Hlu 13 - Ndebele Bible (iBhayibhili Elingcwele) 1978

Ukuzalwa kukaSamsoni

1AbakoIsrayeli babuya benza okubi phambi kweNkosi. INkosi yabanikela ezandleni zamaFilistiya iminyaka engamatshumi amane.

2Kwakukhona umuntu othile waseZora, owakoDani, ibizo lakhe linguManowa; umkakhe wayeyinyumba engelabantwana.

3Isithunywa seNkosi sabonakala kowesifazana sathi kuye: Khangela, uyinyumba, kawulabantwana, kodwa uzathatha isisu uzale indodana.

4Ngakhoke qaphelisa ukuba unganathi wayini lokunye okudakayo, ungadli lutho olungcolileyo,

5ngoba uzathatha isisu uzale indodana. Impuco kayiyikuthinta ikhanda layo, ngoba umntwana lowo uzakuba umNaziri kaNkulunkulu kusukela ekuzalweni kwakhe. Yena uzakuba ngowokuqala ukukhulula uIsrayeli ezandleni zamaFilistiya.Nani 6:1–5

6Owesifazana wasesiya ukubikela indoda yakhe esithi: Kufikile kimi umuntu kaNkulunkulu, ubuso bakhe bebunjengobuso besithunywa sikaNkulunkulu, busesabeka. Kangimbuzanga ukuba uvelaphi, futhi kangitshelanga ibizo lakhe.

7Uthe kimi: Khangela, uzathatha isisu, uzale indodana; ngakho unganathi wayini lokunye okudakayo, ungadli lutho olungcolileyo, ngoba umntwana lowo uzakuba ngumNaziri kaNkulunkulu kusukela osukwini lokuzalwa kwakhe kuze kube sekufeni kwakhe.

8UManowa wancenga iNkosi esithi: E Nkosi, umuntu kaNkulunkulu obumthumile ake abuye futhi kithi, asifundise ukuthi sizakwenza njani ngomntwana ozazalwa.

9UNkulunkulu walilalela ilizwi likaManowa, isithunywa sikaNkulunkulu safika futhi kowesifazana ehlezi egangeni; kodwa uManowa umkakhe wayengekho.

10Owesifazana wagijima masinyane, wabikela umkakhe wathi: Khangela, lowomuntu kaNkulunkulu owafika kimi mhlalokhuya usebonakele kimi.

11UManowa wasuka walandela umkakhe, wafika kulowomuntu wathi kuye: Unguye lowomuntu owakhuluma kulowesifazana na? Yena wathi kuye: Nginguye.

12UManowa wasesithi: Nxa esegcwalisekile amazwi akho, yena uzakuba ngumntwana onjani na? Uzasebenzani na?

13Isithunywa seNkosi sathi kuye: Konke lokho engakutshoyo kumkakho akuqaphelise;

14angadli lutho oluvela evinini, anganathi wayini lokunye okudakayo, angadli lutho olungcolileyo, agcine konke engamlaya khona.

15UManowa wasesithi kuso isithunywa seNkosi: Ake uhlale lathi, sikuhlabele izinyane.

16Isithunywa seNkosi sathi kuye: Uba ngihlala lani, kangiyikudla ukudla kwenu; kodwa uba lithanda ukulungisa umnikelo wokutshiswa, unikeleni eNkosini. UManowa wayengazi ukuba kwakuyisithunywa seNkosi.

17Wasesithi kuso isithunywa seNkosi: Wena ungubani ibizo lakho, ukuze kuthi lapho amazwi akho egcwaliseka sikuhloniphe.

18Isithunywa seNkosi sathi kuye: Ulibuzelani ibizo lami lokhu lona liyamangalisa na?

19UManowa wasethatha izinyane lomnikelo wempuphu, wakunikela eNkosini phezu kwedwala, kuyo eyenza okumangalisayo.

20Kwathi lapho ilangabi liphuma ealtareni liqonde phezulu, isithunywa seNkosi senyuka ngelangabi lealtare uManowa lomkakhe bekhangele; bathi mbo phansi ngobuso babo.

21Isithunywa seNkosi kasiphindanga sabonakala kuManowa lomkakhe. UManowa wasesazi ukuba kwakuyisithunywa seNkosi.

22Wasesithi kumkakhe: Sizakufa impela ngoba sibone uNkulunkulu.

23Kodwa umkakhe wathi: Uba iNkosi ibiqonde ukusibulala, ibingayikwamukela umnikelo wethu wokutshiswa lomnikelo wethu wempuphu, loba isitshengise zonke lezizinto, lokusitshela izinto ezinjengalezi.

24Owesifazana wabeletha umfana, wamutha ibizo wathi nguSamsoni; umfana wakhula, leNkosi yambusisa.

25Umoya weNkosi waqala ukumvusa eseMahane‐Dani phakathi kweZora leEshitawoli.