Isa 60 - Ndebele Bible (iBhayibhili Elingcwele) 1978

Udumo oluzayo lweZiyone

1Vuka, Jerusalema, ukhanye, ngoba ukukhanya kwakho sekufikile,

lenkazimulo yeNkosi isikhanya phezu kwakho.

2Khangela, umnyama uyasibekela umhlaba,

lomnyama omkhulu usibekele izizwe;

kodwa iNkosi izakhanya phezu kwakho,

lenkazimulo yayo ibonakale phezu kwakho.

3Izizwe zizakuza ekukhanyeni kwakho,

lamakhosi eze ekuveleni kokukhanya kwakho.

4Phakamisa amehlo akho inxa zonke, ubone;

bayabuthana bonke, beza kuwe;

amadodana akho azavela khatshana,

lamadodakazi akho azabelethwa njengabantwana.

5Ng’khonake uzakubona, ugcwale ukuthokoza,

lenhliziyo yakho izakuphuphuma;

ngoba inotho evela olwandle izalethwa kuwe,

lenotho yezizwe izanikwa wena.

6Indwendwe zamakamela zizakuza kuwe,

lamakamela aseMidiyani laseEfa,

lawo wonke awaseSheba azakuza;

azaletha igolide lenhlaka,

amemezele indumiso yeNkosi.

7Yonke imihlambi yaseKedari izabuthelwa wena,

lezinqama zaseNebayothi zizahlatshelwa wena,

zibe ngumnikelo owemukelekayo ealtareni lami,

kwengezelelwe udumo lwendlu yami.

8Ngobani laba abagijima njengeyezi,

bephapha njengamajuba esiya ezidlekeni zawo na?

9Yimikolo ebuthana ivela emazweni angasolwandle,

ikhokhelwa yimikolo emikhulu,

ukuletha amadodana akho evela khatshana

kanye lesiliva legolide lawo,

ngenxa yebizo leNkosi uNkulunkulu wakho,

langenxa yoNgcwele kaIsrayeli,

ngoba ikunikile udumo.

10Abezizwe bazakwakha imiduli yakho,

lamakhosi abo akukhonze;

ngoba lanxa olakeni lwami ngakutshaya,

kodwa sengikuhawukele.

11Amasango akho azahlala evulekile,

kawayikuvalwa emini lasebusuku,

ukuze abantu bakulethele inotho yezizwe,

lamakhosi azo aqhutshwe ebotshiwe.

12Ngoba isizwe lombuso okungayikukukhonza kuzakuchitheka;

lezozizwe zizakuphela nya.

13Inotho yaseLebanoni izakulethwa kuwe,

amaphane lomangwe lomnondo

ukucecisa indlu yami engcwele;

ngizakwenza indawo yenyawo zami ibe ngekhazimulayo.

14Amadodana abakucindezelayo azakuza kuwe ukukukhonza,

labo bonke abakudelelayo bakhothamele ngasenyaweni zakho,

bakubize ngokuthi unguMuzi weNkosi,

iZiyone loNgcwele kaIsrayeli.

15Lanxa ubutshiyiwe, uzondwa,

kungasekho odabula phakathi kwakho,

ngizakukwenza ube lodumo kuze kube nininini,

uthokozise ezizukulwaneni zonke.

16Uzakumunya uchago lwezizwe,

umunye amabele amakhosi;

uzakwazi ukuthi mina Nkosi nginguMsilisi wakho,

loMhlengi wakho, loMninimandla kaJakobe.

17Endaweni yethusi ngizakukulethela igolide,

lendaweni yensimbi ngikulethele isiliva,

endaweni yesigodo ngikulethele ithusi,

lendaweni yamatshe ngikulethele insimbi.

Ngizakwenza ukuthula kube ngumbusi wakho,

lokulunga kube yinkosi yakho.

18Isihluku kasisayikuba khona elizweni lakho,

lokuchitheka lokubhubhisa phakathi kwelizwe lakho;

uzakutha imiduli yakho uthi yikuKhululwa,

lamasango akho uthi yiNdumiso.

19Ilanga kalisayikuba yikukhanya kuwe emini,

lenyanga kayisayikukukhanyisela ebusuku;

kodwa iNkosi izakuba yikukhanya kwakho okungelakuphela,

loNkulunkulu wakho abe ludumo lwakho.

20Ilanga lakho kalisayikutshona,

lenyanga yakho kayisayikuncipha;

ngoba iNkosi izakuba yikukhanya kwakho okungelakuphela,

lensuku zokulila kwakho zizakuphela.

21Abantu bakho bonke bazakuba ngabalungileyo,

ilizwe libe ngelabo kokuphela,

babe lugatsha oluhlanyelwa yimi,

umsebenzi wezandla zami, ukuba ngibe lodumo.

22Usendo oluncinyane luzakuba ngabantu abanengi,

labayingcosana babe yisizwe esilamandla.

Ngizakukwenza lokhu ngesikhathi esifaneleyo.

Mina ngiyiNkosi.