Isa 26 - Ndebele Bible (iBhayibhili Elingcwele) 1978

Ingoma yokukhululwa

1Ngalolosuku lingoma izahlatshelelwa elizweni lakoJuda ethi:

Silomuzi oqinileyo;

iNkosi isimisele ukukhulula kube yimiduli lezinqaba.

2Vulani amasango ukuba isizwe esilungileyo lesithembekileyo singene.

3Uyamnika ukuthula okupheleleyo lowo olengqondo ebambelele kuwe,

ngoba ethemba kuwe.

4Thembani eNkosini kokuphela,

ngoba iNkosi uNkulunkulu ilidwala elingelakuphela.

5Ibehlisele phansi abahlala engqongeni,

emzini ophakemeyo.

Iwudilizele phansi, yawuphosela ethulini.

6Inyawo zabayanga lenyawo zabahluphekayo ziyawunyathela.

7Indlela yabalungileyo iqondile;

uyenza ibe butshelezi indlela yabalungileyo.

8Nkosi, sihambe endleleni yemilayo yakho, sakuthemba;

imiphefumulo yethu ilangatha ibizo lakho lezikhumbuzo zakho.

9Umphefumulo wami uyakulangatha ebusuku,

lomoya wami uyakudingisisa.

Ngoba lapho izahlulelo zakho zikhona emhlabeni,

abahlala emhlabeni bafunda ukulunga.

10Lanxa omubi ephathwa ngomusa, kafundi ukulunga;

laselizweni labaqotho wenza okubi,

angaboni ubukhosi beNkosi.

11Nkosi, isandla sakho siphakanyisiwe,

kodwa izitha zakho kazisiboni.

Kazibone ukutshisekela kwakho abantu bakho, zibe lenhloni.

Umlilo olungiselwe zona kawuziqede.

12Nkosi, uzakusenzela okuhle,

ngoba layo yonke imisebenzi yethu siyenzelwe nguwe.

13Nkosi Nkulunkulu wethu, amanye amakhosi ngaphandle kwakho ake asibusa,

kodwa libizo lakho kuphela esilidumisayo.

14Wona asafa, kawasaphili,

aseyizithunzi nje, kawasayikuvuka;

wawachitha, wenza ukuba angabe esakhunjulwa.

15Nkosi, usandisile isizwe sethu,

walandisa lonke ilizwe;

ngalokho uyadunyiswa.

16Nkosi, sakudinga sisekuhluphekeni,

sakhuleka kuwe lapho sitshaywa.

17Njengokhulelweyo lapho kusondele isikhathi sokubeletha kwakhe

ekhaliswa yibuhlungu, lathi saba njalo ngenxa yakho, Nkosi.

18Sasikhulelwe sihelelwa, kodwa kasibelethanga lutho.

Kasilethanga ukukhululwa emhlabeni,

kasenzanga lutho.

19Kodwa abafileyo bakho bazakuphila,

izidumbu zabo zizavuka futhi.

Vukani, lihlabele ngokuthokoza, lina elilele othulini.

Ngoba amazolo akho angamazolo akhanyayo,

umhlaba uzakubakhupha abafileyo.

Ukwahlulelwa lokubuyiswa kukaIsrayeli

20Wozani bantu bami, lingene endlini zenu,

livale iminyango,

licatshe khona okwesikhatshana

luze ludlule ulaka lukaNkulunkulu.

21Ngoba, khangelani, iNkosi iyaphuma endaweni yayo

ukuba itshaye abahlala emhlabeni ngenxa yobubi babo;

umhlaba uzaveza igazi elachitheka kuwo,

ungabe usabafihla ababuleweyo bawo.