalo.

18Umusa weNkosi yethu uJesu Kristu kawube lani lonke.