Hubo 119 - Ndebele Bible (iBhayibhili Elingcwele) 1978

Umlayo kaNkulunkulu

1Babusisiwe abandlela zabo ziqotho,

abahamba ngomlayo weNkosi.

2Babusisiwe abagcina imilayo yayo,

abayidingayo ngenhliziyo yonke,

3abangenzi ukungalungi,

kodwa behamba endleleni zayo.

4Wena usilayile ukuba sigcine kakhulu imithetho yakho.

5Kungathi zingaqondiswa indlela zami

ukuba ngigcine izimiso zakho!

6Ng’khona ngingayikuyangeka,

ngikhumbule yonke imithetho yakho.

7Ngizakukudumisa ngenhliziyo eqotho,

lapho ngifunda izahlulelo zakho ezilungileyo.

8Ngizakugcina izimiso zakho.

Ungangitshiyi impela.

9Insizwa ingayigcina kanjani indlela yayo ihlambulukile na?

Ngokuqaphela okwelizwi lakho.

10Ngikudingile ngenhliziyo yami yonke;

kangingaphambuki emithethweni yakho.

11Ilizwi lakho ngilibekile enhliziyweni yami,

ukuze ngingoni kuwe.

12Kawudunyiswe wena, Nkosi;

ungifundise izimiso zakho.

13Ngomlomo wami ngimemezele

zonke izahlulelo zomlomo wakho.

14Ngithokoza kakhulu ngendlela yemilayo yakho kulemfuyo.

15Ngizakunakana ngemithetho yakho,

ngikhumbule indlela zakho.

16Ngizakuthokoza ngezimiso zakho;

kangiyikukhohlwa ilizwi lakho.

17Yenzela inceku yakho okuhle,

ukuba ngiphile ngigcine ilizwi lakho.

18Vula amehlo ami ukuba ngibone izimangaliso ezivela emlayweni wakho.

19Ngiyisihambi emhlabeni;

ungangifihleli imithetho yakho.

20Umphefumulo wami uyalangatha kakhulu izahlulelo zakho ngezikhathi zonke.

21Uyakhuza abaziqakisayo,

baqalekisiwe abaduha emithethweni yakho.

22Susa kimi ukweyisa lokudelela kwabo,

ngoba ngigcinile limilayo yakho.

23Loba izikhulu zihlezi zisenza icebo ngami,

kodwa inceku yakho izakunakana ngezimiso zakho.

24Imilayo yakho iyintokozo yami,

ingabeluleki bami.

25Ngiwele phansi othulini nginqotshiwe;

ngivuselela ngokwelizwi lakho.

26Ngakulandisela indlela zami, wena wangiphendula.

Ngifundisa izimiso zakho.

27Ngichasisela indlela yemithetho yakho,

ngizakunakana ngezenzo zakho ezimangalisayo.

28Umphefumulo wami uyaphela amandla ngenxa yosizi;

ngiqinisa ngokwelizwi lakho.

29Susa kimi indlela yamanga,

ungifundise ngomusa umlayo wakho.

30Ngikhethile indlela yobuqotho,

ngibekile phambi kwami izahlulelo zakho.

31Nginamathele emilayweni yakho, Nkosi;

kangingayangeki.

32Ngizagijima endleleni yemithetho yakho,

ngoba uzakhulisa ukuqedisisa kwami.

33Nkosi, ngifundisa indlela yezimiso zakho,

ngizakuyigcina kuze kube sekupheleni.

34Ngiphe ukuqedisisa ukuze ngigcine umlayo wakho,

ngiwulondoloze ngenhliziyo yami yonke.

35Ngihambisa endleleni yemithetho yakho,

ngoba ngiyathokoza ngayo,

36Qondisa inhliziyo yami emilayweni yakho,

kungabi semhawini.

37Phendula amehlo ami ukuba angaboni okuyize;

ungivuselele endleleni zakho.

38Qinisa isithembiso sakho encekwini yakho

esingesabo abakwesabayo.

39Susa isigcono engisesabayo,

ngoba izahlulelo zakho zilungile.

40Khangela, ngiyalangatha imithetho yakho;

ngivuselela ngokulunga kwakho.

41Kaluze kimi uthando lwakho olungapheliyo, Nkosi,

ukukhulula kwakho ngokwelizwi lakho.

42Ng’khona ngizakubaphendula abangithukayo,

ngoba ngiyathemba ilizwi lakho.

43Ungakususi emlonyeni wami ukukhuluma iqiniso,

ngoba ngithemba izahlulelo zakho.

44Ngizakuwugcina umlayo wakho njalonjalo,

kuze kube nininini;

45ngizahamba ngokukhululeka,

ngoba ngiyifundile imithetho yakho.

46Ngizakukhuluma ngemilayo yakho phambi kwamakhosi,

ngingayangeki;

47ngoba ngithokoza ngemithetho yakho engiyithandayo.

48Ngihlonipha imithetho yakho engiyithandayo,

nginakane ngezimiso zakho.

49Khumbula ilizwi lakho encekwini yakho,

owanginika ithemba ngalo.

50Induduzo yami ekuhluphekeni kwami yilokhu

ukuthi ilizwi lakho liyangivuselela.

51Abaziqakisayo bangihleka ulunya,

kodwa kangiphambuki emlayweni wakho.

52Lapho ngicabanga ngezahlulelo zakho zasendulo

ngiyaduduzeka, Nkosi.

53Ngiyathukuthela kakhulu ngenxa yababi

abatshiya umlayo wakho.

54Izimiso zakho zaba zingoma zami endlini engithe cosololo kuyo.

55Ebusuku ngikhumbula ibizo lakho, Nkosi,

ngigcine umlayo wakho.

56Lesisibusiso ngesami

sokuba ngigcinile imithetho yakho.

57Nkosi, uyisabelo sami;

ngithi ngizakugcina amazwi akho.

58Ngiyancenga umusa wakho ngenhliziyo yami yonke;

woba lomusa kimi ngokwelizwi lakho.

59Lapho ngicabanga ngendlela zakho,

ngiqondisa inyawo zami emilayweni yakho.

60Ngiyaphangisa, kangilibali ukugcina imithetho yakho.

61Ababi bangithiyile,

kodwa kangikhohlwa umlayo wakho.

62Phakathi kobusuku ngizakuvuka ukuba ngikubonge

ngenxa yezahlulelo zakho ezilungileyo.

63Ngingumngane wabo bonke abakwesabayo,

abagcina imithetho yakho.

64Nkosi, umhlaba wonke ugcwele uthando lwakho olungapheliyo;

ngifundisa izimiso zakho.

65Wenzele inceku yakho okuhle, Nkosi,

ngokwelizwi lakho.

66Ngifundisa ukwahlulela okuhle lokwazi,

ngoba ngikholwa imithetho yakho.

67Ngingakahlupheki ngaduha,

kodwa khathesi sengigcine ilizwi lakho.

68Wena ulungile, wenza okulungileyo;

ngifundisa izimiso zakho.

69Abaziqakisayo baqamba amanga ngami,

kodwa ngayo yonke inhliziyo yami ngiyagcina imithetho yakho;

70kabalakuqedisisa,

kodwa mina ngithokoza ngomlayo wakho.

71Kwakungilungele ukuba ngihlutshwe,

ukuze ngifunde izimiso zakho.

72Umlayo owumisileyo muhle kimi

kulezinhlamvu eziyizinkulungwane zegolide lezesiliva.

73Izandla zakho zingenzile, zangibumba;

nginika ukuqedisisa ukuba ngifunde imithetho yakho.

74Abakwesabayo bazakuthokoza lapho bengibona,

ngoba ngithembile elizwini lakho.

75Nkosi, ngiyazi ukuthi izahlulelo zakho zilungile,

lokuthi ukungitshaya kwakho kulungile.

76Uthando lwakho olungapheliyo kalube yinduduzo yami

njengokuthembisa kwakho encekwini yakho.

77Isihawu sakho kasize kimi ukuba ngiphile,

ngoba umlayo wakho uyintokozo yami.

78Abaziqakisayo kabayangeke,

ngoba bangiqambela amanga;

kodwa mina ngizakunakana ngemithetho yakho.

79Kabaphendukele kimi abakwesabayo,

abazi imilayo yakho.

80Inhliziyo yami kayiphelele ezimisweni zakho,

ukuze ngingayangeki.

81Umphefumulo wami uyalangatha ukukhulula kwakho;

ngiyathemba ilizwi lakho.

82Amehlo ami ayafiphala ngokulindela ilizwi lakho;

ngithi: Uzakungiduduza nini na?

83Ngoba sengitshwabhene njengomgodla osentuthwini,

kanti kangikhohlwa izimiso zakho.

84Ngizalinda insuku ezingaki na?

Uzakubahlulela nini abangizingelayo na?

85Abaziqakisayo bangimbela imigodi,

abangahambiyo ngokomlayo wakho.

86Yonke imithetho yakho ithembekile;

bangizingela ngamanga; ngisiza!

87Baphosa ukungibulala emhlabeni,

kodwa kangitshiyanga imithetho yakho.

88Ngivuselela ngothando lwakho olungapheliyo,

ukuze ngigcine imilayo yakho.

89Nkosi, ilizwi lakho limi ezulwini kuze kube nininini.

90Ukuthembeka kwakho kusezizukulwaneni zonke;

wamisa umhlaba, usemi.

91Ngokumisa kwakho konke kusemi lalamuhla,

ngoba izinto zonke ziyizinceku zakho.

92Uba umlayo wakho ubungesiyo intokozo yami,

ngabe ngibhubhele ekuhluphekeni kwami.

93Kangisoze ngikhohlwe imithetho yakho,

ngoba wangivuselela ngayo.

94Ngingowakho, ungisize;

ngoba ngidingile imithetho yakho.

95Ababi bangilindele ukungibhubhisa,

kodwa ngiyananzelela imilayo yakho.

96Ngiyazi ukuthi zonke izinto zilokuphela,

kodwa umlayo wakho kawulamkhawulo.

97Ngiyawuthanda umlayo wakho kangaka.

Usuku lonke ngiyanakana ngawo.

98Ngemithetho yakho ngiyahlakanipha kulezitha zami,

ngoba ilami kuze kube nininini.

99Ngilokuqedisisa kulabo bonke abafundisi bami,

ngoba nginakana ngemilayo yakho.

100Ngilokuqedisisa kulabadala,

ngoba ngigcina imithetho yakho.

101Ngiyazinqanda inyawo zami endleleni zonke ezimbi,

ukuze ngigcine ilizwi lakho.

102Kangiphambuki kuzo izahlulelo zakho,

ngoba wena wangifundisa.

103Amnandi kangaka amazwi akho emlonyeni wami,

amnandi kulenyosi!

104Ngayo imithetho yakho ngiyazuza ukuqedisisa;

ngakho ngiyazonda zonke indlela zamanga.

105Ilizwi lakho liyisibane enyaweni zami

lokukhanya endleleni yami.

106Ngifungile, ngaqinisa,

ukugcina izimiso zakho ezilungileyo.

107Ngiyahlupheka kakhulu;

ngivuselela, Nkosi, ngokwelizwi lakho.

108Nkosi, yamukela iminikelo yami yokubonga,

ungifundise izahlulelo zakho.

109Ngingenisa ukuphila kwami engozini njalonjalo,

kodwa kangikhohlwa umlayo wakho.

110Ababi bangithiyile,

kodwa kangiduhanga emithethweni yakho.

111Imilayo yakho iyilifa lami kuze kube nininini;

iyintokozo yenhliziyo yami.

112Ngizimisele ukugcina izimiso zakho

kuze kube sekupheleni.

113Ngiyabazonda abanhliziyombili,

kodwa umlayo wakho ngiyawuthanda.

114Wena uyisiphephelo sami lesihlangu sami;

ngiyathemba elizwini lakho.

115Sukani kimi lina abenza okubi,

ukuba ngigcine imithetho kaNkulunkulu wami.

116Ngisekela ngokwelizwi lakho ukuze ngiphile,

ngingayangeki ngethemba lami.

117Ngiqinisa ukuba ngiphile,

nginanzelele njalo izimiso zakho.

118Bonke abaduha ezimisweni zakho uyabalahla,

ubuqili babo buyize.

119Uyalahla bonke ababi bomhlaba njengamanyele;

ngakho ngiyayithanda imilayo yakho.

120Umzimba wami uyathuthumela ulovalo ngawe,

ngiyesaba izahlulelo zakho.

121Ngenzile okulungileyo lokufaneleyo;

ungangiyekeleli kubo abangihluphayo.

122Mela inceku yakho ngokulunga,

abaziqakisayo kabangangicindezeli.

123Amehlo ami ayafiphala ngokulinda ukukhulula kwakho,

ukugcwaliswa kwesithembiso sakho esilungileyo.

124Yenza encekwini yakho ngokothando lwakho olungapheliyo,

ungifundise izimiso zakho.

125Ngiyinceku yakho; ngiphe ukuqedisisa,

ukuba ngiyazi imilayo yakho.

126Sekuyisikhathi seNkosi sokuba isebenze,

ngoba abantu bawaphule umlayo wakho.

127Ngakhoke ngiyayithanda imithetho yakho kakhulu kulegolide,

yebo, kulegolide elihle.

128Ngakho ngiyaqondisa inyawo zami ngokwemithetho yakho yonke,

ngiyazonda zonke indlela zamanga.

129Imilayo yakho iyamangalisa;

ngakhoke umphefumulo wami uyayigcina.

130Ukwambulwa kwamazwi akho kuyakhanyisa,

kuyahlakaniphisa abayizithutha.

131Ngiyavula umlomo wami, ngiyaphefuzela,

ngoba ngilangatha imithetho yakho.

132Phendukela kimi, ube lomusa kimi

njengokwenza kwakho kwabathanda ibizo lakho.

133Qinisa izinyathelo zami ngokwelizwi lakho,

kabungabusi phezu kwami ububi.

134Ngikhulula ekucindezeleni kwabantu,

ukuze ngigcine imithetho yakho.

135Khanyisa ubuso bakho phezu kwenceku yakho,

ungifundise izimiso zakho.

136Amehlo ami ehlisa inyembezi ezinengi,

ngoba abantu kabagcini umlayo wakho.

137Wena, Nkosi, ulungile,

ziqondile izahlulelo zakho.

138Imilayo yakho oyimisileyo ilungile,

ithembekile.

139Ukutshiseka kwami kuyangidla,

lapho izitha zami zikhohlwa amazwi akho.

140Ilizwi lakho lihlambulukile, liqinile;

ngakho inceku yakho iyalithanda.

141Mina ngimncinyane, ngidelelekile,

kodwa imithetho yakho kangiyikhohlwa.

142Ukulunga kwakho kuyikulunga okumiyo njalonjalo,

lomlayo wakho uliqiniso.

143Ukuhlupheka lokubandezeka kwehlele phezu kwami,

kodwa imithetho yakho iyintokozo yami.

144Imilayo yakho ilungile kuze kube nininini;

ngiphe ukuqedisisa ukuba ngiphile.

145Ngiyakhala ngenhliziyo yami yonke;

ngiphendula, Nkosi.

Ngizakugcina izimiso zakho.

146Ngiyakhala kuwe; ngisize,

ukuba ngigcine imilayo yakho.

147Ngiyavuka kungakasi ukuba ngikhulekele ukusizwa;

ngiyathemba emazwini akho.

148Ngiyaphaphama ebusuku singakapheli isikhathi sokulinda,

ukuba nginakane ngelizwi lakho.

149Zwana ilizwi lami ngothando lwakho olungapheliyo;

Nkosi, ngivuselela ngokwezahlulelo zakho.

150Bayasondela abangihlupha ngolunya,

bakhatshana lomlayo wakho.

151Kodwa wena, Nkosi useduze,

lemithetho yakho yonke iliqiniso.

152Sekukade ngisazi ngemilayo yakho

ukuthi uyisekele imi kuze kube nininini.

153Khangela ukuhlupheka kwami, ungikhulule,

ngoba kangiwukhohlwa umlayo wakho.

154Mela indaba yami, ungihlenge;

ngivuselela ngokwelizwi lakho.

155Ukukhululwa kukhatshana lababi,

ngoba kabafuni izimiso zakho.

156Isihawu sakho, Nkosi, sikhulu;

ngivuselela ngokwezahlulelo zakho.

157Banengi abangizingelayo labayizitha zami,

kodwa kangiphambuki emilayweni yakho.

158Lapho ngibona abenza okubi ngiyacunuka,

ngoba kabagcini imithetho yakho.

159Khumbula ukuthi ngiyithanda kangaka imithetho yakho.

Ngivuselela ngokothando lwakho olungapheliyo.

160Wonke amazwi akho aliqiniso,

zonke izahlulelo zakho ezilungileyo zimi kuze kube nininini.

161Izikhulu zingizingela ngingelacala;

kodwa inhliziyo yami iyahlonipha amazwi akho.

162Ngiyathokoza ngelizwi lakho

njengomuntu othole impango enkulu.

163Amanga ngiyawazonda ngiyawenyanya,

kodwa umlayo wakho ngiyawuthanda.

164Ngiyakudumisa kasikhombisa ngosuku

ngenxa yezahlulelo zakho ezilungileyo.

165Abathanda umlayo wakho balokuthula okukhulu;

kakukho okubakhubekisayo.

166Ngiyathembela ekukhululeni kwakho, Nkosi,

ngiyenza imithetho yakho.

167Umphefumulo wami uyagcina imilayo yakho,

ngiyayithanda kakhulu.

168Ngiyagcina imithetho yakho lemilayo yakho,

ngoba zonke indlela zami ziphambi kwakho.

169Ukukhala kwami kakuzwakale kuwe, Nkosi;

ngiphe ukuqedisisa ngokwelizwi lakho.

170Ukunxusa kwami kakufike phambi kwakho;

ngikhulula ngokwelizwi lakho.

171Umlomo wami uzakukudumisa,

ngoba ungifundisa izimiso zakho.

172Ulimi lwami luzakuhlabelela ngelizwi lakho,

ngoba yonke imithetho yakho ilungile.

173Isandla sakho kasilungele ukungisiza,

ngoba ngikhethile imithetho yakho.

174Ngiyalangatha ukukhulula kwakho, Nkosi,

umlayo wakho uyintokozo yami.

175Kangiphile ukuba ngikudumise,

lezahlulelo zakho kazingisize.

176Ngiduhile njengemvu elahlekileyo;

dinga inceku yakho, ngoba kangikhohlwa imithetho yakho.