Hubo 42 - Ndebele Bible (iBhayibhili Elingcwele) 1978

UGWALO LWESIBILIUmkhuleko womuntu okhatshana lakibo

1Njengalokhu impala inxwanele imifula yamanzi,

ngokunjalo umphefumulo wami unxwanela wena, Nkulunkulu.

2Umphefumulo wami womela uNkulunkulu,

uNkulunkulu ophilayo.

Ngizakufika nini ngibone ubuso bukaNkulunkulu na?

3Inyembezi zami beziyikudla kwami emini lasebusuku,

lapho abantu kokuphela besithi:

Ungaphi uNkulunkulu wakho na?

4Ngikhumbula lezizinto ngidabuke inhliziyo,

ukuthi ngangihamba lamaxuku,

ngiwakhokhele odwendweni lokuya endlini kaNkulunkulu

ngenhlokomo yezingoma zokubonga,

ixuku eligida umkhosi.

5Udaneleni mphefumulo wami na?

Ukhathazekelani phakathi kwami na?

Themba kuNkulunkulu, ngoba ngisezakumdumisa,

umsizi wami loNkulunkulu wami.

6Umphefumulo wami udanile phakathi kwami;

ngakhoke ngiyakukhumbula wena

lapha elizweni laseJordani lelaseHermoni

lasentabeni iMizari.

7Impophoma iyabiza impophoma

ekuhlokomeni kweziholoba zakho;

wonke amavinqo lamaza akho adlule phezu kwami.

8Emini iNkosi iyangiphatha ngothando lwayo olungapheliyo;

ebusuku ngiyahlabela ingoma yayo,

umkhuleko wami kuNkulunkulu wokuphila kwami.

9Ngithi kuNkulunkulu, idwala lami:

Ungikhohlwelani na?

Ngihambelani ngilila ngenxa yokucindezela kwezitha na?

10Kuyafutha njengesilonda emzimbeni wami

lapho izitha zami zingihleka,

lapho zisithi kimi insuku zonke: Ungaphi uNkulunkulu wakho na?

11Udaneleni mphefumulo wami na?

Ukhathazekelani phakathi kwami na?

Themba kuNkulunkulu, ngoba ngisezakumdumisa futhi,

umsizi wami loNkulunkulu wami.