Jer 33 - Ndebele Bible (iBhayibhili Elingcwele) 1978

Okuhle kuzabuyiswa eJerusalema

1Ilizwi leNkosi lafika kuJeremiya ngokwesibili, esavalelwe egumeni labalindi, lathi:

2INkosi eyenza umhlaba leyawubumba, yawumisa waqina, yona ethiwa yiNkosi, ithi:

3Ngibiza, ngizakusabela, ngikutshele izinto ezinkulu ezifihlakeleyo ongazaziyo.

4Ngoba iNkosi, uNkulunkulu wakoIsrayeli, ithi mayelana lezindlu zalumuzi langendlu yamakhosi akoJuda, ezidilizwe ukuba kwenziwe indawo yokuvika phambi kwamadundulu okuvimbezela laphambi kwempi:

5AmaKaladiya azafika ukulwa, azigcwalise ngezidumbu zabantu engizababulala ekuthukutheleni kwami lasekufuthekeni kwami; ngoba lumuzi ngiwufihlele ubuso bami ngenxa yobubi babo bonke.

6Kodwa ngizawulethela ukuphila lokusiliswa; ngizabasilisa abantu bawo, ngibatshengise ukuphumelela lokulondoloza kwami okunengi.

7Ngizabuyisa abantu bakoJuda labakoIsrayeli, ngibamise babe njengakuqala,

8ngibahlambulule kubo bonke ububi babo abona ngabo kimi, ngibathethelele isono sabo lobubi bokungihlamuka kwabo.

9IJerusalema lizakuba libizo elingijabulisayo, udumo lwami lokuzincoma kwami, kuzo zonke izizwe zomhlaba ezizakuzwa ngokuhle konke engibenzela khona; zizakwesaba, zithuthumele ngokuhle konke langokuphumelela konke engibenzele khona.

10INkosi ithi: Kulindawo elithi iyinkangala engelamuntu lenyamazana, emizini yakoJuda lasezindleleni zeJerusalema eziyinkangala engelamuntu lenyamazana, kuzakuzwakala futhi

11ilizwi lokuthaba lelizwi lokuthokoza, ilizwi lomyeni lelomlobokazi, lelizwi labahlabelayo lapho beletha iminikelo yabo yokubonga ethempelini lami besithi:

Bongani iNkosi yamabandla, ngoba ilungile,

ngoba uthando lwayo olungapheliyo lumi kuze kube nininini.

Ngoba ngizabuyisa abantu belizwe babe njengakuqala, kutsho iNkosi.

12INkosi yamabandla ithi: Kuyona le indawo eyinkangala engelamuntu lenyamazana, lasemizini yonke yakhona, kuzakuba khona futhi imizi yabelusi abazaphuma kuyo lemihlambi yabo.

13Emizini yasemaqaqeni leyaseShefela leyaseNegebi, laselizweni lakoBenjamini, ezindaweni eziseduze leJerusalema, lasemizini yakoJuda, izimvu zizabuya zidlule phambi kwalabo abazibalayo, kutsho iNkosi.

14Insuku ziyeza, kutsho iNkosi, lapho ngizagcwalisa isithembiso engasenza endlini yakoIsrayeli lasendlini yakoJuda.

19Ilizwi leNkosi lafika kuJeremiya lisithi:

20INkosi ithi: Uba lingasephula isivumelwano sami semini lesivumelwano sami sobusuku, ukuze kungabi khona imini lobusuku ngesikhathi sakho,

21ng’khona lesivumelwano sami lenceku yami uDavida sizakwephulwa, ukuba angabi landodana yokubusa esihlalweni sakhe sobukhosi, lesivumelwano sami labapristi abangamaLevi abangikhonzayo sizakwaphulwa.

22Njengoba inkanyezi zingabaleki, letshebetshebe lolwandle lingalinganiseki, ngokunjalo ngizakwandisa inzalo kaDavida inceku yami labapristi abangamaLevi abangikhonzayo.

23Ilizwi leNkosi lafika kuJeremiya lathi:

24Kawuqaphelisanga yini abakutshoyo lababantu ukuthi: INkosi izilahlile izindlu zombili ebizikhethile? Ngalokhoke babadelela abantu bami, babenza bangabe besaba yisizwe emehlweni abo.

25INkosi ithi: Uba ngingamisanga isivumelwano sami semini lesebusuku, lezimiso zami zezulu lomhlaba,

26ngizakulahla inzalo kaJakobe lenzalo kaDavida inceku yami, kangiyikukhetha omunye wenzalo yakhe ukuba abuse phezu kwenzalo kaAbrahama loIsaka loJakobe. Ngoba ngizabuyisa abantu babo, ngibe lesihawu kibo.