1 Kho 13 - Ndebele Bible (iBhayibhili Elingcwele) 1978

Umprofethi othile wakoJuda uxwayisa uJerobowamu

1Kwathi uJerobowamu emi phambi kwealtare ukutshisa impepha, kwafika umuntu kaNkulunkulu eBetheli evela koJuda ethunywa yilizwi leNkosi.

2Walimemeza ialtare ngelizwi leNkosi wathi: Wena altare, altare, iNkosi ithi: Kuzazalwa indodana endlini kaDavida ezakuthiwa nguJosiya; izanikela imihlatshelo phezu kwakho ngabapristi bezindawo eziphakemeyo zokukhonzela abatshisa impepha phezu kwakho, lamathambo abantu azatshiselwa phezu kwakho.2 Kho 23:15–16

3Wasenika isibonakaliso ngalona lolosuku esithi: Nansi isibonakaliso sokuthi iNkosi ikhulumile yathi: Ialtare lizadilizwa lomlotha ophezu kwalo uchithwe.

4Kwathi inkosi uJerobowamu isizwile amazwi omuntu kaNkulunkulu awakhuluma ngealtare leBetheli, yasusa isandla sayo ealtareni, yamkhomba isithi: Mbambeni lumuntu! Sahle safa isandla eyayimkhombe ngaso, yehluleka ukusibuyisa.

5Lealtare lelo ladilika, lomlotha wachitheka njengesibonakaliso umuntu kaNkulunkulu ayesinikile ngelizwi leNkosi.

6Inkosi uJerobowamu yathi emuntwini kaNkulunkulu: Ake ungincengele eNkosini uNkulunkulu wakho, ungikhulekele, ukuba isandla sami sisiliswe. Umuntu kaNkulunkulu wasemncengela eNkosini, lesandla sikaJerobowamu sasiliswa saba njengakuqela.

7Wasesithi kumuntu kaNkulunkulu: Ake siye ekhaya ukuba udle, ngizakukunika umvuzo.

8Kodwa yena wathi kuye: Loba unganginika lengxenye yendlu yakho, kangiyikuhamba lawe; kangiyikudla ukudla, nginathe amanzi kulindawo;

9ngoba ngatshelwa lokhu yiNkosi uNkulunkulu eyathi: Kawuyikudla ukudla, unathe amanzi, loba ubuye ngendlela oze ngayo.

10Wasehambake ngenye indlela, kaze abuyela ngendlela ayeze ngayo eBetheli.

11Kwakukhona umprofethi omdala owayehlala eBetheli. Amadodana akhe eza amtshela konke umuntu kaNkulunkulu ayekwenzile mhlalokho eBetheli, lamazwi ayewakhulume enkosini.

12Uyise wawo wathi kiwo: Uqonde ngaphi? Amadodana asemtshengisa indlela umuntu kaNkulunkulu owayevele koJuda ahamba ngayo.

13Wasesithi emadodaneni akhe: Ngilungiselani ubabhemi. Basebemlungisela, wasegada.

14Wamlandela umuntu kaNkulunkulu, wamfica ehlezi ngaphansi kwesihlahla esikhulu, wathi kuye: Nguwe umuntu kaNkulunkulu ovela koJuda na? Yena wathi: Yimi.

15Wasesithi: Woza ekhaya, udle.

16Yena wathi: Ngingeke ngibuyele lawe, ngingene kwakho, ngidle ukudla, nginathe lamanzi kulindawo,

17ngoba ilizwi leNkosi lathi kimi: Kawuyikudla ukudla, unathe lamanzi khona, ubuye ngendlela oze ngayo.

18Wasesithi kuye: Lami ngingumprofethi njengawe, isithunywa sakhuluma kimi ngelizwi leNkosi sathi: Ubuye laye endlini yakho ukuba adle ukudla, anathe amanzi. Kodwa wayemtshela amanga.

19Lowomuntu wakoJuda wasebuyela laye, wadla ukudla, wanatha amanzi endlini yakhe.

20Kwathi besadla, ilizwi leNkosi uNkulunkulu lafika kulowomprofethi owayembuyisile;

21wasesithi kulowomuntu kaNkulunkulu owayevela koJuda: INkosi ithi: Ngoba ungalilalelanga ilizwi leNkosi uNkulunkulu, ungagcinanga umlayo wayo eyakulaya ngawo,

22kodwa ubuyile, wadla ukudla, wanatha amanzi endaweni eyakulaya ngayo ukuba ungadli khona ukudla, unganathi amanzi; ngakho kawuyikungcwatshelwa emangcwabeni abokhokho bakho.

23Kwathi esedlile wanatha, wasemlungisela ubabhemi lowomprofethi ayembuyisile.

24Esahamba wahlangana lesilwane endleleni, sambulala, isidumbu sakhe sawela emgwaqweni, ubabhemi wema eceleni kwaso, lesilwane laso sema eceleni.

25Abantu abadlulayo basibona isidumbu sisemgwaqweni lesilwane simi kuso; bafika bakubika lokhu emzini lapho lowomprofethi omdala wayehlala khona.

26Kwathi lapho lowomprofethi owayembuyisile esizwa lokhu wathi: Nguye umuntu kaNkulunkulu ongalilalelanga ilizwi leNkosi; iNkosi imthumele isilwane esimbambe sambulala, njengelizwi leNkosi kuye.

27Wasesithi emadodaneni akhe: Ngilungiselani ubabhemi. Basebemlungisa.

28Wasehambake wafumanisa isidumbu sakhe siwele emgwaqweni, ubabhemi lesilwane kumi kuso. Isilwane sasingasidlanga isidumbu, singambulalanga lobabhemi.

29Lowomprofethi wasesithatha isidumbu somuntu kaNkulunkulu, wasiphanyeka kubobabhemi, wabuya laso emzini wakibo ukusililela lokusingcwaba.

30Wasingcwaba isidumbu elibeni lakhe, basililela bathi: Maye ngomfowethu!

31Esemngcwabile wathi emadodaneni akhe: Ekufeni kwami lingingcwabe elibeni okungcwatshelwe khona umuntu kaNkulunkulu, libeke amathambo ami phansi kwawakhe.

32Ngoba ilizwi leNkosi alitsho ngealtare eliseBetheli, langawo wonke amathempeli ezindawo eziphakemeyo zokukhonzela emizini yonke yaseSamariya lizagcwaliseka sibili.

33Ngemva kwalokho uJerobowamu kasukanga endleleni zakhe ezimbi, kodwa wayelokhu ebabeka ebantwini bonke abapristi bezindawo eziphakemeyo zokukhonzela, wonke umuntu ofisayo wambeka umpristi wendawo ephakemeyo.

34Ngokwenza njalo wehlisela umlandu endlini yakhe, wayilethela ukuchitheka okukhulu.