Isa 45 - Ndebele Bible (iBhayibhili Elingcwele) 1978

Ukubizwa kukaKurosi

1INkosi itsho kogcotshiweyo wayo uKurosi,

embambe ngesandla sakhe sokunene

ukuba inqobe izizwe phambi kwakhe,

ithathele amakhosi amandla,

ivule iminyango phambi kwakhe,

ukuze amasango angabe asavalwa,

2ithi: Ngizahamba phambi kwakho ngihlelembe izintaba,

ngiphahlaze iminyango yethusi,

ngephule imigoqo yensimbi.

3Ngizakukunika inotho efihliweyo emnyameni,

lenotho ethukuziweyo ezindaweni ezisithekileyo,

ukuze wazi ukuba mina Nkosi, uNkulunkulu kaIsrayeli,

ngikubize ngebizo lakho.

4Ngenxa yenceku yami uJakobe,

loIsrayeli okhethiweyo wami,

ngikubiza ngebizo lakho,

ngikunika isibongo, lanxa wena ungangazi.

5Mina ngiyiNkosi, kakukho omunye,

langaphandle kwami kakho uNkulunkulu.

Ngiyakuhlomisa ngezikhali, lanxa wena ungangazi,

6ukuze abantu bazi kusukela ngasempumalanga

langasentshonalanga ukuthi kakho omunye ngaphandle kwami;

mina ngiyiNkosi, kakho omunye.

7Yimi engenza ukukhanya, ngiveze lomnyama;

yimi engiletha okuhle, ngiveze lokubi;

ngiyiNkosi eyenza lezizinto zonke.

INkosi inguMdali

8Khizani ukunqoba, lina mazulu,

lamayezi akunisele phansi,

umhlaba uvuleke ukwamukele, ukuze kuhlume ukukhululwa,

kumile lokulunga kuwo.

Mina Nkosi ngikwenzile.

9Udiwo lungaphikisana yini lomenzi walo,

lembiza yebumba lombumbi wayo na?

Ibumba liyatsho yini kolibumbayo ukuthi: Wenzani na?

kumbe ukuthi: Kawulaminwe yokubumba.

10Umntwana angatsho kuyise ukuthi: Uzalani na?

lakunina ukuthi: Uhelelwa yini na?

11INkosi, oNgcwele kaIsrayeli, uMenzi wakhe, ithi:

Uzangibuza ngabantwana bami,

ingabe ungilawule ngomsebenzi wezandla zami na?

12Yimi owenza umhlaba, ngabumba umuntu ukuhlala kuwo;

yizandla zami ezendlala iphezulu,

ngakulawula konke okukulo ukuba kukhanye.

13Ngimvusele ukulunga uKurosi,

ngizahlelemba zonke izindlela zakhe;

uzakwakha umuzi wami, akhulule abathunjiweyo bami,

engabakhululeli inkokhelo lomvuzo,

kutsho iNkosi yamabandla.

14INkosi ithi: Izisebenzi zaseGibithe labathengisi baseEtiyopiya

labantu baseSheba bethwele imithwalo

bazakuza kuwe, babe yizigqili zakho;

bazakukulandela bebotshiwe ngamaketane,

bakhothame kuwe besithi:

Impela uNkulunkulu uphakathi kwenu,

kakho omunye ngaphandle kwakhe.

15Impela unguNkulunkulu ozifihlayo,

wena Nkulunkulu wakoIsrayeli, loMsilisi.

16Bonke bazayangeka, babe lenhloni;

bazahamba belenhloni bonke abenzi bezithombe.

17Kodwa uIsrayeli uzakhululwa yiNkosi ngokukhululwa okungapheliyo;

kaliyikuyangeka, libe lenhloni, kuze kube nininini.

18Ngoba iNkosi eyadala iphezulu, yona enguNkulunkulu,

eyabumba umhlaba, yawenza, yawumisa, ingawudaleli ize,

yawubumba ukuba kuhlalwe kuwo,

ithi: NgiyiNkosi, kakho omunye.

19Kangikhulumelanga ekusithekeni elizweni lomnyama,

kangitshongo kuyo inzalo kaJakobe ukuthi: Ngidingani ezeni.

Mina Nkosi ngikhuluma iqiniso, ngitsho okuqotho.

INkosi inguNkulunkulu wakho konke

20Buthanani, lisondele lonke,

lina abaseleyo bezizwe, elingelakho ukwazi,

elithwele izithombe zezigodo,

likhuleka kunkulunkulu ongelakusiza.

21Wozani, lilandise indaba yenu;

cebisanani lonke.

Ngubani owamemeza lokho endulo na?

Ngubani owakubikezela kudala na?

Kwakungayisimi, iNkosi na?

Kakukho omunye unkulunkulu ngaphandle kwami,

onguNkulunkulu olungileyo loMsilisi;

kakho omunye ngaphandle kwami.

22Phendukelani kimi likhululwe,

lina lonke bantu basemhlabeni wonke.

Ngoba nginguNkulunkulu, kakho omunye.

23Ngizifungile mina,

ngakhuluma ilizwi eliqinisekileyo elingasayikwaphulwa futhi,

elithi: Wonke amadolo azakuguqa phambi kwami,

lezindimi zonke zizakungifunga.

24Ukunqoba lamandla kuvela eNkosini kuphela;

bonke abayidelelayo bazayangeka phambi kwayo.

25Kanti inzalo kaIsrayeli izakunqoba, ithokoze ngeNkosi.