Dute 32 - Ndebele Bible (iBhayibhili Elingcwele) 1978

1Zwanini lina mazulu, ngizakukhuluma,

lomhlaba uzwe amazwi omlomo wami.

2Ukufundisa kwami kuzakwehla njengezulu,

ukukhuluma kwami kuthonte njengamazolo,

njengomkhizo otshanini obuluhlaza,

njengemifefezo ohlazeni.

3Ngizamemezela ibizo leNkosi.

Vumani ukuthi mkhulu uNkulunkulu wethu.

4UliDwala, lomsebenzi wakhe uphelele,

ngoba zonke indlela zakhe ziyikulunga.

UnguNkulunkulu othembekileyo, ongelabubi,

ulungile, uqotho.

5Bonile kuye,

kabasibo abantwana bakhe ngenxa yesici sabo,

bayisizukulwana esiphambeneyo lesingaqondanga.

6Liyibonga iNkosi kanjalo,

lina bantu abayizithutha labangahlakaniphanga na?

Kayisuye uyihlo owalidalayo,

walenza, walimisa na?

7Khumbulani insuku zasendulo,

linakane ngeminyaka yezizukulwana ezinengi.

Buzani oyihlo, bazakulilandisela,

labalisa benu, bazalitshela.

8Lapho oPhezukonke enika izizwe ilifa lazo,

lalapho esahlukanisa abantu,

wamisa imikhawulo yezizwe

njengobunengi babantu bakoIsrayeli;

9kodwa isabelo seNkosi saba ngabantu bayo,

uJakobe waba yisabelo sayo esikhethiweyo.

10Wamfumana elizweni eliyinkangala,

enkangala elezilo ezibhongayo.

Wamphahla, wamlondoloza,

wamgcina, waba ligugu kuye.

11Njengokhozi olunyakazisa abantwana balo,

oluphapha phezu kwamatsiyane alo,

olwelula amaphiko alo ukuwathatha,

luwathwale ngezimpaphe zalo,

12ngokunjalo iNkosi yamhola,

kwakungekho layo unkulunkulu wabezizwe.

13Wamkhwelisa endaweni eziphakemeyo zomhlaba,

wadla izithelo zamasimu.

Wamnika uluju oluvela edwaleni,

lamagcobo aphuma elitsheni elilukhuni,

14lezankefu zezinkomo, lochago lwezimbuzi,

kanye lamafutha amawundlu lawezinqama,

inkomo zaseBashani lezimbuzi,

lamabele amahle;

wanatha iwayini, igazi lezithelo zesivini.

15Kodwa uJeshuruni wazimuka, wasehlamuka.

Yebo, uIsrayeli waminza, wakhuluphala, wazimuka.

Wasedela uNkulunkulu owamenzayo,

wadelela iDwala lokukhululwa kwakhe.

16Bavusa umhawu wakhe ngonkulunkulu babezizwe,

bamthukuthelisa ngokwenza izinto ezinengekayo.

17Bahlabela omoya ababi abangesibo onkulunkulu,

onkulunkulu ababengabazi,

onkulunkulu abatsha abasand’ukuvela,

ababengesatshwa ngokhokho babo.

18Kabalinanzelelanga iDwala elabazalayo,

bamkhohlwa uNkulunkulu owabazalayo.

19INkosi yakubona, yabafulathela,

ngenxa yokucunula kwamadodana lamadodakazi ayo.

20Yathi: Ngizakubafihlela ubuso bami,

ngibone ukuthi ukuphela kwabo kuzakuba yini;

ngoba bayisizukulwana esingaqondanga,

bangabantwana abangathembekanga.

21Bavusile umona wami ngalokho okungesuye unkulunkulu;

bangithukuthelisile ngezinto zabo eziyize.

Ngakhoke ngizavusa umona wabo ngabangesibo abantu,

ngibathukuthelise ngesizwe esiyisithutha.

22Ngoba umlilo usubasiwe ngentukuthelo yami,

uyatshisa kuze kube senzikini yendawo yabafileyo;

uqeda umhlaba lezithelo zawo,

utshise izisekelo zezintaba.

23Ngizabuthelela izinhlupheko, phezu kwabo,

ngitshoke yonke imitshoko yami kubo.

24Bazakuqedwa yindlala,

baqedwe yikutshisa lesifo esibuhlungu;

ngizathuma kubo amazinyo ezilo,

lobuhlungu bokuhuquzelayo othulini.

25Ngaphandle impi izakubulala,

ezindlini kuzakuba khona ukwesaba okukhulu,

kubhubhise insizwa lentombi,

lomntwana omunyayo lendoda eyimpunga.

26Bengizakuthi: Ngizabachitha isibili,

ngiqede ukukhunjulwa kwabo phakathi kwabantu;

27uba bengingesabi ukuzincoma kwezitha,

lezitha zabo zikuhlanekele,

zithi: Isandla sethu sinqobile;

kakusiyo iNkosi eyenze konke lokhu.

28Ngoba bayisizwe esingelakuhlakanipha,

kakukho ukuqedisisa kubo.

29Uba bebehlakaniphile, ngabe bakuqedisisa lokhu,

bazi ukuphela kwabo.

30Uba umuntu emunye angaxotsha kanjani abayinkulungwane,

lababili bangabadudula kanjani abazinkulungwane ezilitshumi,

uba iDwala labo lingabathengisanga,

leNkosi ingabanikelanga na?

31Ngoba idwala labo kalinjengeDwala lethu;

lezitha zethu ziyazibonela lokho.

32Ivini labo livela evinini laseSodoma,

emasimini aseGomora;

izithelo zesivini sabo yizithelo ezilobuhlungu,

amahlukuzo abo amunyu;

33iwayini labo liyibuhlungu bezinyoka,

lobuhlungu bebululu.

34Lokho kakubekiwe kimi yini,

kakunamekiwe endlini yami yenotho na?

35Ngokwami ukuphindisela lokubuyisela,

ngesikhathi sokutshelela kwenyawo zabo;

ngoba usuku lwabo lwengozi selusondele,

lokho abakulungiselweyo kuzafika masinyane.

36Ngoba iNkosi izakubahlulela abantu bayo,

izihawukele inceku zayo,

lapho ibona ukuthi amandla abo aphelile,

lokuthi kakulamuntu oseleyo ovalelweyo lokhululekileyo.

37Ng’khona izakuthi: Bangaphi onkulunkulu benu,

idwala elaliphephela kulo,

38onkulunkulu abadla amafutha emihlatshelo yenu,

abanatha iwayini lomnikelo wenu wokuthululwa na?

Kabavuke bona, balisize,

babe yisivikelo senu.

39Bonani ukuthi mina nginguye,

kakho omunye unkulunkulu ngaphandle kwami;

ngiyabulala, ngisilise;

ngiyalimaza, ngelaphe;

kakho ongakhulula esandleni sami.

40Ngoba ngiphakamisela isandla sami ezulwini,

ngifunge ngithi: Njengoba ngiphila kokuphela,

41nxa ngilola umhedla wami ocwazimulayo,

lesandla sami sibambelela ekwahluleleni,

ngizakubaphindisela abamelene lami.

ngibe lempindiselo kwabangizondayo.

42Ngizadakisa imitshoko yami ngegazi,

umhedla wami uzakudla inyama,

ngitsho ngegazi lababuleweyo lelabathunjiweyo,

lelamakhanda ezitha alenwele ezinde.

43Dumisani abantu bayo, lina zizwe;

ngoba iyaphindisela igazi lezinceku zayo,

ibe lempindiselo kubo abamelene layo,

yenzele ilizwe labantu bayo ukubuyisana.

44UMose wafika, wakhuluma wonke amazwi alingoma phambi kwabantu, yena loJoshuwa indodana kaNuni.

45UMose eseqedile ukukhuluma wonke lamazwi kubo bonke bakoIsrayeli,

46wathi kubo: Bekani enhliziyweni zenu wonke amazwi engiwakhuluma kini lamuhla, ukuba libalaye abantwana benu ngawo, bawagcine kuhle wonke amazwi alumlayo.

47Ngoba kini kakusiyo into eyize, kodwa kuyikuphila kwenu; ngalokhu lizahlala isikhathi eside elizweni elichapha iJordani ukulithumba.

UMose uvunyelwa ukuba akhangele ilizwe laseKanani

48INkosi yathi kuMose ngalona lolosuku:Nani 27:12–14; Dute 3:23–27

49Khwela lintaba yaseAbarimi, intaba yaseNebo, eselizweni laseMowabi maqondana leJeriko, ukhangele ilizwe laseKanani engilinika abantu bakoIsrayeli ukuba yilifa labo,

50ufele entabeni oyikhwelileyo, umbelwe kwabakini, njengoAroni umfowenu owafela entabeni yaseHori, wambelwa kwabakibo.

51Ngoba waphambana lami phakathi kwabantu bakoIsrayeli ngasemanzini aseMeriba‐Kadeshi enkangala yaseZini; ngoba ungangihloniphanga njengongcwele phakathi kwabakoIsrayeli.

52Ngoba uzakulibona ilizwe phambi kwakho, kodwa kawuyikuya kulo, kawuyikungena elizweni engilinika ebantu bakoIsrayeli.